شىمكەنتتە العاش رەت ينۆەستيتسيالىق جوبالاردىڭ ينتەراكتيۆتى كارتاسى ىسكە قوسىلدى. جوبا وڭىرلىك كاسىپكەرلەر پالاتاسىندا تانىستىرىلدى. سالتاناتتى ءىس-شارا «اتامەكەن» ۇلتتىق كاسىپكەرلەر پالاتاسىنىڭ باسقارما مۇشەسى, باسقارما توراعاسىنىڭ ورىنباسارى تيمۋر ناقىپبەكوۆتىڭ, قالا اكىمىنىڭ ورىنباسارى ايدىن كارىموۆتىڭ, قالا پروكۋرورىنىڭ ءبىرىنشى ورىنباسارى جومارت نۇرعالي ۇلى مەن وڭىرلىك كەڭەس مۇشەلەرىنىڭ قاتىسۋىمەن ءوتتى.
بۇل ينتەراكتيۆتى كارتا ينۆەستيتسيالىق جوبالاردى جۇزەگە اسىرۋ بارىسىندا live-رەجىمىندە مونيتورينگ جاساۋعا, باقىلاپ وتىرۋعا, سونداي-اق ونىڭ ىشكى مازمۇنى مەن دامۋ ساتىلارىن ناقتى تۇسىنۋگە مۇمكىندىك بەرەدى.«ينتەراكتيۆتى كارتانىڭ كومەگىمەن ەندى ءار ينۆەستيتسيالىق جوبانىڭ قالاي كەزەڭ-كەزەڭىمەن جۇزەگە اسىپ جاتقانىن كورۋگە بولادى. ەگەر قاجەت بولىپ جاتسا, ءتۇرلى دەڭگەيدەگى مەملەكەتتىك ورگاندار وكىلدەرى دە كارتامەن تانىسىپ, ونداعى تۇيتكىلدى تۇستاردى انىقتاپ, ولاردىڭ شەشۋ جولدارىن كورسەتىپ بەرە الادى», دەدى تيمۋر ناقىپبەكوۆ.
ءوز كەزەگىندە قالا اكىمىنىڭ ورىنباسارى ا.كارىموۆ شىمكەنت كاسىپكەرلىك سالا ءۇشىن وتە قولايلى شاھار ەكەنىن ايتىپ, وسىنىڭ ءوزى ينۆەستورلاردى تارتۋعا سەپ بولاتىنىن اتاپ ءوتتى.
«ينۆەستورلاردى شاقىرىپ قانا قويماي, جوبالاردىڭ ءساتتى جۇزەگە اسىپ كەتۋىنە قولداۋ كورسەتۋ مەن سۇيەمەلدەۋدى ماقسات تۇتىپ وتىرمىز. مىناۋ ينۆەستيتسيالىق جوبالاردىڭ كارتاسى – سونىڭ ءبىر دالەلى. الەۋەتى كۇشتى جوبالار كاسىپكەرلەرمەن قاتار جەرگىلىكتى اتقارۋشى ورگاندار ءۇشىن دە بىردەي ماڭىزدى. قۇدايعا شۇكىر, مەگاپوليستە ينۆەستيتسيالىق جوبالار سانى كۇن سايىن ارتىپ كەلەدى. سوندىقتان ولارعا دەر كەزىندە قولداۋ كورسەتۋدى اسا ماڭىزدى شارۋا دەپ بىلەمىز», دەدى اكىمنىڭ ورىنباسارى.
جيىن بارىسىندا بيزنەس وكىلدەرى ينتەراكتيۆتى كارتاعا الداعى ۋاقىتتا ەلدە جۇزەگە اسىرىلىپ جاتقان ءىرى جوبالاردى دا ەنگىزۋگە بولاتىنىن اتاپ ءوتتى.
سونداي-اق شىمكەنت قالاسى پروكۋرورىنىڭ ورىنباسارى ج.نۇرعالي ۇلى سۇحباتىندا ينۆەستيتسيالىق جوبالاردى سۇيەمەلدەۋ باسىم باعىتتاردىڭ ءبىرى ەكەنىنە توقتالدى.
«اتالعان جاڭا جوبا – كاسىپكەرلىكتى قولداۋدىڭ ءبىر تەتىگى. وسى ورايدا كارتادا كورسەتىلگەن مالىمەتتەر پروكۋراتۋرانىڭ بيزنەستى قورعاۋداعى قىزمەتىنە وڭ اسەرىن تيگىزەدى دەپ سەنەمىز. ەندىگى ۇسىنىسىمىز – ءاربىر ينۆەستور مەن كاسىپكەر ينتەراكتيۆتى كارتاعا مالىمەتتەردى ساپالى تۇردە ءارى دەر كەزىندە ەنگىزسە ەكەن, سوندا جۇمىس تا قولايلى اتقارىلادى دەگەن ويدامىز», دەدى ول.
ايتا كەتۋ كەرەك, بۇگىنگى تاڭدا ينۆەستيتسيالىق جوبالاردىڭ جالپىۇلتتىق بىرەگەي پۋلىنىڭ تىزىمىنە شىمكەنت قالاسىنان جالپى سوماسى 443 ملرد 56 ملن تەڭگەنى قۇرايتىن 59 جوبا ەنگەن.
سونىمەن قاتار رەسمي ءىس-شارادا «اتامەكەن» ۇلتتىق كاسىپكەرلەر پالاتاسى, جەرگىلىكتى اتقارۋشى بيلىك پەن پروكۋراتۋرا اراسىنداعى ءوزارا ىنتىماقتاستىق تۋرالى مەموراندۋمعا قول قويىلدى. تاراپتار بۇل ۇشجاقتى كەلىسىمنىڭ ماقساتى ينۆەستيتسيالىق كارتا اياسىندا كاسىپكەرلەرگە قولداۋ كورسەتۋمەن بىرگە ونىڭ بەلسەندى تۇردە قولدانىسقا ەنۋىن قامتاماسىز ەتۋدى كوزدەيتىندەرىن ايتادى.