تالدىقورعان. 26 ءساۋىر. جەتىسۋلىقتار بۇل كۇنى ەرتەلەتە سايلاۋ ۋچاسكەلەرىنە اسىقتى. بەيقۇت زاماندا كونستيتۋتسيالىق قۇقىعىنا ساي ءتول مىندەتىن ورىنداۋشىلار پاراساتتىلىق پەن مادەنيەتتىلىك تانىتتى. بۇل تۋرالى egemen.kz ءتىلشىسى حابارلادى.
سايلاۋ ۋچاسكەلەرىنە كەلىپ-كەتۋشىلەر مىڭداپ سانالعانىمەن ادامدار اراسىنداعى سىيلاسىمدىلىق, ۇلكەنگە كورسەتىلگەن مەيىرىمدىلىك پەن كىشىگە جاسالعان ءىلتيپات كورگەن جاندى ءسۇيسىنتتى.
«قىزمەت بابىنا وراي كوپتەن بەرى وسى سايلاۋ ناۋقانىنداعى جاۋاپتى جۇمىسپەن اينالىسىپ ءجۇرمىن. وسىعان دەيىنگى سايلاۋلارمەن سالىستىرعاندا بۇگىنگى قازاقستان رەسپۋبليكاسى پرەزيدەنتتىگىنە ۇمىتكەرلەردى سايلاۋعا حالىقتىڭ قاتىسۋ بەلسەندىلىگى جوعارىلاپ, مادەنيەتتىلىكتىڭ تاماشا ءارى ۇيلەسىمدى قىرىن كورسەتتى. بۇل قۋانا قۇپتارلىق جايت. بۇگىن 26 ءساۋىر كۇنى تاڭعى ساعات 7:00-دە الماتى وبلىسى بويىنشا 883 سايلاۋ ۋچاسكەسى سايلاۋشىلارعا ەسىكتەرىن ايقارا اشتى. مىنە, ساعات 12:00-دە وبلىس بويىنشا سايلاۋعا قاتىساتىندىعى انىقتالىپ, تىركەلگەن 945 708 سايلاۋشىلاردىڭ 573 860 سايلاۋشىلارى, ياعني, 60,68 پايىزى داۋىس بەردى. ەلدىڭ سايلاۋعا دەگەن بەلسەندىلىگىنىڭ ارتۋى رەسپۋبليكامىزداعى الەۋمەتتىك-ەكونوميكالىق جاعدايدىڭ جاقسارعانىن جانە حالىقتىڭ ساياسي بەلسەندىلىگىنىڭ كوتەرىلگەندىگىن كورسەتەدى», – دەيدى الماتى وبلىستىق سايلاۋ كوميسسياسىنىڭ مۇشەسى شىراقباي جىلقايداروۆ.
نۇربول الدىباەۆ.
دەرەك, سۋرەت: egemen.kz.