بيىلعى جاڭا وقۋ جىلى قارساڭدا ەلوردانىڭ 5 مەكتەبىندە ينكليۋزيانى قولداۋ كابينەتتەرى اشىلادى. ءتيىستى سىنىپتار «Charity Samruk Marathon 2024» قايىرىمدىلىق مارافونىندا جينالعان قاراجات ەسەبىنەن جابدىقتالادى, دەپ جازادى Egemen.kz.
الەۋمەتتىك جوبا استانا قالاسىنىڭ بەس ءبىلىم مەكەمەسىن, ياعني №22, №36, №59, №76, №97 مەكتەپتەرىن قامتىپ, 150-گە جۋىق بالاعا قاجەتتى جاعدايدى جاساۋعا مۇمكىندىك بەرەدى. ينكليۋزيا كابينەتتەرىن جابدىقتاۋعا «سامۇرىق-قازىنا» قولداۋ ءبىلدىرىپ وتىر.
ءدال وسى مەكتەپتەردە ەرەكشە قاجەتتىلىگى بار بالالاردىڭ سانى كوپ جانە قۇرال-جابدىق پەن ادىستەمەلىك جاردەمگە مۇقتاج. سىنىپتار ءتورت بولەك بولمەدەن تۇرادى: لوگوپەد, دەفەكتولوگ, پسيحولوگ كابينەتتەرى جانە قىش شەبەرحاناسى. سونىمەن قاتار, ءار مەكتەپتە جەكە ەمدىك دەنە شىنىقتىرۋ كابينەتى اشىلادى. مۇعالىمدەر دە قاجەتتى دايىندىقتان وتەدى.
بۇگىن «Samruk-Kazyna Trust» كق باس ديرەكتورى الفيا اديەۆا بارلىق مەكتەپتى ارالاپ, جوندەۋ جانە باسقا دا ۇيىمداستىرۋ-ازىرلىك جۇمىستارىنىڭ بارىسىمەن ارنايى تانىستى.
«بۇل جوبانى جۇزەگە اسىرۋ قازاقستانداعى ينكليۋزيۆتى ءبىلىم بەرۋدى دامىتۋداعى ماڭىزدى قادام بولماق. جاڭا سىنىپتاردىڭ ارقاسىندا قانداي دا ءبىر ەرەكشەلىگىنە قاراماستان بارلىق بالاعا وقۋعا بىردەي جاعداي جاسالادى. وسىلايشا, قور ءبىلىم باسقارماسىمەن بىرلەسىپ, ينكليۋزيۆتى قولداۋ كابينەتتەرى ءۇشىن ينفراقۇرىلىمنىڭ جاڭا ۇلگىسىن ازىرلەدى. مىسالى, ولاردىڭ اۋماعى 60-70 شارشى مەتردەن كەم بولماۋى كەرەك. مەكتەپتەردە جوندەۋ جانە باسقا دا سىنىپتاردى اشۋعا دايىندىق جۇمىستارى باستالىپ كەتتى», دەدى «Samruk-Kazyna Trust» جەتەكشىسى.
ەسكە سالا كەتەيىك, 1 ماۋسىمدا وتكەن «Charity Samruk Marathon 2024» قايىرىمدىلىق مارافونىنا 2 مىڭنان استام ادام قاتىسىپ, 125 ميلليون تەڭگە جينالدى.