استانا. 21 قاڭتار. تەننيستەن اۆستراليا اشىق بىرىنشىلىگىندە سىنعا ءتۇسىپ جاتقان قىزدارىمىز زارينا دياس پەن ياروسلاۆا شۆەدوۆا ەكىنشى اينالىمداعى ويىندارىن وتكىزىپ, جەڭىسكە جەتتى. بۇل تۋرالى egemen.kz حابارلادى.
الدىمەن كورتقا شۆەدوۆا شىقتى. قارسىلاسى پۋەرتو-ريكولىق مونيكا پۋيگ. العاشقى سەت قازاقستاندىقتىڭ ايقىن باسىمدىعىمەن ءوتتى. ناتيجەسىندە ءبىزدىڭ پايدامىزعا 6:2 ەسەبى تىركەلدى. ال ەكىنشى كەزەڭدە م.پۋيگ ايتارلىقتاي قارسىلىق كورسەتتى. ءتىپتى بۇل سەتتە قارسىلاستار جەڭىمپازدى تاي-برەيك ارقىلى انىقتاپ, اتالمىش سىندا شۆەدوۆا 7:6 (8:6) ەسەبىمەن باسىم ءتۇستى. ەندى سلاۆا ءۇشىنشى اينالىمدا قىتايلىق پەن شۋايمەن كۇش سىناسادى. بۇگىندە قىتاي قىزى WTA رەيتينگىندە 22-ساتىدا تۇر. ال قازاقستاندىق تەننيسشى الەمنىڭ 66-راكەتكاسى ەكەنىن بەلگىلى. سوعان قاراماستان, ول ءبىرىنشى اينالىمدا WTA تىزىمىندە 16-ورىندا تۇرعان چەحيالىق ليۋسيا شافارجوۆادان ايلاسىن اسىرعانىن ايتا كەتەيىك. ءۇش سەتكە سوزىلعان ويىندا شۆەدوۆا 6:4, 2:6, 8:6 ەسەبىمەن جەڭىسكە جەتتى.
استانا ۋاقىتىمەن 10:55-تە جارىس الاڭىنا قىزدار اراسىندا ەلىمىزدىڭ ءبىرىنشى, الەمنىڭ 31-راكەتكاسى زارينا دياس شىقتى. وتاندىق تەننيسسۇيەر قاۋىم اسىعا كۇتكەن بۇل كەزدەسۋدە زارينا سلوۆاك اننا شميدلوۆاعا قارسى وينادى. شميدلوۆا الەمدىك رەيتينگتە 74-ساتىعا جايعاسقان تەننيسشى.
ءبىرىنشى كەزەڭدە ويىن ورنەگى تەڭ دارەجەدە ءوربىدى. تەك قارسىلاسىنىڭ ءبىر دوبىن ءوز پايداسىنا شەشە بىلگەن سلوۆاك قىزى 6:3 ەسەبىمەن باسىم ءتۇستى. ەكىنشى سەتتە زارينا اننانىڭ ادىمىن اشتىرمادى. سالعان جەردەن سەتتى برەيكپەن باستاعان ول سوڭىندا كەزەڭدى 6:2 ەسەبىمەن ءوز پايداسىنا اياقتادى. ال شەشۋشى ءۇشىنشى سەتتە قازاقستاندىق جانكۇيەرلەردىڭ جۇيكەسىنە ءبىراز سالماق ءتۇستى. سەبەبى, شميدلوۆا ءوزىنىڭ وسال ەمەستىگىن دالەلدەپ, سوڭعى ساتكە دەيىن قارسىلاسىپ باقتى. ابىروي بولعاندا, زارينا سپورتشىعا ءتان مىنەز كورسەتىپ, 8:6 ەسەبىمەن كەزەڭدى جانە ويىندى ءوز پايداسىنا شەشتى. ءبىزدىڭ قىزدىڭ ەندىگى قارسىلاسى - اتى الەمگە ايگىلى رەسەي تەننيسشىسى ماريا شاراپوۆا. قوس ەلدىڭ ءبىرىنشى راكەتكالارى اراسىنداعى ويىن 23 قاڭتار كۇنى وتەدى.
ايتا كەتەر جايت, اتالمىش سايىسقا زارينا مىقتىلار قاتارىنا قوسىلىپ, ءتۋرنيردىڭ 31-راكەتكاسى رەتىندە قاتىسىپ جاتىر. فينالدىق كەزەڭدە وينايتىن 128 تەننيسشىنىڭ ىشىندەگى 32 سپورتشى فاۆوريتتەر ساناتىنا جاتقىزىلادى. ول الەمدىك رەيتينگتەگى كورسەتكىشىنە بايلانىستى جۇزەگە اسادى. ال زارينانىڭ WTA رەيتينگىندە قاي ساتىدا تۇرعانىن جوعارىدا ايتتىق. وتكەن جىلى ىرىكتەۋ كەزەڭى ارقىلى جارىسقا قاتىسقان قىزىمىز بيىل سول ءتۋرنيردىڭ مىقتىلارى قاتارىنان ورىن الىپ وتىر. ال ەكىنشى اينالىمداعى جەڭىسىنەن كەيىن زارينا كەم دەگەندە ۇزدىك وتىزدىقتىڭ ىشىنە ءسوزسىز ەنەدى. سونداي-اق, قازاق قىزىنىڭ العاشقى كەزدەسۋىندە پولياك ۋرسۋلا رادۆانسكانى 3:6, 6:4, 6:2 ەسەبىمەن تىزە بۇكتىرگەنىن ايتا كەتكەن ءجون.
جەكەلەي سىندا ءۇشىنشى اينالىمعا شىققان قوس قىزىمىز جۇپتاسىپ ونەر كورسەتۋدە دە سايىسقا تۇسۋدە. 20 قاڭتار كۇنى يا.شۆەدوۆا يسپان مەدينا گارريگەسپەن جۇپتاسىپ, ي.فالكوني جانە پ.مارتيچ جۇبىن ەكى سەتتە جەڭدى. زارينانىڭ بۇل تارتىستاعى جۇبى – وڭتۇستىك افريكا رەسپۋبليكاسىنىڭ وكىلى شانەل سحەپەرس. ولار العاشقى ويىنىن 22 قاڭتاردا د.يۋراك جانە م.مۋلتون-لەۆي جۇبىنا قارسى وتكىزەدى.
ال ەرلەر اراسىنداعى باسەكەدە ەل نامىسىن قورعاعان ميحايل كۋكۋشكين مەن اندرەي گولۋبەۆ ءبىرىنشى اينالىمنان اسا المادى. ميشا تۋنيستىك مالەك جازيري ەسىمدى تەننيسشىگە جول بەرسە (3:1 (6:2, 6:3, 2:6, 7:6 (7:3)), اندرەي فين يارككو نيەمينينگە 3:0 (6:1, 6:2, 7:6 (8:6)) ەسەبىمەن ەسە جىبەردى.
ەلامان قوڭىر.
دەرەك: egemen.kz.
سۋرەت: facebook.com.