پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ەۋروپا قايتا قۇرۋ جانە دامۋ بانكىنىڭ (ەقدب) ورتالىق ازيا جانە موڭعوليا بويىنشا باسقارۋشى ديرەكتورىنىڭ مىندەتىن اتقارۋشى حۋسەين وزحانمەن كەزدەستى.
تاراپتار ەلدىڭ تۇراقتى الەۋمەتتىك-ەكونوميكالىق دامۋى ءۇشىن تارتىلاتىن ينۆەستيتسيالاردىڭ ماڭىزدى ءرولىن اتاپ ءوتتى. بۇعان قوسا قولدانىستاعى جوبالاردىڭ جاي-كۇيى مەن ەقدب-نىڭ جاڭا جوبالاردى قارجىلاندىرۋ باعىتىنداعى جوسپارلارىن تالقىلادى.
حۋسەين ءوزحان اتاپ وتكەندەي, بيىل بانك قازاقستان ەكونوميكاسىنا قۇيىلاتىن ينۆەستيتسيا كولەمىن كەم دەگەندە ەكى ەسەگە ارتتىرۋدى جوسپارلاپ وتىر. ەقدب قازاقستان ەلەكتر جەلىلەرىن باسقارۋ كومپانياسىمەن (KEGOC) ەلدىڭ باتىسىندا ەلەكترمەن جابدىقتاۋ جۇمىسىنىڭ سەنىمدىلىگىن ارتتىرۋعا مۇمكىندىك بەرەتىن ءىرى جوبانى ىسكە اسىرىپ كەلەدى. بۇعان دەيىن ءىرى اۋماقتىق جوباعا اقتوبە قالاسىندا جاڭا تازارتۋ قۇرىلىستارىن سالۋعا قول قويىلىپ, «ارالتۇز» اق جەتەكشى اس تۇزىن ءوندىرۋشىسىنىڭ جاڭا وندىرىستىك قۋاتتارىن سالۋعا, سونداي-اق ايەلدەر مەن جاستار كاسىپكەرلىگىن قولداۋعا قاراجات ءبولىندى. 2024 جىلدىڭ ماۋسىم ايىندا قۇرىلىسىن ەقدب قارجىلاندىرعان الماتى اۋەجايىنىڭ جاڭا جولاۋشىلار تەرمينالى اشىلدى. سونىمەن قاتار بانك «Air Astana» ۇلتتىق اۋە تاسىمالداۋشىسىنىڭ IPO-سىنا قاتىستى.
نۇرلان بايبازاروۆتىڭ ايتۋىنشا, قازاقستان ەقدب-مەن ەلدىك ءارى ايماقتىق دەڭگەيدە ىنتىماقتاستىقتى كەڭەيتۋگە نيەتتى, سونداي-اق بانكتىڭ جەكە سەكتورعا ينۆەستيتسيا سالۋعا دەگەن ۇمتىلىسىن قولدايدى.
«ەلىمىز ەنەرگەتيكا جانە كولىك-لوگيستيكا, جاڭارتىلاتىن ەنەرگيا كوزدەرى مەن جەكە بيزنەستى دامىتۋ جوبالارىن جۇزەگە اسىرۋ ءۇشىن ينۆەستيتسيا تارتۋ بويىنشا ەقدب-مەن ءوزارا ءتيىمدى جۇمىس ىستەۋگە دايىن», دەدى ۆيتسە-پرەمەر.
ەقدب قازاقستاندا قىزمەتىن باستاعاننان بەرى 324 جوبا اياسىندا ەل ەكونوميكاسىنا €10,2 ملرد ينۆەستيتسيا سالدى. قازىرگى ۋاقىتتا بانكتىڭ قازاقستانداعى جوبالىق پورتفەلىندە قۇنى €2,9 ملرد-تان اساتىن 121 جوبا بار.