كۇنى كەشە عانا ەرنازار جۇبان ۆيتەبسكىدەگى بەدەلدى «سلاۆيان بازارى» حالىقارالىق بايقاۋىندا ءبىرىنشى ورىنعا يە بولدى. جاس ءانشى كاسىبي شەبەرلىگى مەن تالانتىنىڭ ارقاسىندا جەڭىس تۇعىرىنان كورىنىپ, قازاق جۇرتىن ءبىر قۋانتتى.
ەسكە سالا كەتەيىك, كونكۋرستىڭ ءبىرىنشى كۇنگى قورىتىندىسى بويىنشا ءانشى 70 بالدىڭ 69-ىن جينادى. وتانداسىمىز قاتىسۋشىلاردان وق بويى وزىق شىعىپ, ءبىرىنشى ورىننان كورىندى.
ەرنازار ۇدايى شەبەرلىگىن شىڭداپ, قابىلەتىن ارتتىرىپ كەلەدى. ول الماتىداعى ەسترادالىق-سيمفونيالىق وركەستردە ونەر كورسەتەدى. ديسنەي كومپانياسىنىڭ «جۇلدىزدار شەرۋى» جانە «بولاشاق» قوعامدىق قورىنىڭ بىرەگەي بىرلەسكەن جوباسىنا قاتىستى. جوبادا ونەرپاز «سۇلۋ مەن قۇبىجىق» ءفيلمىنىڭ كەيىپكەرلەرىن قازاق تىلىندە سويلەتتى.
ايتا كەتەيىك, بۇل – ەرنازار جۇباننىڭ العاشقى جەڭىسى ەمەس. 2017 جىلى ول دەلفي ويىندارىندا جانە حالىقارالىق «نا كرىلياح مۋزىكي» بايقاۋىندا ءبىرىنشى ورىننان كورىندى. 2018 جىلى «جاس قىران» دارىندى ستۋدەنتتەر تىزىمىنە ەندى. 2020 جىلى «ح Factor» جوباسىنىڭ ءفيناليسى اتانىپ, «ساراندەۆ» حالىقارالىق ۆوكال كونكۋرسىنىڭ جەڭىمپازى بولدى. 2021 جىلى رۋمىنياداعى «XVI – George GRIGORIU» حالىقارالىق بايقاۋىندا قازاقستان اتىنان قاتىسىپ, جەڭىمپاز اتاندى. 2021 جىلى «قازاقستان داۋىسى» جوباسىنىڭ شيرەك فينالىنا شىقتى.
ونەر جولىندا جارقىراي شىققان جاس جۇلدىزدىڭ شىعارماشىلىعىنا تابىس تىلەيمىز.