قالام ۇستاعان قاۋىمنىڭ دا ءتۇرلى-ءتۇرلىسى بولادى. كەشەگى كەڭەس زامانىندا جۋرناليستەردىڭ كوبى وڭ جامباسىنا كەلەتىن بىرەر تاقىرىپتان ايىرىلمايتىن. ۇنەمى جازىپ جۇرگەندىكتەن, سول سالانى بۇگە-شىگەسىنە دەيىن بىلەتىن.
وبلىستىق راديونىڭ قىزمەتكەرى جاندوس ۇنەمى مال شارۋاشىلىعى تۋرالى جازادى. وبلىستىق تەلەۆيدەنيەدە ىستەيتىن كەزىم. جولساپارعا بىرگە شىعامىز. بىردە سول كەزدەگى لەنينگراد اۋدانىنىڭ قوي شارۋاشىلىعىنا باردىق. كەڭشار ديرەكتورىنا جولىعىپ, ەڭبەگىن ەلگە تانىستىرۋعا لايىقتى وزات شوپاندى انىقتادىق. ەندى ەكەۋىمىز جازىپ الماقپىز. اقساقال ۇيىندە ەكەن. ەكەۋىمىز دە ميكروفونىمىزدى دايىنداپ, ەكى جاعىنان سۇراقتى جاۋدىرىپ جاتىرمىز.
– مالدىڭ كۇيى جامان ەمەس, – دەگەن وزات شوپان, – قىسقا جاقسى ءتۇستى. نەگىزى مالدىڭ قىستى كوتەرۋى كۇزگى كۇيىنە كوپ بايلانىستى. قورا جىلى, جەمشوپ الدىندا.
– بيىل ءجۇز قويدان نەشە قوزى الدىڭىز؟ – دەپ سۇرادى ارىپتەسىم.
– ارقايسىنان ءۇش كەلىدەن ءجۇن قىرىقتىم. مەن ىسەك باعامىن عوي, – دەدى اقساقال.
اڭگىمە قوزداپ جاتىر. اۋىل-ايماقتىڭ, بوتا-تايلاقتىڭ جاي-كۇيى دەگەندەي. الدەن ۋاقىتتا ارىپتەسىم ماناعى ساۋالىن تاعى قايتالادى.
– اقساقال, ءار قويدان ءۇش كەلىدەن ءجۇن قىرىققانىڭىز جاقسى ەكەن, ال جۇزىنەن قانشا قوزى الاسىز؟ – دەدى تاقاقتاپ ارىپتەسىم.
ساۋالىنا كۇلكىم كەلىپ بارادى. بىراق توتەننەن قوسىلۋ ىڭعايسىز. جازىپ جاتىرمىز عوي.
اقساقالدىڭ ونسىز دا كۇرەڭىتكەن ءجۇزى قاراۋىتىپ كەتكەندەي. ءتىسىنىڭ استىنان سىزدىقتاتىپ:
– قالقام-اي, مەن ىسەك باعامىن عوي, – دەدى.
ودان ارعى اڭگىمە كەڭشاردىڭ مالشىلارعا جاساپ جاتقان قامقورلىعى, جۇمىس كيىمى, جالاقىسى, مالشىلار ۇيىندەگى جاعداي تۋرالى ءوربىدى. الدەن ۋاقىتتا العاشقى ەكى جاۋاپ قۇلاعىنا كىرمەگەن ارىپتەسىم, جابىسىپ العان جالعىز ساۋالىن تاعى قويماسى بار ما؟
– قانشا قوزى الاسىز؟
بۇل جولى اۋەلى كۇرەڭىتكەن, كەيىن قاراۋىتقان ءجۇزى مۇلدە الەم-تاپىراق بولىپ كەتتى. كەيىنگىنىڭ, ونىڭ ىشىندە جول بىلەدى دەيتىن ءجۋرناليستىڭ سەكتى بىلمەگەنى سەزىمىنە اسەر ەتكەن شىعار. توتەدەن قيالاپ ءبىر-اق تارتتى. تۇگەل جازۋعا بولمايدى, ارينە. نەگىزگى نوباي بىلاي.
– اتاڭا نالەت, – دەدى اقساقال تۇتىگىپ. – ىسەك ەركەك مال ەمەس پە, ودان قالاي قوزى الاسىڭ؟
وزىنە دە سول كەرەك دەدىم مەن, بىراق ىشتەي ايتتىم.
كوكشەتاۋ