«تازا قازاقستان» اۋقىمدى ەكولوگيالىق اكتسياسى اياسىندا ەلوردالىق كاسىپكەرلەرگە تازالىق پەن ءتارتىپتى ساقتاۋ جونىندەگى ۇسىنىمدار جازىلعان چەك-پاراقتار تاراتىلدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
استانا اكىمدىگى 2024 جىلى كاسىپكەرلەرگە ارناپ تازالىق پەن ءتارتىپتى جىل بويى ساقتاۋ بويىنشا ۇسىنىمدارى بار چەك-پاراقشالار ازىرلەگەن بولاتىن. ماۋسىمدىق ەرەكشەلىكتەر ەسكەرىلىپ, ولار ءتورت فورماتقا بولىنگەن – كوكتەم, جاز, كۇز جانە قىس.
ءوز اۋماقتارىن ءتيىستى دەڭگەيدە ۇستاۋعا ارنالعان ماۋسىمدىق جوسپار رەسپۋبليكا داڭعىلى بويىندا ورنالاسقان جەكە ۇيىمدارعا تاراتىلدى.
«العاش رەت ەكى جىل بۇرىن ازىرلەنگەن ارنايى چەك-پاراقشالار ءار ماۋسىمعا بەيىمدەلگەن ۇسىنىمداردى قامتيدى جانە ماۋسىمدىق ەرەكشەلىكتەردى ەسكەرەدى. بۇل اكتسيا قالاداعى تازالىق پەن ءتارتىپتى ساقتاۋعا 250 مىڭنان استام شاعىن جانە ورتا بيزنەس سۋبەكتىلەرىن تارتۋعا باعىتتالعان. بيزنەستىڭ بۇل جۇمىسقا بەلسەندى قاتىسۋى ەلوردانىڭ دامۋىنا وڭ ىقپال ەتەدى», دەدى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ ءبولىم باسشىسى شۋحرات جوراەۆ.
قالىپتاستىرىلعان ۇسىنىمدار قاجەتتى جۇمىستار ءتىزىمىن قامتيدى. ماسەلەن, كوكتەمدە شاتىرلاردى قاردان دەر كەزىندە تازالاۋ, جاسىل جەلەكتەردى بۇتاۋ جانە وتىرعىزۋ قاراستىرىلعان. جاز مەزگىلىندە اعاشتار مەن جاسىل جەلەكتەردى كۇتىپ-باپتاۋ, سۋارۋ جۇيەسىنىڭ جۇمىسىن قامتاماسىز ەتۋ, تۇراقتى سەنبىلىكتەر وتكىزۋ كوزدەلگەن.
«تازا قازاقستان»: بيىل الماتىدا 550 مىڭنان استام اعاش وتىرعىزىلادى
كۇزدە كىرەبەرىس ايماقتارعا تايعاناققا قارسى جابىن ورناتۋ, جىلىتۋ ماۋسىمىنا دايىندىق جۇرگىزۋ قاجەت. قىستا كىرەبەرىستەردى مۇزعا قارسى قوسپامەن وڭدەۋ جانە كەلۋشىلەردىڭ قاۋىپسىزدىگىن قامتاماسىز ەتۋ مىندەتتەلەدى.
ايتا كەتەيىك, بۇل ۇسىنىمداردىڭ نەگىزگى ماقساتى – قالا مەن قورشاعان ورتاعا جاۋاپكەرشىلىك مادەنيەتىن قالىپتاستىرىپ, دامىتۋ.