ەلورداداعى بەيبىتشىلىك جانە كەلىسىم سارايىندا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ بۇۇ-نىڭ بەيبىت جينالىستار جانە اسسوتسياتسيالار قۇقىعى ماسەلەلەرى جونىندەگى ارنايى بايانداماشىسى ماينا كيايمەن كەزدەستى.
كەزدەسۋگە, سونداي-اق, قازاقستان پارلامەنتى ءماجىلىسىنىڭ دەپۋتاتتارى ەگور كاپپەل مەن يۋري تيموششەنكو, قازاقستان پرەزيدەنتى جانىنداعى «قوعامدىق كەلىسىم» رمم-ءنىڭ ديرەكتورى ناتاليا كالاشنيكوۆا, ورتالىق ازيا ايماعىنداعى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ مەڭگەرۋشىسى ايگۇل سادۋاقاسوۆا قاتىستى.
باسقوسۋ بارىسىندا بۇۇ-نىڭ ارنايى بايانداماشىسىنا ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق مودەلى تانىستىرىلدى. ەرالى توعجانوۆ ءوز سوزىندە ماينا كيايگە قحا-نىڭ قۇرىلۋ تاريحى, كونستيتۋتسيالىق مارتەبەسى, ونىڭ مىندەتتەرى مەن ەتنوسارالىق تولەرانتتىلىق پەن قوعامدىق كەلىسىمدى نىعايتۋ بويىنشا اتقارىپ وتىرعان جۇمىستارى, قحا اتىنان سايلانعان دەپۋتاتتاردىڭ قىزمەتتەرى, اسسامبلەيانىڭ حالىقارالىق ىنتىماقتاستىقتاعى ءرولى تۋراسىندا جان-جاقتى ايتىپ بەردى.
«قحا 1995 جىلى قۇرىلدى. ونىڭ توراعاسى – مەملەكەت باسشىسى نۇرسۇلتان نازارباەۆ. ونىڭ 3 ورىنباسارى بار. اسسامبلەيانىڭ قۇرامىنا ەلىمىزدە تۇراتىن بارلىق ەتنوستىق توپتار كىرەدى. ولار – 130-دان استام ەتنوس پەن 17 كونفەسسيانىڭ وكىلدەرى. اسسامبلەيا – كونستيتۋتسيالىق ورگان. ونىڭ بارلىق شەشىمدەرىن بارلىق مەملەكەتتىك ورگاندار مىندەتتى تۇردە قابىلداۋى ءتيىس. ال, نەگىزىنەن, ەڭ جوعارى شەشىم پرەزيدەنت قاتىساتىن اسسامبلەيا سەسسيالارىندا قابىلدانادى. بۇعان قوسا, قحا-نىڭ ءاردايىم تۇراقتى تۇردە قىزمەت ەتەتىن كەڭەسى بار. ونىڭ قابىلداعان شەشىمدەرى دە ماڭىزدى. قازاقستاننىڭ قوعامدىق كەلىسىم مودەلى بۇۇ-دا باس حاتشى پان گي مۋننىڭ قاتىسۋىمەن تانىستىرىلدى. بۇدان بۇرىن پان گي مۋن ەلىمىزگە جاساعان ساپارى بارىسىندا قازاقستان حالقى اسسامبلەياسىنىڭ جۇمىسىمەن كەڭىنەن تانىسىپ, اسسامبلەيانىڭ قاعيداتتارى بۇۇ-نىڭ قاعيداتتارىنا تولىعىمەن ساي كەلەتىنى جونىندە مالىمدەگەن ەدى», دەدى ءوز سوزىندە ە.توعجانوۆ.
سونداي-اق, ول بۇگىندە بارلىق ەتنوستىق توپتاردىڭ وكىلدەرى بىرىڭعاي جانە تەڭ ازاماتتىق-قۇقىقتىق جانە قوعامدىق ءمارتەبەگە يە ەكەندىگىن جەتكىزدى. «قازىرگى تاڭدا قازاقستاندا 800-دەن استام ەتنومادەني بىرلەستىك جۇمىس ىستەيدى. ولار وتكەن جىلى 11 مىڭنان استام ءىس-شارا وتكىزدى. جالپى العاندا, قازاقستانداعى ەتنوستىق توپتاردىڭ قۇقىقتارى تولىقتاي قامتاماسىز ەتىلگەن», دەدى بۇل ورايدا اسسامبلەيانىڭ حاتشىلىق مەڭگەرۋشىسى.
ماينا كياي ءوز كەزەگىندە ادام قۇقىقتارى جونىندەگى ءماسەلەلەر ءاردايىم ءوزىنىڭ تىكەلەي وكىلەتتىلىگىنە جاتاتىندىقتان, نازاردا تۇراتىنىن جەتكىزدى. سونداي-اق, ول قازاقستانداعى ەتنومادەني بىرلەستىكتەردىڭ قاي كەزدە جانە قالاي قۇرىلعانىنا, ولاردىڭ الدىندا تۇرعان مىندەتتەرىنە, قحا اتىنان سايلاناتىن دەپۋتاتتاردى كىم انىقتايتىنى جونىندە ءوزىن قىزىقتىرعان ساۋالدارىن قويدى.
ءلايلا ەدىلقىزى,
«ەگەمەن قازاقستان».