«Asyl qala» كاسىپورنى – ورتالىق ازياداعى بىردەن-ءبىر باسەكەگە قابىلەتتى ءوندىرىس ورنى. استاناداعى №1 يندۋستريالىق پاركتە ورنالاسقان زاۋىتتا توسەمتاس پەن جول جيەگىنە ارنالعان بورديۋر ونىمدەرى شىعارىلادى. كاسىپورىندا 70-تەن اسا ادام جۇمىس ىستەيدى.
بيىل جىل باسىندا قۇرىلعان كاسىپورىن قۇرىلىسىنا 9 ملرد تەڭگە قارجى جۇمسالىپتى. 11 مىڭ شارشى مەتر جەردى الىپ جاتقان ءوندىرىس الاڭىنىڭ باستى ماقساتى – جول قۇرىلىسىنا, سونىڭ ىشىندە جاياۋ جۇرگىنشىلەر جولىنا قاجەتتى ءونىم تۇرلەرىن دايىنداۋ. سونىمەن قاتار كاسىپورىن ءوز ونىمدەرىن ساقتايتىن قويما دا تۇرعىزعان.
«Asyl qala» برەندتىك توسەمتاس قۇيۋمەن اينالىسادى. جوبا ەكى كەزەڭنەن تۇرادى. ءبىرىنشى جوبا بويىنشا ءوندىرىس ورنى «دامۋ» قورى جانە «Halyk Bank» ارقىلى قارجىلاندىرىلدى. قازىر تاپسىرىسقا بايلانىستى اۋىسىم سانىن كوبەيتۋ ويىمىزدا بار. ەگەر ءۇش اۋىسىممەن جۇمىس ىستەيتىن بولساق, وندا تاعى 90 جۇمىسشى قاجەت. زاۋىتىمىز ەركىن ەكونوميكالىق ايماقتا ورنالاسقان سوڭ مەملەكەتتەن دە كومەك بولىپ وتىر, مىسالى, سالىق جاعىنان جەڭىلدىكپەن قولداۋ كورسەتىپ كەلەدى. بۇل زاۋىت جۇمىسىنىڭ ىلگەرىلەۋىنە ۇلكەن سەپتىگىن تيگىزدى. ەكىنشىدەن, جاقىن ارادا جوبانىڭ كەلەسى كەزەڭى جۇزەگە اسپاق. ياعني ەكىنشى زاۋىتتى ىسكە قوسامىز. ول كەزدە 170 ادام جۇمىسپەن قامتىلادى. دەمەك الداعى 1-2 جىلدا زاۋىت قۋاتتىلىعى ەكى ەسە ارتادى», دەيدى كاسىپورىن باسشىسى جاقسىلىق ەسەنتەمىروۆ.
كاسىپورىندا ىستەيتىن جۇمىسشىلارعا بارلىق جاعداي جاسالعان. اۋىسىم سايىن جۋىناتىن بولمە, تازالىق ماسەلەسى, ارنايى كيىم قارالعان. سونداي-اق قالا ورتالىعىنان كەلۋشىلەرگە تاسىمال كولىگى ءجۇرىپ تۇر.
20 ءتۇستى ءارى ءبىر-بىرىنە ۇقسامايتىن 25 پىشىنمەن 500 ءتۇرلى ۇلگىدە توسەمتاس قۇياتىن زاۋىت ونىمىنە سۇرانىس جوعارى. باسشىلىق ءوز مۇمكىندىگىن كەڭەيتۋدى ويلاستىرىپ وتىر. ءارى تۇتىنۋشى سۇرانىسىنا وراي, قانداي ءتۇستى توسەمتاس قاجەت بولسا, ونى دا ورىندايدى. جىل سوڭىنا دەيىن تاعى بىرنەشە ءتۇرلى پىشىندە توسەمتاس شىعارىپ, نارىققا وتكىزۋدى جوسپارلاعان.
ء«ونىم كولەمى – تاۋلىگىنە 5 مىڭ شارشى مەتر. زاۋىتتا توسەمتاستان بولەك, كوشە جولدارى مەن تروتۋار جيەگىنە ارنالعان بورديۋر دە قۇيىلادى. وتاندىق ءونىم بولعان سوڭ ساپاعا ءجىتى كوڭىل بولەمىز. ءار ءونىمنىڭ جارامدىلىق مەرزىمى 4 جىلعا ەسەپتەلگەن. راس, ءونىم باعاسى تۇتىنۋشىعا قىمبات بولىپ كورىنۋى مۇمكىن. بىراق ساپانى العا قويعان ءبىزدىڭ كاسىپورىن ءوز ءونىمىنىڭ ۇزاق مەرزىمگە شىدايتىنىنا كەپىلدىك بەرەدى. ال ارزان ءارى ساپاسىز ءونىم شىعارسا, وندا زاۋىت جۇمىسى بىردەن قۇلدىرايدى ەمەس پە؟ ويتكەنى ەلىمىزدەگى قۇرىلىس سالاسىندا قىرۋار جۇمىس ءجۇرىپ جاتىر. زاۋىتقا زاماناۋي ۇلگىدەگى جابدىقتاردى الدىرتقانبىز. جۇمىس تولىق اۆتوماتتاندىرىلعان. قازىر كاسىپورىننىڭ 80%-ى وندىرىستىك قۋاتقا يە. بىراق الداعى ۋاقىتتا جۇمىس قارقىنى ۇدەي تۇسەدى», دەيدى كاسىپورىن ديرەكتورى.
ايتۋىنشا, بارلىق ءونىم نارىققا شىقپاس بۇرىن ارنايى كاسىپورىن زەرتحاناسىندا ءبىر اي بويى سىناقتان وتەدى. وڭ قورىتىندى بەرىلگەن سوڭ عانا ءوندىرىس تسەحىنا جىبەرىلىپ, قۇيىلا باستايدى. سونداي-اق زاۋىتقا قاجەتتى شيكىزات كوزى – ءوز ەلىمىزدىكى. ياعني قۇم مەن تسەمەنت جانە باسقا قوسپالار سىرتتان كەلمەيدى. بۇل دا اقشانىڭ سىرتقا كەتپەي, ىشكى قارجى اينالىمىنا ءوز سەپتىگىن تيگىزەرى ايدان انىق.
تۇتىنۋشىلار دەمەكشى, برەندتىك توسەمتاس پەن بورديۋرگە كوبىنە-كوپ استانا قالاسىنداعى قۇرىلىس كومپانيالارى تاپسىرىس بەرەدى. سونىمەن قاتار وڭىرلەردەن دە الۋشىلار جوق ەمەس. مىسالى, سەمەي قالاسى زاۋىت ءونىمىن كوپتەن ساتىپ الىپ كەلەدى. سونداي-اق تۋريستەر كوپ اعىلاتىن اقمولا وبلىسىنداعى بۋراباي اۋدانىنا دا ءتۇرلى توسەمتاس جىبەرىلىپ جاتىر. ۇلىتاۋ وبلىسىنىڭ ورتالىعى – جەزقازعانداعى قۇرىلىسقا دا وسى كاسىپورىن ءونىمى جونەلتىلگەن. پەتروپاۆلدا سالىنىپ جاتقان تەننيس ورتالىعىنا دا زاۋىت ءونىمى پايدالانىلعان.