اقتوبە. 21 قاڭتار. اقتوبە وبلىسى اۋماعىندا مال ۇرلىعىمەن بايلانىستى قىلمىستاردى اشۋ جانە جولىن كەسۋ ماقساتىندا «مال ۇرلىعى» جەدەل-پروفيلاكتيكالىق ءىس-شاراسى وتكىزىلۋدە. بۇل تۋرالى egemen.kz ءتىلشىسى حابارلادى.
ءىس-شارا اياسىندا كريمينالدىق پوليتسيا قىزمەتكەرلەرى اقتوبە وبلىسىنىڭ 4 تۇرعىنىنان قۇرىلعان قىلمىستىق توپتى اشكەرەلەدى. 18 قاڭتار كۇنى كريمينالدىق پوليتسيا جانە ۋچاسكەلىك پوليتسيا ينسپەكتورى العا اۋدانى قاراقوبدا كەنتىندە اتالعان توپتى ءىرى قارا مالىن ۇرلاۋ كەزىندە قولعا ءتۇسىردى. قازىرگى تاڭدا ولاردىڭ اقتوبە وبلىسى اۋماعىنداعى وسىعان ۇقساس 6 مال ۇرلىعىنا قاتىستىلىعى بەلگىلى بولدى.
كۇدىكتىلەر بىرقاتار مال ۇرلىعىنا قاتىسى بارلارىن مويىنداپ وتىر.
سونىمەن قاتار, ۇستىمىزدەگى جىلعى 13 قاڭتار ساعات 11.00-دە قارعالى اۋدانى ىشكى ىستەر باسقارماسىنىڭ كەزەكشى بولىمىنە 66-جاستاعى اۋىل تۇرعىنى شاعىمدانىپ, 2014 جىلعى 13 جەلتوقسانعا قاراعان ءتۇنى بەلگىسىز ادامداردىڭ اۋىل شەتىندەگى شارۋاشىلىعىنان 4 قويدى ۇرلاپ كەتكەنىن ايتقان. كەلتىرىلگەن شىعىن كولەمى 100 مىڭ تەڭگەنى قۇرايدى.
جەدەل-ىزدەستىرۋ ءىس-شاراسى بارىسىندا ىشكى ىستەر دەپارتامەنتى كريمينالدىق پوليتسيا باسقارماسىنىڭ قىزمەتكەرلەرى اتالعان قىلمىستى جاسادى دەگەن كۇدىكپەن 16-18 جاستاعى اۋىل تۇرعىندارىن قولعا تۇسىرگەن. ءتىنتۋ بارىسىندا كۇدىكتىلەردەن ۇرلانعان قويلاردىڭ تەرىسى تاركىلەندى. جاۋاپ الۋ كەزىندە كۇدىكتەلەر كىنالارىن مويىندادى. قازىرگى تاڭدا كۇدىكتىلەر قاماۋعا الىنىپ, قىلمىستىق كودەكستىڭ 188-بابى بويىنشا قىلمىستىق ءىس قوزعالدى.
ساتىبالدى ءساۋىرباي.
دەرەك: egemen.kz.
سۋرەت: azgazeta.ru.