اۋىل بالاسى توپ جاردى

اۋەلى تەستىلەۋدىڭ سوڭعى جاڭالىقتارى مەن ارالىق قورىتىندى ناتيجەلەرى­نە توقتالساق. ۇلتتىق تەستى­لەۋ ورتالىعىنىڭ تاراتقان اقپاراتىنا سۇيەنسەك, نەگىزگى ۇبت باستالعان 6 اپتانىڭ ىشىندە 264 مىڭ رەت تەست تاپسىرىلدى, شەكتى بالدى 77% تالاپكەر جينادى, ورتاشا بالل 69-دى قۇرادى. ونىڭ ىشىندە تالاپكەرلەردىڭ 75%-ى قازاق تىلىندە, 25%-ى ورىس تىلىندە, 197 ادام اعىلشىن تىلىندە تەستىلەۋدەن ءوتتى. 6 اپتادا ۇبت-عا ەرەكشە ءبىلىم قاجەتتىلىكتەرى بار 620 ۇمىتكەر قاتىستى.

ەندى تەستىلەۋدە رەكورد جاڭارتقان جانعا ورالساق, ماكسيمالدى 140 بالل العان تالاپكەر ۇبت-نى «ماتەماتيكا-ينفورماتيكا» كوم­بيناتسيا­سى بويىنشا وتكەن بەيسەنبى, ياعني 27 ماۋسىم كۇنى الماتى وبلىسىنىڭ ەسىك قالاسىندا تاپسىرعان. سوڭعى رەت ۇبت ناتيجەسى بو­يىنشا 140 بالدى پاۆلودار وبلىسىنىڭ تالاپكەرى 2021 جىلى جيناعان ەدى, ونىڭ الدىندا 2018 جىلى الماتى قالاسىنىڭ تالاپكەرى جينادى. اراعا ءۇش جىل سالىپ, رەكورد قايتا جاڭاردى.

ءبىز اتالعان وقۋ وشاعى­نىڭ باسشىلىعىمەن, ۇبت ۇزدىگى­نىڭ اناسىمەن ارنايى تىلدەس­تىك. قارابۇلاق اۋلىنداعى №22 ورتا مەكتەپتىڭ ديرەكتورى جاڭاگۇل مولدابەكوۆا جاننۇردىڭ بىلىمدە عانا ەمەس, ونەردە دە وزات ەكەنىن ايتتى.

– توبەمىزدى ءبىر ەلى كوككە جەتكىزبەي تۇرعان تۇلە­گىمىز جاننۇر ءبىزدىڭ مەكتەپتە 1-سىنىپتان باستاپ وقىدى. ۇزدىك وقۋشىمىز – وتە دارىندى بالا ءارى ءوزى سونداي مەيىرىمدى. اللا ءتىل-كوزدەن امان قىلسىن, قاي قىرىنان الساڭىز دا كوڭىلىڭە قونا كەتەتىن كەرەمەت جان. جاننۇردىڭ اناسى جانار شاياحمەتقىزى – وسى №22 ورتا مەكتەپتە وتىز جىلعا جۋىق ەڭبەك ەتىپ كەلە جاتقان باستا­ۋىش سىنىپ مۇعالىمى-زەرتتەۋشى. وتباسى بالانىڭ جان-جاقتى ءبىلىم الۋىنا بار جاعدايدى جاسادى. جاننۇر كەز كەلگەن ساباقتان ءوزىنىڭ جۇيرىك ەكەنىن ۇنەمى بايقاتتى, سۋرەتتى وتە جاقسى سالادى, سالعان سۋرەتتەرى كورمەلەرگە قويىلدى, دومبىرا شەرتىپ, ءتۇرلى ونەر سايىستارىنا, مەكتەپتىڭ اتىنان پاندىك جارىستارعا قاتىسىپ, توپ جاردى. جاننۇر 10-11 سىنىپتا الدىنا ۇلكەن ماقسات قويىپ, «140 ونلاين وقىتۋ» پلاتفورماسىنا تىركەلىپ, تەستىلەۋگە بار ىنتا, كۇش جىگەرىمەن دايىندالدى, سونىڭ ناتيجەسىندە وق بويى وزا شىعىپ, 140 بالل يەلەندى, ەڭبەگى ەلەندى. ءوزى 11 جىل بويى ءبىلىم العان قاراپايىم اۋىل مەكتەبىن بۇكىل رەسپۋبليكاعا ءمالىم ەتتى, – دەدى ج.مولدابەكوۆا.

ال ۇبت ۇزدىگىنىڭ اناسى جانار شاياحمەتقىزى پەرزەنتىنىڭ بۇل ناتيجەسى مەكتەپ ۇجىمى مەن بالاسىنا ساباق بەرگەن مۇعالىمدەر ەڭبەگىنىڭ جەمىسى ەكەنىن جەتكىزدى. ونىڭ ايتۋىنشا, اۋىل مەكتەبى بولسا دا, ونداعى ءاربىر مۇعالىم – بىلىكتى مامان, ءبىلىمى جوعارى پەداگوگ.

– جاننۇر كىشكەنتاي كەزىنەن وزگەشە بالا بولىپ ءوستى. قاراپايىم, ايتقانىڭدى ەكى ەتپەيتىن, جاقىندارىنىڭ كوڭىلىنەن شىعۋعا بارىن سالاتىن, ىسىنە وتە تياناقتى بالا. جاستايىنان ەكەۋمىز شاشكى وينايتىنبىز, جەڭىلىپ قالسا, قايتپايتىن, ناتيجەسىن جاقسارتقانشا ويناي بەرۋگە بار ەدى. كەيىن شاحماتقا اۋىستى, شاحمات ۇيىرمەسىنە بارىپ, جارىستاردا جاقسى ناتيجە دە كورسەتتى. بالا كۇنىندە ۇلىما كۋبيكرۋبيك اكەلىپ بەرىپ: «مەن ساعان سەنەمىن, سەن وسىنى قۇراپ ۇيرەنە الاسىڭ» دەدىم. سونىڭ فورمۋلاسىن ينتەرنەتتەن قاراپ, ۇيرەنە كەلە 30, كەيىن 20 سەكۋندتا جيناي الاتىن بولدى. وسىنىڭ ءبارى ونىڭ لوگيكالىق قابىلەتىن, وقۋعا ىنتاسىن ارتتىردى. شىنداپ كەلگەندە, «ۇستازى جاقسىنىڭ ۇستانىمى جاقسى» دەمەكشى, جاننۇرىمنىڭ قولىنا العاش قالام ۇستاتىپ, بىلىمگە باۋلىعان, ءبىلىم نارىمەن سۋسىنداتقان العاشقى ۇستازى گۇلنار يساقىزى – مىقتى مۇعالىم. ودان كەيىن ۇلكەن سىنىپتارعا كوشكەندە جەتەكشىلىك ەتكەن نۇرگۇل سەرىكقىزى دەگەن مۇعالىمىمىز دە – وزىق پەداگوگ. №22 مەكتەپ ۇجىمىنىڭ ءاربىر ۇستازى بالانى جان-جاقتى تاربيەلەپ, تەرەڭ ءبىلىمدى بالا بويىنا سىڭىرە ءبىلدى. ونداعى پەداگوگتەردىڭ قاي-قايسىسى تۋرالى دا اۋىز تولتىرىپ ايتۋعا بولادى. ۇبت-عا مەنى ەرتپەي ءوزى باردى. «ماما, ۋايىمداما, ءوزىم بارامىن» دەپ كەتتى. بىراق انا بولعان سوڭ, ءبارىبىر تاقىم قىسىپ وتىرادى ەكەنسىڭ. «ە, قۇدايىم, بالاما ءوزىڭ جار بول, بالامنىڭ جانتالاسىپ وقىپ جاتقان ەڭبەگىن باعالاي گور» دەپ تىلەدىم. سول تىلەگىم قابىل بولدى, – دەدى قۋانىشتان تولقىعان اناسى.

ءيا, انانىڭ تىلەگى ءاردايىم قابىل بولادى عوي. ءبىز ۇبت ۇزدىگىنىڭ اناسىمەن اڭگىمەلەسۋ بارىسىندا اكەسى تۋرالى دا سۇرادىق. اناسىنىڭ ايتۋىنشا, جاننۇردىڭ اكەسى دە بالاسىن ءاردايىم قولداپ كەلەدى, لوگيكالىق ويىنداردا دا, سا­يىستار مەن ءبىلىم بايگەلەرىندە دە بالاسىمەن بىرگە. جاننۇردىڭ سۋرەت سالۋداعى شەبەرلىگى دە ينجەنەرلىك سالادا ەڭبەك ەتەتىن اكەسىنەن بەرىلگەن ەكەن.

2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋ­دىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.

ءسوزىمىزدىڭ سوڭىندا ۇبت رەكوردىن جاڭارتۋشى جاننۇر ابزال ۇلىمەن بليتس-سۇحباتتى ۇسىنامىز.

– قاي ماماندىقتى تاڭدا­دىڭىز؟

– مەن ءىت سالاسىن تاڭداپ وتىرمىن. بۇل – قازىر وتە وزەكتى, قاجەتتى ماماندىق.

– قانداي جوعارى وقۋ ورنىندا وقۋدى كوزدەيسىز؟

– الماتىدا سۇلەيمەن-دەميرەل اتىنداعى ۋنيۆەرسيتەتتە وقۋدى جوسپارلاپ وتىرمىن.

–  ۇبت-دان ۇزدىك بولۋدىڭ سىرى نەدە؟ ۇمىت­كەر-زامانداستارىڭىزعا قانداي كەڭەس بەرەر ەدىڭىز؟

– ۇبت-دان ۇزدىك بولۋدىڭ سىرى – ەڭبەكتە. مەن تاۋلىگىنە 4-5 ساعات قانا ۇيىقتاپ, باس الماي تەستىلەۋگە دايىندالدىم. وسىلاي دايىندالۋىما جاعداي جاساعان اتا-اناما, ءبىلىم بەرگەن ۇستازدارىما العىسىمدى ايتامىن. ال مەنەن كەيىن تاپسىراتىن تالاپكەرلەرگە تاباندى تۇردە دايىندالۋ, ءاردايىم ەڭبەكتەنۋ تۇبىندە جاقسى ناتيجە بەرەتىنىن ايتقىم كەلەدى.

– وسىعان دەيىنگى سىناق تەستىلەۋلەردە قانشا بالل جينادىڭىز؟

– ەڭ ءبىرىنشى 121 بالل جينادىم. ودان كەيىن تاپسىرعانىمدا 132 دەپ كورسەتتى, بىراق 5 سۇراق بو­يىنشا سەنىمدى بولعاندىقتان اپەللياتسياعا بەرىپ, دالەلدەنىپ, 137 بولدى. وسى جولى, مىنە, 140 بالل الدىم.