مەديتسينالىق قىزمەتتىڭ جاڭا مودەلى

شاھارداعى №1 ەمحانا مەملەكەتتىك كوممۋنالدىق-قا­زىنالىق كاسىپورنى دا – جا­ڭا تاجىريبەنى قولعا العان مە­كەمەنىڭ ءبىرى. ەمحانانىڭ باس دارىگەرى ماحامبەت بەيسەۋوۆ وسى باستامانىڭ ناتيجەسىندە جۇمىس ساپاسى جاقسارىپ, اۋرۋدى ەرتە انىقتاۋ كورسەتكىشى ارتقانىن جەتكىزدى.

– ۇزدىك تاجىريبەلىك ورتالىق قىزمەتىنىڭ نەگىزگى ماقساتى – مە­ديتسينالىق كومەكتىڭ قول­جەتىمدىلىگىن قامتاماسىز ەتۋ. ەم­حانا تۇرعىندارعا جاقىن ورنالاسۋ كەرەك. ياعني ازاماتتارعا ەمحاناعا باراتىن جول الىس بولماۋعا ءتيىس. ەگەر اۋماقتىق ۇلكەن ەمحانا بولسا, باسقا اۋدانداردان بولىمشەسىن اشۋعا بولادى. دارىگەرلەر سول جەردەن ناۋقاستاردى قابىلدايدى. تسيفرلاندىرۋ ناتيجەسىندە ناۋ­قاستار ءموبيلدى قوسىمشا ار­قىلى دارىگەرلەرگە الدىن الا جازىلاتىن بولعان. سو­نىڭ ناتيجەسىندە ەمحانادا بۇ­رىنعىداي ۇزىن سونار كەزەك ازايعان. مۇنىڭ بارلىعى دارىگەرگە الدىن الا جازىلىپ, باراتىن كۇندى ەرتەرەك جوس­پارلاۋدىڭ ناتيجەسىندە ىسكە اسىپ وتىر. ماماندار دا ءموبيلدى قوسىمشا ارقىلى ديسپانسەرلىك ەسەپتە تۇرعان ناۋقاستاردى كەزەگىمەن شاقىرىپ, تەكسەرۋدەن وتكىزەدى. دارىگەرگە قارالۋدى تەلەفونمەن رەتتەۋ ەمحاناعا كۇن سايىن اعىلىپ كەپ جاتاتىن ادام سانىن ازايتتى. ۇزدىك تاجىريبەلىك ورتالىقتىڭ تاعى ءبىر ۇتىمدى جەرى ناۋقاستاردى ارالاۋ ۋچاسكەلىك دارىگەر مەن مەدبيكەنىڭ عانا جەكە مىندەتىنە كىرمەيتىن بولدى. ولارمەن بىرگە ەندى پسيحولوگ پەن الەۋمەتتىك قىزمەتكەر دە قوسا ارالايدى. ياعني ۋچاسكەنى ارالاۋ جۇمىسىن ءتورت ماماننان قۇرالعان توپ ات­قارادى. قاجەت كەزدە توپقا ونكولوگ, كارديولوگ سىندى مامان­دار دا قوسىلا الادى, – دەدى م.بەي­سەۋوۆ.

ەمحانا باسشىسىنىڭ ايتۋىنشا, ۇزدىك تاجىريبەلىك ورتالىق قىزمەتىنە ءوتۋ ناتيجەسىندە ۋچاس­كەلىك دارىگەرلەر وتباسىلىق دا­رىگەر ساناتىنا كوشتى. ويتكەنى ۋچاسكە ارالايتىن توپ ناۋقاستىڭ ءوزىن عانا ەمەس, وتباسى مۇشەسىن تولىق جاۋاپكەرشىلىگىنە الىپ وتىر. ماسەلەن, ەگەر ناۋقاستىڭ دەنساۋلىعىندا كىنارات بولسا, دارىگەر قارايدى, الەۋمەتتىك پرو­بلەمانىڭ بارىن بايقاسا, الەۋمەتتىك قىزمەتكەر باعىت-باع­دار سىلتەيدى. سول سەكىلدى پسيحولوگ تا ءوز قىزمەتىن كورسەتەدى. توپ­تىڭ قۇرامىندا پسيحولوگ ماماننىڭ بولۋى وتە ماڭىزدى دەپ سانايدى م.بەيسەۋوۆ. سەبەبى قازىر الەۋمەتتىك قيىندىقتاردىڭ سالدارىنان ۋايىمعا سالىنىپ, ءتىپتى ءوز-وزىنە قول جۇمساۋعا دەيىن باراتىن ادامدار كوبەيىپ بارادى.

بۇرىنعى كەزدە الەۋمەتتىك قىزمەتكەرلەر مۇگەدەكتىگى بار ناۋ­قاستارعا ءدارى-دارمەك­تى ۇيىنە دەيىن جەتكىزىپ تۇرا­تىن. نەمەسە حالىققا قىز­مەت كورسەتۋ ورتالىعى ارقى­لى ءتيىس­تى قۇجاتتارىن رەسىم­دەۋگە كومەكتەسەتىن. ۇزدىك تاجى­ري­بەلىك ورتالىق الەۋمەتتىك قىز­مەتكەرلەرگە جاڭا مىندەتتەر جۇك­تەدى. بۇدان بىلاي ولار ناۋ­قاس تۇرىپ جاتقان ۇيلەردىڭ اۋلا تازالىعىنا, جاڭا تۋعان نا­رەستەنىڭ وتباسىنداعى جاع­دايىنا دا قارايدى. ماسەلەن, پەرزەنتحانادان شىققان ءسابيدىڭ ۇيىندە تۋبەركۋلەزبەن نەمەسە ونكولوگيالىق اۋرۋمەن اۋىرىپ جاتقان ناۋقاستار بولۋى مۇمكىن. مۇنداي جاعدايدا الەۋمەتتىك قىزمەتكەر ۋچاسكەلىك دارىگەرمەن بىرگە ول ناۋقاستاردىڭ اۋرۋحانادا قوسىمشا ەمدەۋ تەراپياسىنان ءوتۋىن قامتاماسىز ەتەدى. ياعني نارەستەنىڭ دەنساۋلىعىنا ەشنارسە قاۋىپ توندىرمەۋى كەرەك. ءتىپتى توپ قۇرامىنداعى ماماندار ۋچاسكە اۋماعىنان الەۋ­مەتتىك جاعدايدىڭ جاسال­ما­عانىن نەمەسە ماسكۇنەم, ناشا­قور سەكىلدى قوعامعا زيا­نى بار ادامداردى بايقاسا, اكىمدىك وكىل­دەرى مەن جەرگىلىكتى پولي­تسيا قىزمەتكەرلەرىن شا­قىر­تۋعا قۇقىلى. سوندىقتان ەمحاناداعى ءار توپتىڭ كارتاسى بولادى. وندا كەيستەر, ياعني پروب­لە­مالىق ۋچاس­كەلەر كورسەتىلەدى. ماماندار توبى سول ماسەلەنى شەشۋگە تىرىسادى. وسىلايشا, ەمحانا بريگاداسىنا ءوز اۋماعىنداعى پروبلەمالىق نۇكتەلەردى جويۋ ءۇشىن زور جاۋاپ­كەرشىلىك ارتىلعان.

– ۇزدىك تاجىريبەلىك ورتا­لىققا ءوتۋ ءۇشىن الدىمەن تا­راز, الماتى قالالارىنداعى ارىپ­­تەستەرىمىزدەن ءبىراز نارسە ۇيرەندىك. دارىگەرلەر ءوز الدىنا, الەۋمەتتىك قىزمەتكەرلەر دە ءوز سالالارى بويىنشا تا­جى­ريبە جينادى. سوسىن اس­تانادان ورتالىق جۇمىسىن ارنايى وقىتاتىن مامانداردى شاقىرتتىق. ەلوردادان كەلگەن ماماندار ءبىزدىڭ جۇمىسىمىزدى باعالاپ, وزدەرىنىڭ تاجىريبەلەرى بويىنشا ەمحاناداعى ءبىراز قۇرىلىمدى وزگەرتتى. سونىڭ ناتيجەسىندە قىزمەت كورسەتۋ ءتاسىلى وڭتايلاندى. ونى كۇندە كەلىپ جۇرگەن ناۋقاستار دا بىر­دەن بايقادى. بۇرىن ۋچاس­كەلىك دا­رىگەرلەر ونكولوگ, كارديولوگ سىندى ارنايى ماماندارمەن ارالاسىپ وتىرا بەرەتىن. قازىر ولاردىڭ ارقايسىسىن بولەك قاباتتارعا جايلاندىردىق. ياعني ەمحانانىڭ ءبىرىنشى قاباتى مەديتسينالىق دياگنوستيكاعا ارنالسا, ەكىنشى قاباتىندا ۋچاس­كەلىك دارىگەرلەر كابينەتى ورنالاسقان. ءۇشىنشى قاباتتا ەمحانانىڭ اكىمشىلىك قىز­مەتكەرلەرى مەن ارنايى مامان-دارىگەرلەرى قىزمەت كورسەتەدى. سونداي-اق ۇزدىك تاجىريبەلىك ور­تالىق اياسىندا ناۋقاستاردى قولداۋ قىزمەتى دەگەن ارنايى جوبانى ىسكە اسىردىق. ول بويىنشا ەمحانانىڭ كىرەبەرىس اۋماعىنان ورىن بەلگىلەپ, سول جەردە ماماندارىمىز كەلگەن ناۋقاستارعا ءتۇرلى مەديتسينالىق-الەۋمەتتىك ماسەلەگە قاتىستى اقىل-كەڭەسى­ن ايتادى. ءتىپتى كەستەسىن دە تۇز­دىك, ماماندار سول بويىنشا كە­زەگىمەن جۇمىسقا تۇسەدى. ولار­دىڭ ىشىندە قاراپايىم دا­رىگەردەن باستاپ, ەمحانانىڭ ءبولىم مەڭگەرۋشىلەرى, ورىنبا­سارلار مەن باس دارىگەرگە دەيىن بار. ەگەر ناۋقاستىڭ جاع­دايى كۇردەلى بولىپ جاتسا, ءبىرىن­شى قاباتقا بارلىق ماماندى جي­ناپ, كونسيليۋم وتكىزىپ جىبە­رەمىز, – دەدى م.بەيسەۋوۆ.

باس دارىگەردىڭ مالىمدەۋىنشە, حالىق جاڭا وزگەرىستەردى جىلى قابىلدادى. باستاپقى كەزدە كىشكەنە تۇسىنبەۋشىلىكتەر دە بولعان. ماسەلەن, ارنايى مامانداردى ءۇشىنشى قاباتقا كوشىرگەندە نارازىلىق بىلدىر­گەندەر تابىلعان. ال قازىر ەم­حاناعا كەلۋشىلەر مۇنداعى قىزمەتكە تەك ريزا بولىپ كە­تەدى. ويتكەنى جۇمىستىڭ ءبارى ءبىر جۇيەگە كەلتىرىلگەن. ار­نايى ماماندار ءۇشىنشى قاباتتا وتىر­عانىمەن, ءبىر جەردە شوعىرلانعان سوڭ ارقايسىسىنا قارالىپ كەتۋ ناۋقاستارعا دا وڭاي بولىپ تۇر.

بۇگىنگى تاڭدا ۇزدىك تاجىري­بەلىك ورتالىق مودەلىن شىم­كەنت­تىك دارىگەرلەر وزگە وڭىر­لەردەن ۇيرەنىپ قانا قويماي, باسقا ايماقتاردىڭ ماماندارى دا تاجىريبە الماسۋ ءۇشىن شىم­قالاعا كەلىپ جاتىر. ماسەلەن, ماڭعىستاۋ, ۇلى­تاۋ وبلىستارىنان كەلگەن ارنايى دەلەگاتسيا قالالىق №1, №6 ەم­حانالاردىڭ ۇلگىلى جۇ­مىستارىمەن تانىستى. دەن­ساۋلىق ساقتاۋ ۇيىمدارىنىڭ وكىل­دەرى, الەۋمەتتىك قىز­مەت­كەرلەر, پسيحولوگتەردەن قۇ­رالعان 30-عا جۋىق مامان شىم­كەنتتىك ارىپتەستەرىنەن تاجى­ريبە ۇيرەنىستى. ءوز كەزەگىندە ماڭعىستاۋ وبلىسى دەنساۋلىق ساق­تاۋ باسقارماسىنىڭ باسشىسى ب.ءىزباسار وڭىردەن 3 ۇزدىك تاجىريبەلىك ورتالىق اشۋدى كوزدەپ وتىرعانىن جەتكىزدى.

شىمكەنت