شانحاي ىنتىماقتاستىق ۇيىمىنىڭ باس حاتشىسى چجان مين استانا ءسامميتىن, ونىڭ ىشىندە ۇيىمعا مۇشە مەملەكەتتەر كەڭەسىنىڭ وتىرىسىن قورىتىندىلاپ, بۇقارالىق اقپارات قۇرالدارىنا ارنالعان ءباسپاسوز ءماسليحاتىن وتكىزدى. ول بايانداماسىندا قازاقستان شىۇ-عا توراعالىق ەتكەن كەزىندە ءتۇرلى باعىتتاعى 140-تان اسا ءىس-شارا ۇيىمداستىرىلىپ, توراعالىق وتە مازمۇندى جانە قىزىقتى وتكەنىن ايرىقشا اتاپ ءوتتى.
سونداي-اق ول شىۇ-نىڭ جوعارى ورگانى ۇيىمعا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ ءوزى ءۇشىن ۇلكەن مارتەبە بولعانىنا, ۇيىم باسشىلارى كەزدەسۋىنىڭ قورىتىندىسى تۋرالى حاباردار ەتۋدىڭ ماڭىزدى ەكەنىنە توقتالدى.
– استانا ءسامميتى ۇيىم قىزمەتىنىڭ بارلىق باعىتى بويىنشا, اسىرەسە ساياسات جانە قاۋىپسىزدىك, ساۋدا جانە ينۆەستيتسيا, كولىك جانە ەنەرگەتيكا, مادەنيەت جانە گۋمانيتارلىق بايلانىس باعىتىنداعى كوپجاقتى ىنتىماقتاستىقتى دامىتۋ كەلەشەگىن تالقىلاۋعا ارنالدى. ءىس-شارا بارىسىندا حالىقارالىق جانە وڭىرلىك كۇن تارتىبىندەگى وزەكتى ماسەلەلەر توڭىرەگىندە مازمۇندى پىكىر الماستىق. بۇل رەتتە قاۋىپسىزدىكتى قامتاماسىز ەتۋ جانە شىۇ كەڭىستىگىندەگى ء«ۇش ز ۇلىم كۇشپەن» كۇرەسۋدىڭ قاجەتتىلىگى ەرەكشە اتالىپ ءوتتى. كەزدەسۋگە قاتىسۋشىلاردىڭ سامميت بارىسىندا بەرگەن باعاسىنا سۇيەنسەك, ۇيىم ءوز تاريحىنىڭ ءۇشىنشى ونجىلدىعىندا ءوزارا سەنىم مەن دوستىق راۋىشتەگى تاتۋ كورشىلىك قارىم-قاتىناستاردى نىعايتۋدىڭ, كوپجاقتى ديالوگتى كەڭەيتۋدىڭ جانە ءوزارا ءتيىمدى ىنتىماقتاستىقتى تەرەڭدەتۋدىڭ بەرىك الاڭىنا اينالدى. قازىرگى حالىقارالىق قاتىناستار جۇيەسىندە ول كۇردەلى گەوساياسي جاعدايلاردا تۇراقتىلىقتى ساقتاۋدا شەشۋشى ءرول اتقاراتىن بەدەلدى قۇرىلىم بولا الدى, – دەدى چجان مين.
سونىمەن قاتار باس حاتشى ۇيىم ايماعىنىڭ تۇراقتى دامۋى مەن وركەندەۋىن قامتاماسىز ەتۋ, شىۇ جارعىسىنىڭ ماقساتتارى مەن مىندەتتەرىن قاتاڭ ساقتاۋ, «شانحاي رۋحىنىڭ» مىزعىماس قاعيداتتارىن تاباندى تۇردە ىلگەرىلەتۋ ءۇشىن ءتۇرلى سالاداعى ءىس جۇزىندەگى ىنتىماقتاستىقتى ودان ءارى ارتتىرۋ قۇلشىنىسى باسا ايتىلعانىن جەتكىزدى.
ءباسپاسوز ءماسليحاتىندا چجان مين 25 قۇجات قابىلدانىپ, شىۇ-عا مۇشە مەملەكەتتەر باسشىلارى كەڭەسىنىڭ استانا دەكلاراتسياسى ماقۇلدانعانىن اتاپ ءوتتى.
– شىۇ-نىڭ «ادىلەتتى بەيبىتشىلىك, كەلىسىم جانە دامۋ ءۇشىن دۇنيەجۇزىلىك بىرلىك تۋرالى» باستاماسىن قۇرۋ تۋرالى شەشىم قابىلدانىپ, تسينداو قالاسى 2024-2025 جىلدارعا ارنالعان شىۇ-نىڭ مادەني جانە تۋريستىك استاناسى مارتەبەسىنە يە بولدى. تاتۋ كورشىلىك, سەنىم جانە سەرىكتەستىك قاعيداتتارى تۋرالى مۇشە مەملەكەتتەر باسشىلارى كەڭەسىنىڭ مالىمدەمەسى رەتىندە مبك-نىڭ 3 مالىمدەمەسى جاريالاندى, – دەدى چجان مىرزا.
باس حاتشى ءسامميتتىڭ نەگىزگى ناتيجەلەرىنىڭ ءبىرى رەتىندە بەلارۋس رەسپۋبليكاسىنىڭ ۇيىمعا مۇشە رەتىندە قوسىلۋ ۇدەرىسىنىڭ اياقتالۋىن ەرەكشە اتاپ ءوتتى. ناتيجەسىندە, شىۇ مۇشەلەرى ون مەملەكەتكە دەيىن ارتتى. حاتشىلىق دەلەگاتسياسى بەيجىڭگە ورالعاننان كەيىن شىۇ «وتباسى» ەلدەرىنىڭ ديپلوماتيالىق وكىلدىكتەرى باسشىلارىنىڭ قاتىسۋىمەن ۇيىم شتاب-پاتەرىنىڭ الدىندا بەلارۋس رەسپۋبليكاسىنىڭ مەملەكەتتىك تۋىن كوتەرۋدىڭ سالتاناتتى ءراسىمى وتەتىنىن حابارلادى.
بۇدان بولەك, ول شىۇ جانە ونىڭ تۇراقتى جۇمىس ىستەيتىن ورگاندارىنىڭ قىزمەتىن ودان ءارى جەتىلدىرۋدىڭ باسىم مىندەتتەرىنە, سونداي-اق كەيىنگى ۋاقىتتا وتە بەلسەندى جۇمىس اتقارىپ كەلە جاتقان ۇيىمدى كەڭەيتۋ ۇدەرىسىنە ەرەكشە ءمان بەرىلەتىنىن ايتتى.
ءسوزىنىڭ سوڭىنا قاراي ەلىمىزدىڭ توراعالىعىنا توقتالىپ, قازاقستان تارابى ەكونوميكا, ينۆەستيتسيا, كولىك, مادەني-گۋمانيتارلىق سالا ماسەلەلەرىنە, سونداي-اق ەكولوگيالىق اسپەكتىلەرگە ەرەكشە نازار اۋدارعانىن جەتكىزدى.
– ءبىزدىڭ ويىمىزشا, قازاقستاننىڭ ۇيىمعا توراعالىعى وتە مازمۇندى ءارى قىزىقتى بولدى. ۇيىم قىزمەتىنە جاڭا سەرپىن بەرىپ, ونىڭ تاريحىنداعى تاعى ءبىر ماڭىزدى كەزەڭگە اينالعان استانا ءسامميتى ءبارىمىز ءۇشىن ءتيىمدى دە سىندارلى جانە جەمىستى ناتيجەگە قول جەتكىزدى. وسى مۇمكىندىكتى پايدالانا وتىرىپ, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتى وسى باسقوسۋدىڭ جانە جالپى توراعالىعىنىڭ ءساتتى وتۋىمەن ىستىق ىقىلاسپەن قۇتتىقتاعىم كەلەدى. ماعان جانە حاتشىلىق دەلەگاتسياسىنا جۇمىس بارىسىنداعى كورسەتىلگەن ەرەكشە قولداۋ مەن كومەك ءۇشىن, سونداي-اق جىلى شىرايمەن جانە قوناقجاي قالىپپەن قابىلداعانى ءۇشىن قازاقستانداعى ارىپتەستەرىمىزگە العىسىمدى بىلدىرگىم كەلەدى, – دەدى ۇيىم باس حاتشىسى چجان مين.
استانا سامميتىنەن كەيىن توراعالىق ەستافەتاسىن قىتاي حالىق رەسپۋبليكاسى قابىلدادى. جالپى, قىتاي شىۇ-نىڭ نەگىزىن قالاۋشى ەل سانالادى, ءارى ۇزاق جىلدار بويى ۇيىمنىڭ دامۋىنا بارىنشا ۇلەس قوسىپ كەلەدى.