مادەنيەت جانە اقپارات ءمينيسترى ايدا بالاەۆا قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن ەليمەن كەزدەستى. تاراپتار ەكى ەل اراسىنداعى مادەني-گۋمانيتارلىق سالاداعى ىنتىماقتاستىقتى نىعايتۋ ماسەلەلەرىن تالقىلادى.
قازاقستان مەن قىتاي مەملەكەتتەرى اراسىندا ديپلوماتيالىق قارىم-قاتىناس وسىدان 32 جىل بۇرىن, ياعني 1992 جىلدىڭ 3 قاڭتارىندا ورنادى. شيرەك عاسىردان استام ۋاقىت ىشىندە ەكى ەل ستراتەگيالىق ارىپتەس ءارى ىنتىماقتاستىعى بەرىك ەلگە اينالدى. ديپلوماتيالىق كەلىسىم اياسىندا ءوزارا بىرقاتار قۇجاتقا قول قويىلدى. سايكەسىنشە, ەكى ەل اراسىندا مادەني الماسۋلار ودان ءارى تەرەڭدەي ءتۇستى.
كەزدەسۋدە ايدا بالاەۆا توراعا سي ءتسزينپيننىڭ مەملەكەتتىك ساپارى جانە ونىڭ شىۇ مەملەكەتتەر باسشىلارى كەڭەسىنىڭ سامميتىنە قاتىسۋى ەلدەر اراسىنداعى ەكىجاقتى قارىم-قاتىناسقا جاڭا سەرپىن بەرەتىنىنە ايرىقشا توقتالدى. سونداي-اق قىتاي تاراپىن استاناداعى قىتاي مادەني ورتالىعىنىڭ ءساتتى تىركەلۋىمەن قۇتتىقتادى.
– قازاقستان مەن قىتاي ءۇشىن مادەني ورتالىقتاردىڭ اشىلۋى ايتۋلى وقيعا بولاتىندىعىن ايتا كەتۋ ماڭىزدى. وسى باعىتتاعى ءوزارا بايلانىس بولاشاقتا تەك قارقىندى تۇردە دامىپ, ەكى ەل حالقى ءۇشىن وڭ ناتيجە بەرەدى. بۇل مادەني الاڭ حالىقتارىمىزدىڭ ءبىر-بىرىنە جاقىن بولۋىنا مۇمكىندىك بەرەدى دەپ سەنەمىن, – دەدى مينيستر.
وتىرىستا مادەنيەت جانە اقپارات مينيسترلىگىنىڭ ارحيۆ سالاسىندا, قىتايداعى قازاقستانعا قاتىستى تاريحي قۇجاتتار مەن جادىگەرلەردى قايتارۋ بويىنشا ىنتىماقتاسا جۇمىس ىستەۋگە دايىن ەكەنى ءسوز بولدى. ءوز كەزەگىندە, قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى بىرلەسە قىزمەت ەتۋگە ءازىر ەكەنىن جەتكىزدى. باعدارلاما بويىنشا كەلىسكەننەن كەيىن قىتاي تاراپى دەرەۋ جۇمىسقا كىرىسىپ, ءتيىستى ورگاندارعا قۇجاتتار تاپسىراتىنىن ايتتى.
– ەلدەرىمىزدىڭ مادەني ىنتىماقتاستىعى حالىقتارىمىز اراسىنداعى ءوزارا تۇسىنىستىك پەن دوستىقتى نىعايتۋدا شەشۋشى ءرول اتقارادى. ءبىز بىرلەسكەن مادەني جوبالار مەن باستامالاردىڭ ۇلكەن الەۋەتىن كورىپ وتىرمىز, – دەدى سۋن ەلي.
كەزدەسۋ سوڭىندا تاراپتار باسقوسۋ ەلدەر اراسىنداعى مادەني-گۋمانيتارلىق بايلانىستاردى ودان ءارى دامىتۋعا تاعى ءبىر قادام بولاتىنىنا سەنىم ءبىلدىردى.