كەشە, 27 ماۋسىمدا ساعات 11.30-دا قاراعاندى قالاسىنداعى نەرچەنسكايا كوشەسىندە اۋە جەلىسىن جوندەۋ كەزىندە «قاراعاندى جارىق» كومپانياسىنىڭ 36 جاستاعى ەلەكترومونتەرىن توق سوقتى. زارداپ شەككەن جۇمىسشى كوز جۇمدى, دەپ حابارلايدى Egemen.kz.
بەلگىلى بولعانداي, مارقۇم ايدوس نۇسىپبەكوۆ ارىپتەسى ەرنۇر ەسپايمەن بىرگە اعاشتاردى قىرقىپ, مۇنارامەن جوعارى كوتەرىلگەن.
«مەن ەڭكەيە بەرگەندە ونى توك سوعىپ جاتقانىن اڭعاردىم. دەرەۋ ارىپتەستەرىمدى شاقىرىپ, وعان العاشقى كومەك كورسەتۋگە تىرىستىق. جەدەل جاردەم شاقىردىق, بىراق كەش بولدى», دەيدى مارقۇمنىڭ ارىپتەسى.
ايدوستىڭ تۋعان-تۋىستارى وقيعا ورنىنا جەتكەندە, مارقۇمنىڭ دەنەسى مايىتحاناعا جەتكىزىلگەنىن بىلگەن. ولار ەر ادامنىڭ قاۋىپسىزدىك ەرەجەلەرىن ءوزى بۇزباعانىن العا تارتىپ وتىر.
«ايدوس بۇل سالادا 12 جىلدان استام ۋاقىت ەڭبەك ەتتى. دەمەك, تاجىريبەسى مول. اۋە جەلىسىنە كوتەرىلىپ, جوندەۋگە كىرىسپەس بۇرىن, ولار بارلىق سىمداردى اجىراتۋى كەرەك ەدى. بۇل ەلەكترومونتەرلەردىڭ مىندەتى ەمەس. ول ءوزىنىڭ شالا ارەكەتىنەن جان تاپسىرۋى مۇمكىن ەمەس. بىزدە ەكى نۇسقا بولىپ تۇر. ءبىرى - سىمدار اجىراتىلماعان نەمەسە جۇمىستىڭ اياقتالۋىن كۇتپەستەن توك بەرىلدى. مۇنى انىقتاۋ كەرەك», دەيدى مارقۇمنىڭ تۋىستارى.
مارقۇمنىڭ ارتىندا اناسى, جۇبايى مەن ءۇش بالاسى قالدى. ونىڭ قايتىس بولۋ سەبەپتەرىن انىقتاۋ ءۇشىن ارنايى كوميسسيا قۇرىلدى.
قاراعاندى وبلىسى پد ءباسپاسوز قىزمەتى ءمالىم ەتكەندەي, ايدوس نۇسىپبەكوۆتىڭ ولىمىنە قاتىستى قىلمىستىق ءىس قوزعالعان. تەرگەۋ قر قك-ءنىڭ 156-بابىنىڭ 3-بولىگى «ابايسىزدا ادام ولىمىنە اكەپ سوققان ەڭبەكتى قورعاۋ ەرەجەلەرىن بۇزۋ» بابى بويىنشا باستالعانىن اتاپ وتكەن ءجون.