قىزمەتكەرلەر جىل سايىنعى ەڭبەك دەمالىسىنا جانە الەۋمەتتىك دەمالىسقا شىعۋعا قۇقىلى. ەڭبەك دەمالىسى جۇمىس ىستەيتىن ازاماتتاردىڭ بارلىعىنا بەرىلەدى, ال الەۋمەتتىك دەمالىس تەك زاڭدا قاراستىرىلعان جاعدايلاردا عانا ۇسىنىلادى. دەمالىس بەرۋ, ونى كەيىنگە قالدىرۋ جانە جۇمىسكەردى دەمالىستان شاقىرتىپ الۋ جۇمىس بەرۋشىنىڭ بۇيرىعىمەن بەكىتىلەدى. دەسە دە قىزمەتكەردى ەڭبەك دەمالىسىنان كەرى جۇمىسقا شاقىرىپ الۋ ءۇشىن ول جازباشا تۇردە كەلىسىم بەرۋى كەرەك, دەپ جازادى Egemen.kz.
ەڭبەك دەمالىسى كەزىندەگى وسى ماسەلەنىڭ ءتارتىبى قر ەڭبەك كودەكسىنىڭ 95-بابىنا سايكەس جۇرگىزىلەدى.
ەگەر جۇمىس بەرۋشى ەڭبەك دەمالىسىنان كەرى شاقىرتىپ العان جاعدايدا جىل سايىنعى اقى تولەنەتىن ەڭبەك دەمالىسىنىڭ پايدالانىلماعان بولىگىن ەڭبەك شارتى تاراپتارىنىڭ كەلىسىمى بويىنشا سول جۇمىس جىلى ىشىندە نەمەسە كەلەسى جۇمىس جىلىندا كەز كەلگەن ۋاقىتتا بەرىلەدى. سونىمەن قاتار ەڭبەك دەمالىسىنىڭ قالعان بولىگىن كەلەسى جۇمىس جىلىنىڭ جىل سايىنعى اقى تولەنەتىن ەڭبەك دەمالىسىنا قوسىپ الۋعا دا بولادى.
ەگەر قىزمەتكەر قايتا ەڭبەك دەمالىسىنا شىققىسى كەلمەگەن جاعدايدا پايدالانىلماعان بولىگىنىڭ كۇندەرىن وتەماقىمەن الماستىرۋعا بولادى.
ەسكەرەتىنى, جۇمىس ورنى 18 جاسقا تولماعان جۇمىسكەردى, جۇكتىلىگى تۋرالى انىقتامانى جۇمىس بەرۋشىگە بەرگەن جۇكتى ايەلدەردى جانە اۋىر جۇمىستاردا, ەڭبەك جاعدايلارى زياندى جانە قاۋىپتى جۇمىستاردا ىستەيتىن جۇمىسكەرلەردى جىل سايىنعى اقى تولەنەتىن ەڭبەك دەمالىسىنان كەرى شاقىرتىپ الۋىنا رۇقسات ەتىلمەيدى.