وسكەمەن. 26 جەلتوقسان. شىعىس قازاقستان وبلىسىندا سايلاۋ ۋچاسكەسى كوميسسياسىنىڭ مۇشەلەرى دەنساۋلىعىنا بايلانىستى ۇيدە وتىرعان ارداگەرلەر مەن زەينەتكەرلەردىڭ داۋىسىن جيناۋدا. بۇل تۋرالى egemen.kz ءتىلشىسى حابارلادى.
وسكەمەن قالاسىنداعى جىبەك ماتالار كومبيناتى ىقشاماۋدانىنىڭ تۇرعىنى شەرنياز جامانباەۆ پەن شولپان كابدىكارىمقىزى ءوز تاڭداۋلارىن جاسادى. ساتپاەۆ داڭعىلىنداعى 14/3 ۇيدە تۇراتىن ەڭبەك ارداگەرلەرىنە №3 سايلاۋ ۋچاسكەسى كوميسسياسى ءتورايىمىنىڭ ورىنباسارى رۋلان نىساينوۆ كەلىپ, قوس قارياعا داۋىس بەرۋ بيۋللەتەندەرىن ۇسىندى.
شەرنياز اقساقال 1932 جىلى شىعىس قازاقستان وبلىسىنىڭ تارباعاتاي اۋدانىنداعى شورعا اۋىلىندا تۋعان. اتالعان اۋدانداعى كرۋپسكايا اتىنداعى كولحوزدى قۇرۋعا اتسالىسقان, اۋداننىڭ قۇرمەتتى ازاماتى. زايىبى شولپان قابدىكارىمقىزى 1936 جىلى اقجار اۋىلىندا دۇنيەگە كەلگەن. «كۇمىس القا», «التىن القا» يەگەرى اتانعان اجە 8 بالانى دۇنيەگە اكەلىپ, 12 نەمەرە مەن 4 شوبەرەنىڭ قىزىعىن كورىپ وتىر. دەربەس زەينەتكەر. قول ۇستاسىپ عۇمىر كەشكەندەرىنە جارتى عاسىردان اسقان قوس قاريا دا تىل ارداگەرلەرى. «1954 جىلدان باستاپ داۋىس بەرىپ كەلەمىن. بۇرىن سايلاۋ ۋچاسكەلەرىنە ءوز اياعىممەن بارىپ داۋىس بەرۋشى ەدىم. بيىل دەنساۋلىعىم كوتەرە المايتىن بولعاندىقتان, سايلاۋ ۋچاسكەسىنە ءوتىنىش جازدىم. بالالارىمىزدىڭ بۇگىنگى باراقاتتى, بەرەكەتتى ءومىرى مەن كەلەشەگى ءۇشىن تاڭداۋىمىزدى جاساپ, داۋىس بەردىك», دەدى شولپان اجە.
قاريالار داۋىس بەرگەن بيۋللەتەندەرىن ارنايى جاشىككە سالدى. كوميسسيا ءتورايىمىنىڭ ورىنباسارى رۋلان نىساينوۆ كەشكە دەيىن ءوز ۋچاسكەلەرىنە تيەسىلى 50 قاريانىڭ ۇيىنە بارىپ, داۋىستارىن جيناپ ۇلگەرۋ قاجەتتىگىن جەتكىزدى.
دۋمان اناش.
دەرەك, سۋرەت: egemen.kz