ارمانداعان وقۋىنا ءتۇسىپ, قولعا ديپلوم الۋ – ءاربىر جاستىڭ ومىردەگى باستى ماقساتى, ۇكىلەگەن ءۇمىتى. تاياۋ كۇندەرى ۇقك شەكارا اكادەمياسىنىڭ ءبىتىرۋشى تۇلەكتەرى وسىنداي شاتتىققا كەنەلىپ, جۇزدەرى بال-بۇل جاينادى.
اتالعان وقۋ ورنىن 200-دەي جاس بىتىرسە, ونىڭ ىشىندە 20-عا جۋىعى – حالىقارالىق كەلىسىمشارت بويىنشا ءبىلىم العان تاجىك ەلىنىڭ ازاماتتارى. عاسىرعا جۋىق تاريحى بار ءبىلىم ورداسىن 10 كۋرسانت ۇزدىك ديپلوممەن اياقتادى. سونىمەن قاتار شەكاراشى كۋرسانتتارمەن بىرگە 20-دان اسا ماگيسترانت وقۋلارىن ويداعىداي ءتامامدادى.
جاس وفيتسەرلەردى شىعارىپ سالۋ ءراسىمى شەكارا اكادەمياسى كۋرسانتتارىنىڭ قىزىعى مەن قيىندىعى قاتار جۇرەتىن اسكەري ءومىرى تۋرالى ساحنالىق قويىلىمنان باستالدى. ءوز ەلىنىڭ پاتريوتى بولۋ, وتانعا قىزمەت ەتۋ – ءار ازاماتتىڭ بورىشى. ازاماتتىق مىندەتىن ادال ورىنداپ, اسكەري ءومىردىڭ قيىن دا قىزىق جولىنا توزە بىلگەن ءاربىر كۋرسانت ەلىنىڭ ناعىز قورعانى شەكاراشى وفيتسەرگە اينالادى.
كوپتى تەبىرەنتكەن قويىلىمنان كەيىن جاس قىز-جىگىتتەردىڭ ۆالس بيىمەن جالعاسىپ, كۋرسانتتار ن.الداجۇمان, د.ىسقاق, د.دانەبەك ۇلى «شەكارا اكادەمياسى» ءانىن ناقىشىنا كەلتىرە ورىندادى. ءىس-شارا بارىسىندا قاڭتار وقيعاسىندا قازا تاپقان 3-وقۋ ديۆيزيوننىڭ كۋرسانتتارى داۋلەت جۇپاربەكوۆ, جايىق ءادىلحان, ءبىتىم مەيىرحانعا جانە شەكارا اكادەمياسىنىڭ ەرلىكپەن قازا تاپقان اسكەري قىزمەتشىلەرىنە قۇرمەت كورسەتىلدى.
تاعىلىمدى كەشتىڭ رەسمي بولىگىندە شەكارا اكادەمياسى باستىعىنىڭ ورىنباسارى, ۇلتتىق قاۋىپسىزدىك پولكوۆنيگى ج.قاراشەكەنوۆ ۇقك توراعاسىنىڭ جانە تاجىكستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ شەكارا اكادەمياسىنىڭ تۇلەكتەرىنە العاشقى «لەيتەنانت» اسكەري شەنىن تاعايىنداۋ تۋرالى بۇيرىقتارىن وقىدى. سودان كەيىن شەكارا اكادەمياسىنىڭ باسشىسى, گەنەرال-مايور پ.پوليۆانوۆ, سالتاناتتى راسىمگە كەلگەن قۇرمەتتى قوناقتار مەن وسى سالاعا سانالى عۇمىرىن ارناعان شەكاراشى وفيتسەرلەر ءبىتىرۋشى تۇلەكتەرگە ديپلومدارىن سالتاناتتى تۇردە تاپسىردى.
سالتاناتتى ءراسىم اياقتالعان سوڭ ءىس-شاراعا ارنايى قاتىسقان ۇلتتىق قاۋىپسىزدىك كوميتەتى توراعاسىنىڭ ورىنباسارى مارات قالقاباەۆ ءبىتىرۋشى تۇلەكتەردى العاشقى «لەيتەنانت» شەنىن الۋىمەن قۇتتىقتاپ, 200 كۋرسانت «ۋرا!» ۇرانىمەن كوك اسپان استىن قۇلاق تۇندىرا جاڭعىرتتى. بۇل ولاردىڭ وقۋلارىن امان-ەسەن اياقتاعانىن بىلدىرەتىن جۇرەكجاردى قۋانىشى بولاتىن. سودان كەيىن ساپتا تۇرعان كۋرسانتتار اسكەري وركەستردىڭ سۇيەمەلدەۋىمەن ەلىمىزدىڭ مەملەكەتتىك ءانۇرانىن ناقىشىنا كەلتىرە ورىندادى.
سالتاناتتى ءىس-شارادا ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى, گەنەرال-مايور ەرلان الداجۇمانوۆ ۇلكەن ومىرگە قانات قاققان جاس وفيتسەرلەردى ايتۋلى كەزەڭمەن قۇتتىقتادى.
ء«تورت جىل بويى ءبىلىم نارىمەن سۋسىنداپ, بۇگىندە ناعىز ەر ازاماتتارعا عانا ءتان ماماندىقتى يگەرىپ, ءوز ءىسىنىڭ كاسىبي مامانى اتاندىڭىزدار. سىزدەرگە جارقىن بولاشاق جانە اق جول تىلەيمىن! شەكارا اكادەمياسىندا العان بىلىمدەرىڭىز ەلىمىزدىڭ مەملەكەتتىك شەكاراسىن قىراعى كۇزەتۋگە ارنالماق. سىزدەر جاۋىنگەرلىك ءداستۇردى جالعاستىرىپ, شەكارا كۇزەتۋ جاۋاپكەرشىلىگىن الا وتىرىپ, شەكارا قىزمەتىنىڭ قاتارىنا قوسىلعالى وتىرسىزدار. سوندىقتان ارقاشاندا ەلىمىزدىڭ قاي ايماعىندا بولساڭىزدار دا, وزدەرىڭىزگە جۇكتەلگەن جاۋاپتى مىندەتتى ابىرويلى اتقارا بىلىڭىزدەر! وفيتسەر اتاعىنا كىر كەلتىرمەڭىزدار», دەدى ول.
ءىس-شارا بارىسىندا اتا-انالار اتىنان ءسوز العان ا.چاگانوۆا كۋرسانتتارعا ساپالى ءبىلىم مەن تاعىلىمدى تاربيە بەرگەن اسكەري ۇجىمعا العىسىن ءبىلدىرىپ, جۇرەكجاردى جىلى لەبىزىن جەتكىزدى. ال ءبىتىرۋشى تۇلەكتەردىڭ اتىنان سويلەگەن لەيتەنانت دىنمۇحاممەد دانەبەك ۇلى: «وسى وقۋ ورنىنا ەلدىڭ تۇكپىر-تۇكپىرىنەن جينالدىق. شەكارا قىزمەتىنىڭ قىر-سىرىنا قانىعىپ, جاڭا دوستار تاپتىق. ءبىر-ءبىرىمىزدى قولداپ, قيىن ساتتەردە ءبىر جاعادان باس, ءبىر جەڭنەن قول شىعارا بىلدىك. شەكارا اكادەمياسىنىڭ قۇندى تاجىريبەسى بولاشاقتا قىزمەتىمىزگە تىرەك بولماق. بىزگە ءبىلىم بەرىپ, وزدەرىنىڭ ومىرلىك باي تاجىريبەلەرىن بولىسكەن ۇستازدار قاۋىمىنا راحمەت ايتامىز», دەپ ىزگى تىلەگىن ارنادى.
جيىن سوڭىندا شەكارا اكادەمياسىنىڭ جاۋىنگەرلىك تۋىن الىپ شىققان تۋ ۇستاۋشى توپتى شىعارىپ سالعان كۋرسانتتار اسپانعا تيىننان شاشۋ شاشتى. قۇرمەتتى قوناقتار مەن اتا-انالار الدىنان سالتاناتتى شەرۋدى شەكارا اكادەمياسى باسشىسىنىڭ ءبىرىنشى ورىنباسارى, پولكوۆنيك ا.يسمايلوۆ, پولكوۆنيك ك.مۇحامەدجانوۆ, مايور د.اسەنوۆ, پولكوۆنيك ز.امبارتسۋميان, پولكوۆنيك ە.شاپوۆالوۆ, پولكوۆنيك م.بايسالباەۆ, پولكوۆنيك ا.ەرعاليەۆا, پودپولكوۆنيك ك.بەردىقۇلوۆ, پولكوۆنيك ا.نۇرلان, پودپولكوۆنيك د.نۇرعاليەۆ, اعا لەيتەنانت د.مۇقاتاەۆ باستاپ شىعىپ, شەكارا اكادەمياسىنىڭ وركەستر قىزمەتكەرى, پودپولكوۆنيك رۋسلان ۆالەەۆ اياقتادى.