كۇنى كەشە عانا ەل استاناسىندا Mega Silk Way ورتالىعىندا «Shulamah» ءفيلمىنىڭ جابىق كورسەتىلىمى ءوتتى. اتالعان تۋىندى مۋزىكالىق دراما جانرىندا تۇسىرىلگەن. فيلم مادەنيەت جانە اقپارات مينيسترلىگىنىڭ تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» كەاق جانە Golden Man Media قولداۋىمەن جارىققا شىعىپ وتىر.
ايتا كەتسەك, «ۇلتتىق كينونى قولداۋ ورتالىعى» ۇلتتىق يدەولوگيا مەن پاتريوتيزم رۋحىن ناسيحاتتايتىن كينوكارتينالارعا دەمەۋ كورسەتىپ كەلەدى. اتالعان فيلم ەلىمىزدىڭ مۋزىكا سالاسىنداعى پروگرەسسيۆتى جاستاردىڭ كوزقاراسىن باياندايدى. ەلىمىزدە تالانتتى جاستار كوپ, بۇل رەتتە كينو ورتالىعى ونەرلى ورەندەردى قولداپ, كرەاتيۆتى يندۋستريانى دامىتۋعا ۇلەس قوسىپ جاتقانى ءمالىم.
بۇدان بولەك, مەملەكەت تاراپىنان اتالعان ماسەلەگە ەرەكشە كوڭىل ءبولىنىپ كەلەدى. سونىڭ ناتيجەسىندە وتاندىق كينويندۋستريا جاڭا دا جاسامپاز جولىن قالىپتاستىرىپ جاتىر. اتاپ ايتساق, 2023 جىلدىڭ وزىندە 18 ۇلتتىق فيلم ءتۇسىرىلدى, سونداي-اق بىلتىر جىل سوڭىندا تاعى 18 كينوجوبا ىرىكتەلىپ, وندىرىسكە جىبەرىلدى.
«بيىلدان باستاپ كينوگەرلەردىڭ ۇسىنىسى ەسكەرىلىپ, ۇلتتىق كينونى قولداۋ ورتالىعىنىڭ كينوجوبالاردى ىرىكتەۋ كونكۋرسىنا وزگەرىس ەنگىزىلدى. ساراپتاپ قاراساق, بيىلعى كونكۋرسقا ءبىرشاما ءوتىنىم كەلىپ تۇسكەن. انيماتسيا, دەرەكتى, ويىن فيلمدەرى ساناتى بويىنشا 465 ءوتىنىم تىركەلگەن. وسىلايشا, 101 ستسەناري كەلەسى كەزەڭگە جولداندى, ال ەكىنشى كەزەڭدە 87 جوبا ىرىكتەلدى. 18-20 ماۋسىم كۇندەرى ارالىعىندا پيتچينگ ءوتتى. ساراپتاما كەڭەسىنىڭ مۇشەلەرى ۇلتتىق كينوعا سۇبەلى ۇلەس قوساتىن كينوكارتينالاردى ىرىكتەۋگە بار كۇش-جىگەرىن سالدى. ال مەملەكەت كينەماتوگرافيا سالاسىنا تۇراقتى قولداۋ كورسەتۋدى جالعاستىرا بەرمەك», دەيدى ۇلتتىق كينونى قولداۋ ورتالىعىنىڭ ءباسپاسوز قىزمەتى.
ايتا كەتۋ كەرەك, «Shulamah» ءفيلمىنىڭ رەجيسسەرى ايتورە جولداسقالي «Sheker» سەريالىمەن تانىمال, ال يگور تسايدى گولليۆۋدتاعى جوبالارى ارقىلى كوپشىلىك بىلەدى. فيلم سيۋجەتى رەپەر بولۋدى ارماندايتىن ءۇش دوستىڭ اينالاسىندا ءوربيدى. ولار «سۋلا» ەسىمدى پروديۋسەرمەن بەتپە-بەت كەلگەندە, جەتىستىككە جەتۋ جولىندا قيىندىقتاردى ەڭسەرۋ قاجەتىن تۇسىنەدى. دارىندى اكتەرلەردىڭ, سونىڭ ىشىندە دەمەۋ اتىمتاەۆ, دوسان كەنشىمباەۆ پەن الماز مەرجاقىپوۆتىڭ, سونداي-اق تانىمال مۋزىكالىق پروديۋسەرلەر مەن ورىنداۋشىلاردىڭ قاتىسۋىمەن «Shulamah» كورەرمەندەردى ءوزىنىڭ اتموسفەراسىمەن تاڭعالدىرادى.
«جوبا پروديۋسەرلەرى باستى كەيىپكەرلەردىڭ رولىنە كاسىبي اكتەرلەردى تارتۋعا ەمەس, كاستينگ وتكىزۋگە دەن قويدى. وسىلايشا, ەلىمىزدىڭ تۇكپىر-تۇكپىرىنەن 300-گە جۋىق ءوتىنىم كەلىپ ءتۇستى, بىراق تاڭداۋ دەمەۋ اتىمتاەۆقا, دوسان كەنشىمباەۆقا, الماز مەرجاقىپوۆقا ءتۇستى. سونداي-اق فيلمگە مۋزىكالىق پروديۋسەرلەر مەن ايگىلى ورىنداۋشىلار, سونىڭ ىشىندە: HIRO, VSXV Prince, Shiza اتسالىستى. سونىمەن قاتار ەپيزودتاردا كورەرمەندەر Say Moنى جانە بىرقاتار بلوگەردى كورەدى», دەپ اتاپ ءوتتى شىعارماشىلىق توپ.
جاڭا تۋىندى 11 شىلدەدەن باستاپ ەلىمىزدىڭ بارلىق كينوتەاترلارىندا كورسەتىلە باستايدى. ال 12 شىلدەدە مۋزىكالىق البومنىڭ جارىققا شىعۋى جوسپارلانىپ وتىر.