ول كىم؟

جالپى, بۇل سەريامەن شىققان كىتاپ ءبىر تۇلعا تۋرالى تولىق اقپارات بەرەدى. ياعني ونىڭ تۋعاننان باستاپ قايتىس بولعانعا دەيىنگى ءومىرى قامتىلادى. دالىرەك ايتقاندا, تۇلعانىڭ بالالىق شاعى (بالا كەزىندەگى ەرەكشەلىگى, قابىلەتى, باسىنان وتكەن قىزىقتى وقيعالار), عىلىم, ءبىلىم, ونەر جولىنداعى العاشقى قادامى, ءومى­رىنىڭ وزگەرۋىنە ىقپال ەتكەن وقيعا (العاشقى جەتىستىگى, جۇلدەسى, ەرلىگى, ت.ب.), جەكە ءومىرى (وتباسى, دوستارى, ءومىر تۋرالى كوزقاراسى, مى­نەزى, بىرەگەي ادەتتەرى, اينالاسىنداعىلارمەن قارىم-قاتىناسى, ت.ب.), ءوسۋ جولىنا ىقپال ەتكەن, كەدەرگى بولعان ادام­دار مەن وقيعالار, باسىنا تۇسكەن قيىندىقتار, كۇرەس جولى, ەل تاريحىنا قوسقان ۇلەسى, (تۇلعانى اڭىز ادامعا اينالدىرعان جەتىستىگى, اشقان جاڭالىعى), ارمان-ماقساتى, وكىنىشتەرى, قوعامداعى ءرولى ء(وز سالاسىنان تىس) جانە ءومىرىنىڭ سوڭعى جىلدارى (قايتىس بولعان ادامنىڭ ءومىرىنىڭ سوڭى نەمەسە كوزى ءتىرى تۇلعانىڭ قازىرگى ءومىرى, قايدا تۇراتىنى, نەمەن اينالىساتىنى, ت.ب.) باياندالادى. اۆتور تۇلعا تۋرالى كىتاپتى 8-10 تا­راۋعا ءبولىپ, كەزەڭ-كەزەڭىمەن تارقاتىپ جا­زىپ شىعادى.

تانىمدىق كىتاپتىڭ تاعى ءبىر ەرەكشەلىگى – ءار تاراۋدا سول كەزەڭدە بولعان تاريحي وقيعانى, قۇبىلىستى اشاتىن قىزىقتى مالىمەتتەر كەزدەسەدى. ۇلكەن شريفتپەن بەرىل­گەن مالىمەتتى وقىرمان كوز توقتاتىپ وقي الادى.

ەرەسەك ومىردە اقپارات اعىنى كوپ. ونىڭ ءبىرى ەسىڭدە بولسا, ءبىرى ۇمىتىلىپ قالادى. ال بالا كەزدە وقىعان كىتاپتىڭ كوبى ەستەن كەتپەيدى, ءتىپتى ءومىر بويى جادىڭدا ساقتالۋى مۇمكىن. بۇل كىتاپتاردى دا بالا كىشكەنتايىنان وقىپ وسسە, تۇلعا تۋرالى تۇسىنىگى قالىپتاسادى. بالانىڭ تانىمىنا لايىق, جەڭىل تىلمەن جازىلعان كىتاپتا ءبىر تۇلعا تۋرالى جۇيەلى اقپارات بار. سونداي-اق كىتاپ سوڭىندا جىلدار بويىنشا حرونولوگيا بەرىلگەن. وندا سول كەزەڭدە الەمدە جانە قازاقستاندا قانداي وقيعالار بولعانى قامتىلعان.

«ول كىم؟» سەرياسىمەن وسى كۇنگە دەيىن 12 كىتاپ جارىق كورگەن. قازىر «جوشى حان كىم؟» كىتابى باسپادا جاتىر. تامىز ايىندا «قابانباي باتىر كىم؟» شىقپاق. الداعى ۋاقىتتا بۇل ءتىزىم جالعاسادى. باسپا ۇجىمى قازاقتىڭ حاندارى مەن باتىرلارى, الاش زيا­لىلارىن تۇ­گەندەمەك جوسپارى بار. ال اۆتورلارعا ءبىر كىتاپتى جازۋعا 1-1,5 اي ۋاقىت بە­رىلەدى. كىتاپتا سكەتچ ستيلىندە 50-70 سۋرەت بولادى. ونى سۋرەتشىگە ارنايى سالدىرادى. ول دا بالانىڭ كىتاپتى قىزىعا وقۋىنا اسەر ەتەدى.

ايتا كەتەيىك, سەريانىڭ جاس ەرەكشەلىگى 6+ بولعانىمەن, مۇنى باستاۋىش مەكتەپتىڭ وقۋشىلارىنان باستاپ, ەرەسەك وقىرمانعا دەيىن وقي الادى. كىتاپ سوڭىندا تالقىلاۋ سۇراقتارى مەن ارنايى تەست بەرىلگەن. وقىپ بولعان سوڭ تالقىلاۋ سۇراقتارىن قويىپ, بالانىڭ نەنى تۇسىنگەنىن تەكسەرۋگە بولادى. سونىمەن بىرگە بۇل ساۋالدارعا جاۋاپ بەرۋ ارقىلى جاس وقىرمان ءوز ويىن ەركىن جەتكىزىپ, ءتۇرلى تاقىرىپتا سويلەپ ۇيرەنەدى, تانىمى ارتادى.

ءيا, اتالعان سەريامەن شىعىپ جاتقان كىتاپتاردىڭ سانالى ءھام ۇلتجاندى ۇرپاق تاربيەلەۋگە تيگىزەر ىقپالى زور. اسىرەسە, بۇگىنگىدەي سمارتفون زامانىندا ءوسىپ جاتقان بالالارعا ءوز حالقىنىڭ ايتۋلى تۇلعالارىن تانىتۋعا تاپتىرماس ەڭبەك.