قاراعاندى. 26 ءساۋىر. قاراعاندى وبلىسىندا سايلاۋ جوعارى دەڭگەيدە وتۋدە. سايلاۋدا جاسى ەندى 18-گە تولعان قىز-جىگىتتەر, ورتا جاستاعى ازاماتتار مەن زەينەتكەرلەر بەلسەنە داۋىس بەرىپ جاتىر. ءبىز سولاردىڭ ءبىرى قاراعاندى وبلىسىنىڭ قۇرمەتتى ازاماتى, « قۇرمەت» وردەنىنىڭ يەگەرى جارىلقاسىن بيكەنوۆپەن اڭگىمەلەسكەنىمىزدە ول سايلاۋدىڭ لايىقتى ءوتىپ جاتقانىن ايتتى. بۇل تۋرالى egemen.kz ءتىلشىسى حابارلادى.
«سايلاۋدىڭ وزىندىك ەرەكشەلىگى بولادى دەسەك, مەنى وسى جولى جۇرتتىڭ داۋىس بەرۋ ورىندارىنا ەرتەلەتىپ اعىلۋى ءسۇيسىندىردى. وتباسىمىز مۇشەلەرى تىركەلگەن سايلاۋ ۋچاسكەسىنە تاڭعى ساعات 6.00-دەن اسا بەرە كەلىپ ەدىم, ءبىراز ادام جينالىپ تۇرۋىنا قۋانىپ قالدىم. بۇل ەلىمىزدىڭ ساياسي ومىرىندەگى وتە ماڭىزدى شاراعا قاتىسۋ ءاربىر ازاماتتىڭ باستى مىندەتى مەن پارىزى ەكەنىن كورسەتۋمەن بىرگە ەلىمىز ءوسىپ-وركەندەۋىنە جاڭا جول اشۋعا دەگەن ىنتاسىن ايعاقتار وقيعا بولۋى كوڭىل-كۇي ءوسىردى», - دەدى ول.
سونىمەن بىرگە ول سايلاۋدىڭ ەلدىكتىڭ, تۇتاستىقتىڭ, باۋىرلاستىقتىڭ, تاتۋلىقتىڭ جارقىن مەرەكەسىنە اينالىپ, بارشا قازاقستاندىقتار سياقتى قاراعاندىلىقتار دا ءوز تاڭداۋلارىن جاساۋعا جوعارى جاۋاپكەرشىلىكتى سەزگەندەرىن ايتتى. «قازاقستانىمىزدىڭ بەيبىتشىلىكتى, سەنىمدىلىك پەن تۇراقتىلىقتى نىعايتۋعا , حالىقتىڭ ءال-اۋقاتىن كوتەرۋگە نەگىزدەلگەن سىرتقى جانە ىشكى ساياساتىنا قولداۋ سايلاۋدا ايقىن كورىنىس تاباتىندىعى ءسوزسىز. مەنىڭ دە داۋسىم وتانىمىزدىڭ گۇلدەنىپ , كوركەيۋىنە ارنالدى», - دەدى جارىلقاسىن بيكەنوۆ.
ايقىن نەسىپباي.
دەرەك, سۋرەت: egemen.kz