اقتاۋ. 26 ءساۋىر. ماڭعىستاۋدا سايلاۋشىلار ەرەكشە بەلسەندىلىك تانىتۋدا. ءتىپتى سوڭعى ءتورت ساعاتتا داۋىس بەرۋشىلەر سانى ەكى ەسەدەن ارتتى. كەيبىر سايلاۋ ۋچاسكەلەرىندە تىركەلگەن سايلاۋشىلار تولىعىمەن داۋىس بەرگەن. سول سەبەپتى, اتالعان ۋچاسكەلەردە داۋىس بەرۋ اياقتالدى. بۇل تۋرالى egemen.kz ءتىلشىسى حابارلادى.
ماڭعىستاۋ وبلىستىق سايلاۋ كوميسسياسىنىڭ حابارلاۋىنشا, ماڭعىستاۋدا تۇسكى ساعات 12:00-گە دەيىن 107 547 ادام داۋىس بەرگەن. ال ارادا ءتورت ساعات ۋاقىت وتكەندە بۇل كورسەتكىش 240 026 ادامعا جەتتى. بۇل وبلىستاعى بارلىق سايلاۋشىلاردىڭ 76,15 پايىزىن قۇرايدى. ياعني, ماڭعىستاۋ وبلىسىندا ءتورت ساعات ىشىندە داۋىس بەرۋ كورسەتىشى 34,12 پايىزدان 76,15 پايىزعا جەتكەندىگىن بىلدىرەدى.
تۇسكى ساعات 12:00-دەن 16:00-گە دەيىنگى ءتورت ساعات ىشىندە, داۋىس بەرۋ كورسەتكىشى اقتاۋ قالاسىندا 32,42 پايىزدان 76,06 پايىزعا, جاڭاوزەن قالاسىندا 33,31 پايىزدان 76,07 پايىزعا, بەينەۋ اۋدانىندا 37,26 پايىزدان 76,19 پايىزعا, قاراقيا اۋدانىندا 37,54 پايىزدان 76,31 پايىزعا, ماڭعىستاۋ اۋدانىندا 35,09 پايىزدان 76,19 پايىزعا, مۇنايلى اۋدانىندا 34,96 پايىزدان 76,28 پايىزعا ارتقان. ال تۇپقاراعان اۋدانىنىڭ تۇرعىندارى قازىرگە دەيىن 76,28 پايىزعا داۋىس بەرىپ ۇلگەرگەن.
ءتيىستى ورىنداردىڭ حابارلاۋىنشا, وسى ۋاقىت ىشىندە سايلاۋ ۋچاسكەلەرىندە زاڭ بۇزۋشىلىقتار تىركەلمەگەن جانە اسكەري بولىمدەردە, ۋاقىتشا تەرگەۋ اباقتىلارىندا, سونداي-اق, اۋرۋحانالاردا, اۋداندارداعى بىرقاتار سايلاۋ ۋچاسكەلەرىندە داۋىس بەرۋ اياقتالعان.
گۇلايىم شىنتەمىرقىزى.
دەرەك: egemen.kz.
سۋرەت: سەرىك مايەمەروۆ.