پەتروپاۆل. 26 ءساۋىر. سولتۇستىك قازاقستان وبلىسىندا داۋىس بەرۋدە جاستاردىڭ بەلسەندىلىكتەرى ەرەكشە بايقالۋدا. بيىل العاش رەت داۋىس بەرىپ, ءوز تاڭداۋىن جاساعان جاس سايلاۋشىلاردىڭ ءبىرى – جانارگۇل مەيرام. ول پرەزيدەنت سايلاۋىنا قاتىسۋدى بولاشاعىنا سەنگەن ءار ازاماتتىڭ نەگىزگى مىندەتى دەپ سانايدى. بۇل تۋرالى egemen.kz ءتىلشىسى حابارلادى.
«مەن بيىل العاش العاش رەت داۋىس بەردىم. بۇگىنگى تاڭدا كوپۇلتتى ەلىمىزدەگى تۇتاستىق پەن بىرلىك, مادەنيەتتەر مەن دىندەردىڭ ۇندەسۋى الەمدىك تاجىريبە رەتىندە تانىلعان. ءبىز تاۋەلسىزدىك تۋى جەلبىرەگەن ەلىمىزدە ۇلتتار مەن ۇلىستاردىڭ ناسىلدىك, ەتنوستىق, ءدىني جانە الەۋمەتتىك تەڭ قۇقىقتىلىعىنا قول جەتكىزگەن مەملەكەت سانالامىز. ازاماتتىق تاتۋلىق پەن ەتنوسارالىق كەلىسىم باستى قۇندىلىعىمىزعا اينالدى. قازاقستاننىڭ سىرتقى جانە ىشكى ساياساتى بەيبىتشىلىك پەن كەلىسىمگە, سەنىم مەن تۇراقتىلىققا نەگىزدەلگەن. ءبىز سياقتى جان-جاقتى ءتالىم-تاربيە الىپ جۇرگەن وسكەلەڭ ۇرپاق ازاماتتىق تەڭدىك, ەڭبەكسۇيگىشتىك, ادالدىق, وقىمىستىلىق, بىلىمدىلىك سياقتى «ماڭگىلىك ەل» يدەيالارىن باستى قاعيدا سانايدى», دەيدى جانارگۇل.
بۇگىنگى سايلاۋدا ءوزىنىڭ بولاشاعى ءۇشىن تاڭداۋ جاساعانىن ايتقان ول: «بارشامىزدىڭ ورتاق ءۇيىمىز – كەڭ-بايتاق قازاقستاننىڭ قامىن ويلاپ, حالقىمىزدىڭ ەڭسەلى ەرتەڭىنە, تاتۋلىقپەن اتقان ءار تاڭىنا الاڭدايتىن بولساق, ءار داۋىس ماڭىزدى دەر ەدىم. حالقىمىزدىڭ ەگەمەندىك العاننان كەيىنگى جولىنا, جەتكەن جەتىستىكتەرىنە كوز جۇگىرتىپ, سارالاپ, تەرەڭنەن تولعانا كەلىپ, وسىنداي شەشىمگە كەلدىم. ساياسي ناۋقانعا قاتىسىپ, ءوز داۋسىمدى تاڭداعان ۇمىتكەرگە بەرۋ قۇقىنا يە بولعانىمدى ماقتان ەتەمىن. وسى مەزەتتەن باستاپ ءوزىمدى ەلىمنىڭ العا قاراي دامۋىنا ۇلەس قوساتىن ەركىن ەلدىڭ ەرتەڭى, وتانىمنىڭ پاتريوتى رەتىندە سەزىنىپ ءجۇرمىن», – دەدى.
سونىمەن قاتار, بۇگىنگى جاس ۇرپاقتىڭ ءبىلىم الىپ, ءوزىن جان-جاقتى كورسەتۋىنە مەملەكەت تاراپىنان بارلىق جاعداي جاسالىپ وتىرعانىن تىلگە تيەك ەتكەن جاس سايلاۋشى: «ەلىمىزدىڭ ودان ءارى كەمەلدەنە بەرەتىنىنە, ول ءۇشىن جاسالىپ جاتقان جۇمىستاردىڭ بارلىعى ءوز ناتيجەسىن بەرىپ, قازاقستاندى الەمنىڭ ەڭ دامىعان 30 مەملەكەتىنىڭ قاتارىنان كورەتىنىمىزگە كامىل سەنەمىن», – دەدى.
ءومىر ەسقالي.
دەرەك, سۋرەت: egemen.kz.