جامبىل وبلىسى, شۋ اۋدانىنداعى شاتىرقۇل كەن ورنىنا جاقىن ماڭدا ان-2 ۇشاعى اپاتقا ۇشىرادى. وقيعا الدىڭعى كۇنى كۇندىزگى ساعات 15-تەن اسا ورىن العان. ۇشاق قاراعاندى وبلىسى جاعىنان ۇشىپ كەلە جاتقان ەكەن. اۋە كولىگى قاراعاندى وبلىسىنداعى «وليمپ ەير» جشس-گە تيەسىلى ەكەنى انىقتالدى. ۇشاق بورتىندا جەتى ادام بولعان, ۇشەۋى ەكيپاج مۇشەلەرى, قالعان تورتەۋى شاتىركول كەن ورنىنا كەلە جاتقان «قازاقمىستىڭ» جۇمىسشىلارى.
بىرقاتار الەۋمەتتىك جەلىلەردە ۇشاقتاعى ەكيپاج مۇشەلەرى دە, جولاۋشىلار دا تۇگەل قايتىس بولعانى تۋرالى اقپارات تاراعان بولاتىن. بىراق جامبىل وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى جونىندەگى وكىلى ەكاتەرينا كاليتكينا ۇشاقتاعى جەتى ادامنىڭ بىرەۋى شۋ اۋداندىق اۋرۋحاناسىنا وتە اۋىر جاعدايدا جەتكىزىلگەنىن ايتتى. كەشە ۇشاقتىڭ اپاتقا ۇشىراۋىنان زارداپ شەككەن «بالقاشتۇستىمەت» ءوندىرىستىك بىرلەستىگىنىڭ باس گەولوگى ا.شاياحمەتوۆا ەسىن جيدى. ازىرگە دارىگەرلەر قىزدىڭ جاعدايى قالىپتى, بىراق ءالى دە اۋىر دەگەن باعا بەرىپ وتىر. قىزدىڭ جامباسى مەن جىلىنشىگى سىنعان جانە كوپ قان جوعالتىپتى. ءدارىگەرلەر وعان ەكى وپەراتسيا جاسالاتىنىن ايتادى. ازىرگە شۋعا استانادان دارىگەرلەر كەلدى. «شاياحمەتوۆانىڭ ەكى اياعىندا دا اشىق جانە جابىق جاراقاتتار بار. ميىنىڭ شايقالۋىنا بايلانىستى اۋرۋحاناعا وتە اۋىر جاعدايدا ءتۇستى. بارلىق ەم شارالار جۇرگىزىلدى. جاعدايى ءالى دە اۋىر, بىراق تۇراقتى» دەيدى بۇل جونىندە شۋ اۋداندىق اۋرۋحاناسىنىڭ دارىگەر رەانيماتولوگى بانۋ سپانقۇلوۆا.
ۇشاق بورتىنداعى «قازاقمىس» كومپانياسىنىڭ ءۇش قىزمەتكەرى: تەحنيكالىق دامۋ دەپارتامەنتىنىڭ ديرەكتورى گ.تولەۋباەۆ, «بالقاشتۇستىمەت» وندىرىستىك بىرلەستىگىنىڭ باس مەحانيگى ە.ىبىراەۆ جانە وسى بىرلەستىكتىڭ تەحنيكالىق جانە ينۆەستيتسيالىق جوسپارلاۋ ءبولىمىنىڭ باسشىسى ۋ.ەسماعامبەتوۆا, سونىمەن قاتار, ان-2 ۇشاعىنىڭ كومانديرى گ.كليۋشەۆ, ەكىنشى ۇشقىش ۆ.ساۆەلەۆ جانە بورت-مەحانيك ۆ.ليتۆينوۆ قازا تاپتى.
ۇشاقتىڭ اپاتقا ۇشىراۋىنا سول كۇنگى تۇمان سەبەپ بولۋى ءمۇمكىن دەيدى ماماندار. ويتكەنى, قالىڭ تۇماننان اۋە كەمەسى كورۋ قاشىقتىعى تومەن جاعدايدا قونۋعا ارەكەت جاساعان. وقيعانى تەرگەۋ ءۇشىن ارنايى كوميسسيا قۇرىلدى.
ورالحان ءداۋىت,
«ەگەمەن قازاقستان».
جامبىل وبلىسى,
شۋ اۋدانى.