اقتوبە. 26 ءساۋىر. قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى اقتوبە وبلىسىندا بەلسەندى وتۋدە. بۇگىن 14 اۋماقتىق كوميسسيا جۇمىس ىستەپ, 521 سايلاۋ ۋچاسكەسى ەسىگىن ايقارا اشتى. بۇل تۋرالى egemen.kz ءتىلشىسى حابارلادى.
وبلىس بويىنشا 448 مىڭنان استام سايلاۋشى تاڭداۋ جاسايدى. بۇل سايلاۋعا الىس-جاقىن شەتەلدەردەن كوپتەگەن باقىلاۋشىلار قاتىسۋدا. وڭىرگە كورشىلەس جاتقان رەسەيدىڭ ورىنبور وبلىسىنىڭ وزىنەن 19 بايقاۋشى كەلدى. ءبىز بارعان №61 سايلاۋ ۋچاسكەسىندە ساعات 07:30-دا 50-دەن استام سايلاۋشى ءوز تاڭداۋلارىن جاساپ ۇلگەرگەن ەكەن.
سايلاۋدا العاش داۋىس بەرۋشىگە, سونداي-اق, ەڭ قارت سايلاۋشىعا قۇرمەت كورسەتىلىپ, سىي-سياپات جاسالدى. سايلاۋ ۋچاسكەلەرىندە مەرەكەلىك كوڭىل-كۇي بايقالادى. مەتاللۋرگتەر مادەنيەت ۇيىندە ورنالاسقان №32 سايلاۋ ۋچاسكەسىنە كەلگەنىمىزدە ادامداردىڭ قاراسى كوپ بولدى. مۇندا كۇندىزگى 11:00 ساعاتقا دەيىن تىركەلگەن سايلاۋشىلاردىڭ 52 پايىزى داۋىس بەرىپ ۇلگەرىپتى. بۇل مەتاللۋرگتەردىڭ ەڭبەكتە عانا ەمەس, قوعامدىق ساياسي ومىردە دە بەلسەندىلىگىن تاعى ءبىر اڭعارتتى.
جالپى, وبلىس بويىنشا 12:00-گە دەيىن سايلاۋشىلاردىڭ 36,2 پايىزى ءوز تاڭداۋلارىن جاسادى.
ساتىبالدى ءساۋىرباي.
دەرەك, سۋرەت: egemen.kz.