بيىلعى 1 شىلدەدەن باستاپ ەلىمىزدىڭ ورمان جانە تابيعاتتى قورعاۋ مەكەمەلەرىنىڭ قىزمەتكەرلەرى لاۋازىمدىق جالاقىلارىنا ۇستەمەاقى الا باستايدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
اتاپ ايتقاندا, ورمان جانە تابيعاتتى قورعاۋ ۇيىمدارىنىڭ قىزمەتكەرلەرىنە ەڭبەكاقى تولەۋ جۇيەسىن, شارتتارى مەن مولشەرىن جاقسارتۋ ماقساتىندا «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ۇكىمەت قاۋلىسىنا وزگەرىستەر ەنگىزىلدى.
قۇجاتقا سايكەس ورمان ءورتىن ءسوندىرۋ ستانسالارىنىڭ, ورمان مەكەمەلەرىنىڭ, تابيعات قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا 100%-عا دەيىن ۇستەمەاقى الادى. ولاردىڭ ىشىندە ورمان ءورتىن سوندىرۋشىلەر, ءورت ءسوندىرۋ ماشينالارىنىڭ جۇرگىزۋشىلەرى, تراكتورشى-ماشينيستەر, راديووپەراتورلار, ءورت ءسوندىرۋ ماشينالارىن, جابدىقتارى مەن اپپاراتۋرالارىن جوندەيتىن سلەسارلار, ءورت-باقىلاۋ مۇناراسىنىڭ باقىلاۋشىلارى بار. سونداي-اق 113 اۆياتسيالىق كۇزەت ءورت ءسوندىرۋشى-دەسانتشىسىنىڭ جالاقىسى كوتەرىلەدى.
قاۋلىنى ىسكە اسىرۋعا 2024-2027 جىلدارعا ارنالعان رەسپۋبليكالىق بيۋدجەتتەن 8 480,1 ملن تەڭگە كولەمىندە قارجىلىق شىعىندار كوزدەلگەن. بارلىعى 3,3 مىڭعا جۋىق قىزمەتكەر قوسىمشا اقىمەن قامتىلاتىن بولادى.
جەرگىلىكتى اتقارۋشى ورگانداردىڭ ورمان شارۋاشىلىعى مەكەمەلەرىنىڭ ورمان ءورت ءسوندىرۋ ستانسالارىنىڭ 1 619 قىزمەتكەرىنە قوسىمشا اقى تولەۋدى قارجىلاندىرۋ جەرگىلىكتى بيۋدجەت قاراجاتى ەسەبىنەن جوسپارلانادى.
بۇعان دەيىن پارلامەنت سەناتىنىڭ دەپۋتاتى ولگا بۋلاۆكينانىڭ سۇراۋىنا جاۋاپ بەرە وتىرىپ, ۇكىمەت باسشىسى ورمان جانە تابيعاتتى قورعاۋ مەكەمەلەرىنىڭ بارلىق قىزمەتكەرلەرىنىڭ جالاقىسىن كوتەرۋ ماسەلەسى ءوزىنىڭ تۇراقتى باقىلاۋىندا ەكەنىن جانە ءتيىستى قاۋلىنىڭ جوباسى دايىندالعانىن ايتتى. دەپۋتات «سەمەي ورمانى» رمم بورودۋليحا فيليالىنىڭ قىزمەتكەرلەرى ءۇشىن قوسىمشا اقىلار تاقىرىبىن كوتەردى.
2023 جىلدىڭ شىلدەسىندە مەملەكەت باسشىسى ق.توقاەۆتىڭ تاپسىرماسىن ىسكە اسىرۋ اياسىندا ورمان قۇرىلىمدارى قىزمەتكەرلەرىنىڭ ومىرىنە جانە دەنساۋلىعىنا قاۋىپ توندىرەتىن جۇمىسى ءۇشىن لاۋازىمدىق جالاقىلارىنا 100% ۇستەمەاقى بەلگىلەندى.