ءتۇرلى مۋزىكالىق اسپاپتا ويناۋدى مەڭگەرگەن ونەرلى جاندار از ەمەس. ال ابزال سيعۋاتوللا ۇلى – ناعىز ونەرلى جىگىت. ويتكەنى ول ءبىر ەمەس, جيىرما اسپاپتا وينايدى.
ءوزىنىڭ ايتۋىنشا, بالا كەزىنەن مۋزىكالىق اسپاپتاردا ويناۋعا قىزىققان ەكەن. اكەسى ۇلىنىڭ ونەرلى بولعانىن قالاپ, ىنتاسىن وياتقان. وبلىس ورتالىعىنان شالعاي ورنالاسقان قىزىلقوعا اۋدانىنىڭ جاسقايرات اۋلىنداعى مەكتەپ, كلۋب ساحناسىندا ءان ايتىپ, دومبىرا شەرتكەن ۇلىنىڭ ونەرىن ۇشتاۋدى كوزدەپ, اتىراۋ قالاسىنا قونىس اۋدارعان.
«مۇنايلى شاھارداعى ن.تىلەنديەۆ اتىنداعى دارىندى بالالارعا ارنالعان اكادەميادا ۆوكال, پيانينو سىنىبىندا وقىدىم. جوعارى ءبىلىمدى ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ونەر فاكۋلتەتىنەن الىپ شىقتىم. بىراق ءبىلىمىمدى جەتىلدىرۋدى كوزدەپ, قۇرمانعازى اتىنداعى قازاق ۇلتتىق كونسەرۆاتورياسىندا اكادەميالىق ۇتقىرلىق باعدارلاماسىمەن وقۋىمدى جالعاستىردىم», دەيدى ا.سيعۋاتوللا ۇلى.
«جىگىتكە جەتى ونەر دە از...» دەيتىن ءتامسىلدى ۇستاناتىن ونەرپاز ستۋدەنتتىك كەزەڭىن تەككە وتكىزگەن جوق. مۋزىكالىق اسپاپتاردىڭ بىرىنەن سوڭ بىرىندە ويناۋدى مەڭگەردى. ءار اسپاپتىڭ تاريحىن, جاسالۋ جولىن جەتىك بىلەدى. قازىر جيىرما ءتۇرلى اسپاپتا ەركىن وينايدى. قازاقتىڭ ۇلتتىق مۇراسى – دومبىرانىڭ قوس ىشەگىنەن كۇمبىرلەتە كۇي توگەدى. قىلقوبىزبەن قورقىت داۋىرىنەن جەتكەن ۇلى دالا سازىن سىزىلتادى. سىرنايمەن سىرلى اۋەندەردى اۋەلەتەدى. پيانينومەن كلاسسيكالىق مۋزىكالاردى ناقىشىنا كەلتىرە ورىندايدى. گيتارا, بايان, تاعىسىن تاعى. «العاشقىدا دومبىرا تارتۋدى ۇيرەنگەن ەدىم. بىراق تەك ءبىر اسپاپپەن شەكتەلگىم كەلمەدى. ونەر جولىن تاڭداعان سوڭ بىرنەشە اسپاپتا ويناعاندى ءجون كوردىم. سول ماقساتىما جاقىنداپ كەلەمىن. ويتكەنى ءالى دە بىرنەشە اسپاپتا ويناۋدى كوزدەپ ءجۇرمىن», دەيدى ا.سيعۋاتوللا ۇلى.
كەز كەلگەن اسپاپتى قولىنا السا, ون ساۋساعىنان ساز توگىلەتىن ونەرلى جىگىت د.نۇرپەيىسوۆا اتىنداعى اكادەميالىق قازاق حالىق اسپاپتار وركەسترى جانىنداعى «سارماد» ەتنو-فولكلورلىق انسامبلىندە جۇمىس ىستەيدى. سونىمەن بىرگە DD RECORDS توبىنىڭ قۇرامىندا ونەر كورسەتىپ ءجۇر.
اتىراۋ وبلىسى