استانا قالاسىندا ورنالاسقان «ATM Construction & Investment» كاسىپورنىندا قۇرىلىسقا قاجەتتى ۆيتراج, تەرەزە, مەتالل كونسترۋكتسيالىق بۇيىمدار وندىرىلەدى. مەديتسينالىق جابدىقتار جانە وعان قاجەتتى جيھازدار, مەكتەپ, بالاباقشا, كەڭسەگە قاجەتتى م ۇلىكتەردى دە جاسايدى.
ءبىر جىلدا 400 مىڭعا جۋىق ءونىم ءتۇرىن نارىققا شىعاراتىن كومپانيانىڭ ەل كولەمىندە تۇتىنۋشىسى قالىڭ. 180 ادامدى تۇراقتى جۇمىسپەن قامتىعان زاۋىت بيىل ءبىرىنشى توقساندا 96,05 ملرد تەڭگەنىڭ ءونىمىن وندىرگەن.
«كاسىپورىن بەس وندىرىستىك زاۋىتتان تۇرادى. بىرىنشىسىندە قۇرىلىسقا ەڭ قاجەتتى ءونىم – پلاستيك جانە اليۋمينيدەن ەسىك-تەرەزە جاسالسا, ەكىنشى زاۋىتتا مەديتسينالىق جابدىقتار قۇراستىرىلادى. ۇشىنشىدە «جايلى مەكتەپ» جوباسىنا ساي كەلەتىن مەكتەپ جابدىقتارى, مەديتسينا سالاسى مەن بارلىق كەڭسەگە قاجەتتى ءتۇرلى جيھازدار دايىندايمىز. ءتورتىنشى بولىكتە تەك اۋرۋحاناعا قاجەتتى ءتۇرلى كەرەۋەت, ال ەندى ءبىر زاۋىتتا مودۋلدىك مەتالل كونسترۋكتسيا بۇيىمدارى شىعادى. بۇگىندە تاعى ءبىر زاۋىتتىڭ قۇرىلىسى بىتۋگە تاياۋ. وندا مينەرالدى ماقتا ارقىلى ءۇي سىرتىن قاپتاۋعا كەرەكتى سەندۆيچ-پانەلدەر وندىرىلمەك», دەيدى سەرىكتەستىكتىڭ اتقارۋشى ديرەكتورى مۇرات چەتين.
اۋرۋحانا قۇرىلىسى باستالعان ۋاقىتتا الدىن الا جوسپارلاناتىن وپەراتسيالىق گاز كونسولدارى دا وسىندا دايىندالادى.
مەدبيكەلەرگە قاجەتتى سۇيرەتپە اربالار, شۇعىل وتا جاساۋ بولمەسىنە كەرەك ارنايى جابدىقتالعان ۇستەل مەن بىرنەشە موتورلى كەرەۋەتتىڭ كوپتەگەن ءتۇرى بار. اۋرۋدى تاسىمالداۋعا ارنالعان كاتالكا-سۇيرەتپەلەر دە – كومپانيانىڭ نەگىزگى ونىمدەرىنىڭ ءبىرى.
«گينەكولوگيالىق كرەسلودان بولەك, پەرزەنتحانا كەرەۋەتى مەن دۇنيەگە جاڭا كەلگەن سابيلەردى ورنالاستىرۋعا ارنالعان شاعىن جابدىقتار دا وسىندا. باستى شيكىزات تەمىر بولىكتەرى ءوز ەلىمىزدەن تابىلسا, مەديتسينالىق جابدىقتاردىڭ كەيبىر بولشەگى مەن پلاستيكالىق زاتتار تۇركيادان كەلەدى. جيھازعا قاتىستى شيكىزاتتى ازىرگە رەسەيدەن, سونداي كەيبىر «دسپ», ياعني اعاش قيقىمدارىنان سىعىمدالعان تاقتايلاردى رەسپۋبليكاداعى وندىرۋشىلەردەن دە الامىز. بىراق كوبىنە-كوپ ولار وندىرگەن تاقتايلار ءبىزدىڭ قويعان تالاپقا ساي كەلمەي جاتادى. جالپى, لاميناتتالعان اعاش بۇيىمدارىنىڭ ساپالى بولعانىن قالايمىز. سونىمەن قاتار ءبىزدىڭ تەرەزە-ەسىكتەرىمىزگە «BI Group», «Orda Invest» سەكىلدى ءىرى قۇرىلىس كومپانيالارى تاپسىرىس بەرەدى», دەيدى كاسىپورىن ديرەكتورىنىڭ كومەكشىسى انار سارسەنبەكوۆا.
كومپانيا قۇرىلىس سالۋعا دا بەلسەندى قاتىسادى. مەكتەپ, اۋرۋحانا, سونىمەن قاتار اۋەجاي قۇرىلىسىنا اتسالىسىپ, ىشكى قىزمەت كورسەتۋ, جابدىقتاۋ جۇمىستارىن دا قوسا اتقارادى. وزدەرى شىعاراتىن مەتالل كونسترۋكتسيالىق بۇيىمدار ارقىلى ساياجاي, جول پوليتسياسى مەن كۇزەتكە ارنالعان, سونداي-اق مەديتسينالىق شاعىن بەكەتتەر, جىلى ايالدامالار جانە اۆتوباندار بويىنداعى ءدامحانا, دارەتحانالاردى قۇراستىرادى. بۇل تىزىمگە قوزعالمالى-جينالمالى شاعىن جىلى باسپانا قۇرىلىسى دا كىرەدى.
«پاندەميا كەزىندە ءبىزدىڭ كومپانيا 68 كۇن ىشىندە البانيا ەلىندە كونسترۋكتسيالىق مەتالل جابدىقتارىن پايدالانا وتىرىپ, قالالىق اۋرۋحانا تۇرعىزدى. مۇنداي باعىتتاعى قۇرىلىستى ءبىزدىڭ ەلدە دە جۇرگىزۋگە بولادى, بىراق كليماتتىق جاعدايدى دا ەسكەرۋ كەرەك», دەيدى انار سارسەنبەكوۆا.
تاعى ءبىر جاڭالىق, كاسىپورىن استانا قالاسى اكىمدىگىنىڭ «JOLTAP» جوباسىمەن بىرلەسە جۇمىس ىستەيدى. بۇل جەردە ءوز مۇمكىندىگىن سىناپ, ءتۇرلى ماماندىقتى يگەرەم دەۋشىلەر اتالعان جوبامەن وندىرىسكە كەلىپ, ارنايى بەكىتىلگەن مۇعالىمنىڭ باعىتىمەن قوسالقى ماماندىق الىپ شىعادى. اتالعان جوبا ارقىلى وندىرىستە ءبىر اي كولەمىندە «دانەكەرلەۋشى» ماماندىعى وقىتىلىپ كەلەدى. مۇنداي كۋرستى بىتىرگەن كەيبىر ۇزدىك مامانداردى كاسىپورىن تۇراقتى جۇمىسقا قابىلداۋعا دا ىقىلاستى ەكەن.