اقتاۋ. 26 ءساۋىر. ماڭعىستاۋداعى ورتالىقتان شالعايدا جاتقان زاستاۆالار مەن تەڭىزشى شەكاراشىلار دا داۋىس بەردى. بۇل تۋرالى tumba.kz سايتىنا سىلتەمە جاساپ, egemen.kz ءتىلشىسى حابارلادى.
بۇگىن تاڭەرتەڭ ەرتە اقتاۋ تەڭىز پورتىنا كەلىپ توقتاعان «ساقشى» جانە «تاراز» كەمەلەرىنەن بىرنەشە كۇننەن بەرى اشىق تەڭىزدە جۇرگەن شەكاراشىلار ءتۇستى. كەمەدە سايلاۋ ورىنى جوق بولعاندىقتان, ولار پورتقا قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا قاتىسىپ, ءوز داۋىستارىن بەرۋ ءۇشىن ارنايى كەلدى. كەمەگە ۆاحتالىق كەزەكشىلەردى قالدىرىپ كەلگەن ولار جاعالاۋ كۇزەتى ايماقتىق باسقارماسىندا داۋىس بەرسە, كاسپي تەڭىزىنىڭ سولتۇستىك اۋماعىندا كەمەلەردە كەزەكشىلىك ەتىپ جۇرگەندەر باۋتينو كەنتىندە داۋىس بەرەدى.
جاعالاۋ كۇزەتى ايماقتىق باسقارماسىندا ورنالاسقان 2 201 سايلاۋ ۋچاسكەسىندە شەكاراشى اسكەريلەر ساپپەن كەلىپ, اسكەري تارتىپپەن تياناقتى تۇردە داۋىس بەرۋدە. «اسكەري تارتىپپەن ساقاداي ساي تۇرىپ, داۋىس بەرگەن شەكاراشىلاردىڭ سايلاۋ ۋچاسكەسىندە بىردە-ءبىر زاڭ بۇزۋشىلىق بولعان جوق», – دەيدى بايقاۋشى سابىرجان ابديەۆ.
اتالمىش ۋچاسكەدە ۇلتتىق قاۋىپسىزدىك كوميتەتى شەكارا قىزمەتى (ۇقك شق) «باتىس» جاعالاۋ كۇزەتى ايماقتىق باسقارماسىنىڭ 2 500 شەكاراشىلارى داۋىس بەرسە, بوگەت, ءۇستىرت سىندى الىس زاستاۆالارداعى اسكەريلەردىڭ داۋىس بەرۋى ءۇشىن ارنايى تىكۇشاقتار, ال قۇلالى مۇيىسىندەگى اسكەريلەر ءۇشىن كاتەرلەر جىبەرىلدى.
«ولاردىڭ بارلىعىندا دا «سايلاۋ تۋرالى زاڭعا» سايكەس, زاڭدىلىقتار ساقتالۋى ءۇشىن سايلاۋ كوميسسياسىنىڭ وكىلدەرى قاتىسۋدا», – دەيدى ۇقك شق «باتىس» جاعالاۋ كۇزەتى ايماقتىق باسقارماسى باسشىسىنىڭ ورىنباسارى ب.ورنەكەشوۆ.
ارالارىندا العاش رەت داۋىس بەرۋشى ماتروستار مەن مەرزىمدى اسكەري قىزمەتىن وتەۋشىلەر بار شەكاراشىلار ءۇشىن سايلاۋ كۇنى بىرقاتار سپورتتىق-مەرەكەلىك شارالار ۇيىمداستىرىلادى.
گۇلايىم شىنتەمىرقىزى.
دەرەك, سۋرەت: tumba.kz.