مەملەكەتتىك قىزمەت ىستەرى اگەنتتىگىندە اگەنتتىك توراعاسى دارحان جازىقبايدىڭ باسشىلىعىمەن سەرۆيستىك مەملەكەتتىك اپپاراتتى قالىپتاستىرۋ جانە ونىڭ قىزمەتىن بيۋروكراتيادان ارىلتۋ ماسەلەلەرى جونىندەگى كونسۋلتاتيۆتىك-ساراپتامالىق توپتىڭ كەزەكتى وتىرىسى ءوتتى, دەپ حابارلايدى Egemen.kz.
وتىرىسقا كونسۋلتاتيۆتىك-ساراپتامالىق توپتىڭ مۇشەلەرى ە. ل. ۋستەميروۆ, و. ا. حۋدايبەرگەنوۆ, ر. ۆ. كونياشكين, پرەزيدەنت اكىمشىلىگىنىڭ, ۇكىمەت اپپاراتىنىڭ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ لاۋازىمدى تۇلعالارى, «ازاماتتارعا ارنالعان ۇكىمەت «مەملەكەتتىك كورپوراتسياسى» كەاق, «ۇات» اق, تسيفرلىق ۇكىمەتتى قولداۋ ورتالىعىنىڭ وكىلدەرى, ۇكىمەتتىك ەمەس ۇيىمداردىڭ وكىلدەرى ب.گ. نۇرعازيەۆا, ب.ش. اعىباەۆا, سونداي-اق ورتالىق مەملەكەتتىك جانە جەرگىلىكتى اتقارۋشى ورگاندار بەينەكونفەرەنتسبايلانىس ارقىلى قاتىستى.
كۇن تارتىبىندە مەملەكەتتىك قىزمەتتەر كورسەتۋ سالاسىنداعى زاڭنامانى جەتىلدىرۋ بويىنشا جاڭا تاسىلدەر جانە مەملەكەتتىك كورسەتىلەتىن قىزمەتتەردى ۇسىنۋ راسىمدەرىن جەتىلدىرۋ اياسىنداعى 17 باعىت بويىنشا جۇرگىزىلگەن تالداۋ قورىتىندىلارى قارالدى.
مقىا توراعاسى دارحان جازىقباي قازاقستان رەسپۋبليكاسىندا مەملەكەتتىك باسقارۋدى دامىتۋدىڭ 2030 جىلعا دەيىنگى تۇجىرىمداماسىنا مەملەكەتتىك باسقارۋدىڭ سەرۆيستىك جانە «ادامعا باعدارلانعان» مودەلىن قالىپتاستىرۋ نەگىزگى تالاپ رەتىندە ايقىندالعانىن, وسىعان سايكەس ازاماتتار مەن ولاردىڭ ءال-اۋقاتى باستى قۇندىلىق سانالاتىنىن ايتتى.
«مەملەكەتتىك قىزمەت كورسەتۋ ۇدەرىستەرىن ۇنەمى جەتىلدىرۋ ءبىزدىڭ جۇمىسىمىزداعى نەگىزگى ۇستانىمداردىڭ ءبىرى. بۇل جۇمىستى ورىنداۋ كەزىندە جەكە مۇددەدەن گورى قىزمەتتى الۋشىلاردىڭ مۇددەلەرى مەن زاڭدى قۇقىقتارى باستى ورىندا تۇرۋى قاجەت», دەپ اتاپ ءوتتى دارحان جازىقباي.
بيىل «مەملەكەتتىك كورسەتىلەتىن قىزمەتتەر تۋرالى» زاڭنىڭ قابىلدانعانىنا 11 جىل تولىپ وتىر. ونىڭ جەكەلەگەن نورمالارىنىڭ جەتكىلىكتى ۋاقىت سىناقتان وتكەنىن جانە قۇقىق قولدانۋ تاجىريبەسى قالىپتاسقانىن ەسكەرە كەلە, ەرەجەلەردى قايتا قاراۋ, جاڭا قۇقىقتىق ينستيتۋتتاردى ەنگىزۋ قاجەتتىگى تۋىنداعانىن اتاپ ءوتۋ كەرەك.
قوعام تالاپتارى مەن قاجەتتىلىكتەرىنە جاۋاپ بەرەتىن سەرۆيستىك مەملەكەتتى قالىپتاستىرۋ ماقساتىندا اگەنتتىك مەملەكەتتىك قىزمەتتەردى كورسەتۋدىڭ پرواكتيۆتى, كومپوزيتتىك, ەكساۋماقتىق تاسىلدەرىن زاڭنامالىق دەڭگەيدە بەلگىلەۋدى ۇسىنادى.
ماسەلەن, مەملەكەتتىك قىزمەتتەردى كورسەتۋدىڭ پرواكتيۆتى ءتاسىلى ەنگىزىلگەن كەزدە قىزمەت كورسەتۋشى مەملەكەتتىك ورگاندار ازاماتتارعا ولار ءوتىنىش بەرمەي-اق مەملەكەتتىك قىزمەتتەردى كورسەتۋگە ۇسىنىس جاسايتىن بولادى, ال كومپوزيتتىك ءادىس ء«بىر ءوتىنىش» نەگىزىندە ءوزارا بايلانىستى بىرنەشە مەملەكەتتىك قىزمەتتەردى الۋعا مۇمكىندىك بەرەدى.
بۇدان باسقا, ازاماتتاردىڭ مەملەكەتتىك قىزمەتتەردى الۋ راسىمدەرىن جەڭىلدەتەتىن ء«فورمالدى سەبەپتەرگە بايلانىستى باس تارتۋعا جول بەرمەۋ», «وزىڭقى وتىنىشتەر جۇيەسىنە» كوشۋ سياقتى جاڭا قۇقىقتىق ينستيتۋتتاردى ەنگىزۋ ۇسىنىلدى.
مىسالى, ء«فورمالدى سەبەپتەرگە بايلانىستى باس تارتۋعا جول بەرمەۋ» ازاماتتارعا قۇجاتتى قاجەت جاعدايدا تۇزەتۋ ارقىلى باس تارتۋسىز الۋعا مۇمكىندىك بەرەدى, ال «وزىڭقى وتىنىشتەر جۇيەسى» ازاماتتارعا مەملەكەتتىك قىزمەتتىڭ قولجەتىمدىلىگى قامتاماسىز ەتىلگەنگە دەيىن «كۇتۋ پاراعىندا» بولۋعا مۇمكىندىك بەرەدى.
سونداي-اق وتىرىستىڭ كۇن تارتىبىندەگى ماسەلەلەردى قاراۋ بارىسىندا اگەنتتىك وكىلدەرى مەملەكەتتىك قىزمەت كورسەتۋ پروتسەسىنە ءتيىستى قورىتىندى نەمەسە كەلىسىم بەرەتىن وزگە دە مەملەكەتتىك ورگاندار مەن ۇيىمدار قاتىسا الاتىنىنا نازار اۋداردى. وسىعان بايلانىستى ولار ءۇشىن مەملەكەتتىك قىزمەتتەر كورسەتۋ بويىنشا قۇقىقتار مەن مىندەتتەردى ايقىنداۋ, ولاردى كەلىسۋ مەرزىمدەرى مەن ءتارتىبىن بەلگىلەۋ ۇسىنىلدى, بۇل ولاردىڭ جاۋاپكەرشىلىگىن ارتتىرادى.
وتىرىستا سونداي-اق مەملەكەتتىك قىزمەتتەر كورسەتۋ ۇدەرىستەرىن كەشەندى تالداۋ ناتيجەلەرى جانە ونىڭ قورىتىندىسى بويىنشا ازىرلەنگەن, ياعني وسى ۇدەرىستەردى جاقسارتۋعا باعىتتالعان جۇيەلى ۇسىنىستار قارالدى.
بۇعان دەيىن, پرەمەر-ءمينيستردىڭ تاپسىرماسى بويىنشا مەملەكەتتىك قىزمەت ىستەرى اگەنتتىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ, «ۇلتتىق اقپاراتتىق تەحنولوگيالار» اق جانە 29 ورتالىق ورگان وكىلدەرىنىڭ قاتىسۋىمەن تىزىلىمگە ەنگىزىلگەن بارلىق مەملەكەتتىك كورسەتىلەتىن قىزمەتتەر بويىنشا تىڭداۋلار ۇيىمداستىرعان بولاتىن.
قولدانىستاعى ءتىزىلىمدى تالداۋ ناتيجەسىندە مەملەكەتتىك قىزمەتتىڭ تەك 3 پايىزى پرواكتيۆتى فورماتتا, 8 پايىزى كومپوزيتتىك, ال 68 پايىزى ەكساۋماقتىق تاسىلدەرمەن كورسەتىلەتىنى انىقتالدى.
بىرىڭعاي تاسىلدەردى قامتاماسىز ەتۋ ماقساتىندا مقىا ازىرلەگەن 17 باعىت بويىنشا مەملەكەتتىك قىزمەتتەر كورسەتۋ راسىمدەرىن جەتىلدىرۋ جونىندە ارنايى ءبولىم ارقىلى مەملەكەتتىك باسقارۋدى تسيفرلىق ترانسفورماتسيالاۋ قاعيدالارىن قايتا قاراۋ ۇسىنىلدى.
ۇسىنىلعان 17 ترانسفورماتسيالىق ءتاسىل پرواكتيۆتىلىكتىڭ, كومپوزيتتىلىكتىڭ, ەكساۋماقتىلىقتىڭ ءوسۋىن قامتاماسىز ەتۋدى, سونداي-اق قۇجاتتاردىڭ مەرزىمدەرى مەن سانىن ازايتۋدى, انىقتامالىق قىزمەتتەردى, تولىققاندى ەمەس نەمەسە جارتىلاي كورسەتىلەتىن قىزمەتتەردى الىپ تاستاۋدى جانە وسى سالانىڭ سەرۆيستىلىگىن ارتتىرۋعا باعىتتالعان وزگە دە شارالاردى كوزدەيدى.
جۇرگىزىلگەن تالداۋ ناتيجەسىندە اگەنتتىك 30 مەملەكەتتىك كورسەتىلەتىن قىزمەتتى ەكساۋماقتىق فورماتقا, 251 مەملەكەتتىك كورسەتىلەتىن قىزمەتتى پرواكتيۆتى فورماتقا, 72 مەملەكەتتىك كورسەتىلەتىن قىزمەتتى كومپوزيتتىك فورماتقا اۋىستىرۋ بويىنشا, سونداي-اق مەملەكەتتىك قىزمەت كورسەتۋ مەرزىمىن قىسقارتۋ بويىنشا 273 ۇسىنىس ازىرلەدى.
بۇل قاعيدالاردى مەملەكەتتىك قىزمەتتەر كورسەتۋدىڭ بيزنەس-پروتسەستەرىنە رەينجينيرينگ جۇرگىزۋ جانە ولاردى كورسەتۋ قاعيدالارىن ازىرلەۋ كەزىندە مەملەكەتتىك ورگاندار باسشىلىققا الاتىن بولادى.
مىسالى, كەيبىر قىزمەتتەردى كورسەتۋ مەرزىمىنىڭ باسىم بولىگى مەملەكەتتىك ورگاندارمەن كەلىسۋ راسىمىنە جۇمسالاتىنى انىقتالدى. وسىعان بايلانىستى اگەنتتىك كەلىسۋ ءراسىمى بار قىزمەتتەر بويىنشا بيزنەس-پروتسەستى تسيفرلاندىرۋ ارقىلى, ونى اۆتوماتتى تۇردە جۇزەگە اسىرۋدى ۇسىندى.
سونىمەن قاتار تالداۋ بارىسىندا قىزمەتتەردى كورسەتۋ مەرزىمدەرىن ەسەپتەۋ كەزىندە بىرىڭعاي ءتاسىل جوق ەكەندىگى انىقتالدى. ماسەلەن, نورماتيۆتىك قۇقىقتىق اكتىلەرگە سايكەس قىزمەتتەردى كورسەتۋ مەرزىمدەرى جۇمىس نەمەسە كۇنتىزبەلىك كۇندەردە ەسەپتەلۋى مۇمكىن.
وسىعان وراي, اگەنتتىك تاراپىنان قىزمەتتەردى كورسەتۋ مەرزىمدەرىن بىركەلكى قولدانۋ ماقساتىندا, ياعني دەمالىس جانە مەرەكە كۇندەرىندە بەرىلۋ مۇمكىن (قاجەتتىلىگىنە بايلانىستى) مەملەكەتتىك كورسەتىلەتىن قىزمەتتەردى قوسپاعاندا, مەرزىمدەردى كۇنتىزبەلىك كۇندەردەن جۇمىس كۇندەرىنە اۋىستىرۋ ماسەلەسىن قاراستىرۋ ۇسىنىلدى.
كونسۋلتاتيۆتىك-ساراپتامالىق توپ وتىرىسىنىڭ قورىتىندىسىمەن ورتالىق جانە جەرگىلىكتى اتقارۋشى ورگاندارعا, وتىرىستا اتالىپ وتكەن ۇسىنىستاردى جۇزەگە اسىرۋعا قاتىستى بىرقاتار شەشىمدى شارالار قابىلداۋ, سونداي-اق تسيفرلاندىرۋ باعىتىندا جۇرگىزىلىپ جاتقان جۇمىستاردى ەسكەرە وتىرىپ, مەملەكەتتىك قىزمەتتەر كورسەتۋ راسىمدەرىن جەتىلدىرۋ بويىنشا ودان ءارى جالعاساتىن جۇمىستاردى قامتيتىن ءىس-شارالار جوسپارىن بەكىتۋ ۇسىنىلدى.