يرلانديالىق UFC فايتەرى يان گارري وتانداسىمىز شاۆكات راحمونوۆتى جەكپە-جەككە شاقىردى, دەپ جازادى Egemen.kz vesti.kz-كە سىلتەمە جاساپ.
ول راحمونوۆپەن جۇدىرىقتاسۋ نيەتىن UFC 303 تۋرنيرىندە بريتاندىق مايكل پەيدجدى (22-3) جەڭگەننەن كەيىن ايتتى.
«مەن شاۆكاتپەن جاتتىعۋ زالىندا بىرگە دايىندالدىم. راحمونوۆتى سىيلايمىن, بىراق ونىڭ جەڭىلىس ناتيجەسىندەگى 0 كورسەتكىشىن بۇزامىن. ونى جەڭگەن ءبىرىنشى ادام بولعىم كەلەدى, ونى قالاي ىستەۋ كەرەك ەكەنىن بىلەمىن», دەدى يان گارري.
ال شاۆكات راحمونوۆ ونىڭ شاقىرتۋىنا ح پاراقشاسىندا ىلە-شالا جاۋاپ بەردى.
«يان جاتتىعۋ كەزىندە نە بولعانىن ۇمىتىپ قالعان سياقتى. بولاشاقتا ەسىنە تۇسىرۋگە قارسى ەمەسپىن», دەپ جازدى ول.
ايتا كەتەيىك, وتانداسىمىز بۇل جىلى ءالى جەكپە-جەككە شىقپادى. ول كەيىنگى كەزدەسۋىن بىلتىر جەلتوقسان ايىندا وتكىزىپ, امەريكالىق ستيۆەن تومپسوندى (17-7-1) ەكىنشى راۋندتا تىزە بۇكتىرگەن ەدى.