قازاقستان ءبىلىم بەرۋ سالاسىندا ەلەۋلى ناتيجەگە قول جەتكىزىپ, Insider Global Education Index رەيتينگىندە 18-ورىنعا كوتەرىلدى. ەل 0,092 بالل جيناپ, حالىقارالىق دەڭگەيدە ىقپالداسقان جانە تۇراقتى دامىپ كەلە جاتقان ءبىلىم بەرۋ جۇيەلەرى بار مەملەكەتتەردىڭ قاتارىنا ەندى, دەپ جازادى Egemen.kz.
توپ-20 ىشىندەگى بۇل كورسەتكىش سالانىڭ جۇيەلى جاڭعىرىپ جاتقانىن جانە قازاقستاننىڭ جاھاندىق ءبىلىم كەڭىستىگىندەگى ىقپالى ارتىپ كەلە جاتقانىن اڭعارتادى. قازاقستان پولشا (19-ورىن), ءباا (20-ورىن) سياقتى ەلدەردى باسىپ وزىپ, نيدەرلاند (17-ورىن) پەن ساۋد ارابياسىمەن (16-ورىن) دەڭگەيلەس باسەكەگە ءتۇسىپ وتىر. سونىمەن قاتار مەكسيكا, برازيليا جانە وڭتۇستىك افريكا سەكىلدى ءىرى ەلدەر دە ارتتا قالعان.
رەيتينگ كوشىن اقش باستاپ تۇر. ودان كەيىن ۇلىبريتانيا مەن قىتاي ورنالاسقان. العاشقى وندىقتا سونداي-اق گەرمانيا, اۋستراليا, جاپونيا جانە وڭتۇستىك كورەيا بار. بۇل ەلدەردە زەرتتەۋ ۋنيۆەرسيتەتتەرى شوعىرلانعان ءارى عىلىمعا ينۆەستيتسيا كولەمى جوعارى.
اتالعان رەيتينگ ءۇش نەگىزگى كورسەتكىشكە نەگىزدەلگەن. ولار – QS Top 1000 تىزىمىندەگى ۋنيۆەرسيتەتتەردىڭ ۇلەسى, ولاردىڭ ورتاشا پوزيتسياسى جانە ءبىلىم بەرۋ سالاسىنا سالىناتىن مەملەكەتتىك ينۆەستيتسيا دەڭگەيى. بۇل فاكتورلار كادر دايارلاۋ ساپاسىنا, عىلىمي بازاعا جانە جوعارى وقۋ ورىندارىنىڭ حالىقارالىق ىقپالداسۋىنا تىكەلەي اسەر ەتەدى.
قازاقستان وسى باعىتتا تۇراقتى دامۋ مودەلىن قالىپتاستىرىپ كەلەدى. بۇگىندە ەلدىڭ 10-نان استام ۋنيۆەرسيتەتى QS Top 1000 قاتارىنا كىرەدى. ولاردىڭ قاتارىندا ءال-فارابي اتىنداعى قازۇۋ, ل.ن. گۋميلەۆ اتىنداعى ەۇۋ جانە Satbayev University بار. ۋنيۆەرسيتەتتەردىڭ 300-800 ورىندار ارالىعىنداعى كورسەتكىشتەرى جاھاندىق ءبىلىم بەرۋ كارتاسىنداعى پوزيتسيالاردى نىعايتىپ, ءارى قاراي ىلگەرىلەۋگە مۇمكىندىك بەرەدى.
الەمدىك ءبىلىم بايگەسىنىڭ جۇيرىگى
مەملەكەت تاراپىنان ءبىلىم بەرۋ سالاسىنا ءىجو-ءنىڭ 3-4% كولەمىندە تۇراقتى قارجىلاندىرۋ ءبولىنۋى جۇيەنىڭ ورنىقتى دامۋىنا جول اشىپ وتىر. بۇل جوعارى ءبىلىم بەرۋ سالاسىنداعى اۋقىمدى رەفورمالاردى ىسكە اسىرۋعا نەگىز بولادى. سونىمەن بىرگە حالىقارالىق سەرىكتەستىكتەر كەڭەيىپ, اكادەميالىق ۇتقىرلىق ارتىپ, ۋنيۆەرسيتەتتەر مەن ءوندىرىس اراسىنداعى بايلانىس كۇشەيىپ كەلەدى.
ساراپشىلاردىڭ ايتۋىنشا, قازىرگى كەزەڭنىڭ باستى ەرەكشەلىگى – «ورتاڭعى يادرو» شەڭبەرىندەگى باسەكەنىڭ كۇشەيۋى. بۇل جەردە زەرتتەۋ ساپاسى, جاھاندىق ىقپالداسۋ جانە ۋنيۆەرسيتەتتەردىڭ حالىقارالىق عىلىمي تىزبەكتەرگە كىرىگۋى شەشۋشى ءرول اتقارادى.
جالپى, قازاقستان بەرىك ينستيتۋتسيونالدىق نەگىز قالىپتاستىرىپ, اكادەميالىق بەدەلىن ارتتىرىپ كەلەدى, ەڭ قارقىندى دامىپ كەلە جاتقان ءبىلىم بەرۋ ورتالىقتارىنىڭ بىرىنە اينالىپ وتىر. جاھاندىق تالانتتار ءۇشىن باسەكە كۇشەيگەن جاعدايدا مۇنداي پوزيتسيا ۇزاق مەرزىمدى ەكونوميكالىق ءوسىم مەن بىلىمگە نەگىزدەلگەن ەكونوميكا قۇرۋعا بەرىك نەگىز بولادى.
گارۆاردتى باعىندىرعان قاراكوز نەمەسە قازاقستان ءبىلىمىنىڭ جاڭا كەزەڭى