اتىراۋ. 26 ءساۋىر. اتىراۋ وبلىسىندا جاس سايلاۋشىلاردىڭ ءبىرى گۇلدانا ەلەمەسوۆا تۋعان كۇنىندە العاش رەت داۋىس بەردى. بۇل تۋرالى egemen.kz ءتىلشىسى حابارلادى.
اتىراۋدا داۋىس بەرۋ باستالىسىمەن سايلاۋ ۋچاسكەلەرىنە اسىعا جەتكەندەردىڭ ءبىرى –گۇلدانا ەلەمەسوۆا. قازىر ول حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە ەكونوميكا جانە قۇقىق فاكۋلتەتىنىڭ 2-كۋرسىندا وقيدى.
«مەن ءۇشىن ءدال بۇگىنگى كۇننىڭ ەكى ەرەكشەلىگى بار. بىرىنشىدەن, مەن بيىل ەل بولاشاعى ءۇشىن العاش رەت ماڭىزدى تاڭداۋ جاسادىم. ياعني, ءبىرىنشى رەت سايلاۋعا قاتىسىپ, داۋىس بەردىم. ەكىنشىدەن, ءدال بۇگىن – مەنىڭ تۋعان كۇنىم. دەمەك, مەنىڭ ومىرىندە بۇل كۇن ەرەكشە ەستە ساقتالادى», – دەيدى گۇلدانا ەلەمەسوۆا.
ءدال وسى كۇنى العاش رەت ءوز تاڭداۋىن جاساعان جاستاردىڭ قاتارىندا كەشە 18 جاسقا تولعان اتالعان وقۋ ورنىنىڭ تاعى ءبىر ستۋدەنتى يمانعالي تولەپوۆ تە بار. سونىمەن بىرگە, اتىراۋ قالاسىنا تاياۋ ورنالاسقان تومارلى اۋىلىنىڭ تۇرعىنى نىشان جۇباەۆا بيىل 104 جاسقا تولىپتى. عاسىردان دا ۇزاق عۇمىر جاساعان اجەنىڭ ءوز ۇيىندە داۋىس بەرۋى ءۇشىن №64 سايلاۋ ۋچاسكەسىنەن جىلجىمالى جاشىك اكەلىندى.
«ءبىز ءومىردىڭ قيىندىعىن كوپ كوردىك. اللاعا شۇكىر, ەندى ەلىمىزدىڭ بىرلىگى, زامانىمىزدىڭ مامىراجاي تىنىشتىعى بۇزىلماسىن», – دەدى ءوز داۋسىن بەرگەننەن كەيىن 104 جاستاعى سايلاۋشى نىشان جۇباەۆا.
بۇل كۇنى اتىراۋداعى №2016 اسكەري ءبولىم ساردارلارى مەن ساربازدارى دا داۋىس بەردى. «ءبىز, ايەلىم مەرۋەرت ەكەۋمىز ەلىمىزدىڭ قۋاتتى مەملەكەتكە اينالۋى ءۇشىن ءوز تاڭداۋىمىزدى جاسادىق», – دەيدى وسى اسكەري ءبولىمنىڭ ساردارى, مايور عالىمجان جۋرحاەۆ.
اتىراۋ وبلىسىندا بۇگىن 304 593 سايلاۋشى 232 سايلاۋ ۋچاسكەسىندە ءوز تاڭداۋىن جاساۋى ءتيىس بولسا, كۇندىزگى ساعات 12:00-گە دەيىن ولاردىڭ 47,54 پايىزى داۋىس بەرىپ ۇلگەردى. داۋىس بەرۋدە يساتاي (72,41%), قىزىلقوعا (58,38%) جانە قۇرمانعازى (55,08%) اۋداندارىندا سايلاۋشىلاردىڭ بەلسەندىلىگى بايقالىپ وتىر.
جولداسبەك شوپەعۇل.
دەرەك: egemen.kz.
سۋرەت: راحىم قويلىباەۆ.