قىرعىزستان پرەزيدەنتى سادىر جاپاروۆتىڭ قارىنداسى ءلاززات نۇرقوجاەۆاعا سۇيىكتىسى ۇيلەنۋگە ءسوز سالعان. جاستار ورۋ-ساي شاتقالىنا تجم-ءنىڭ تىكۇشاعىمەن ۇشىپ بارعان. الەۋمەتتىك جەلىدە تاراعان بۇل جاعدايدى سىنعا العانداردىڭ قاراسى كوپ. سادىر جاپاروۆ بۇل جايتقا قاتىستى تۇسىنىكتەمە بەرىپ, حالىقتان كەشىرىم سۇرادى, دەپ حابارلايدى Egemen.kz.
«كابار» اگەنتتىگى سادىر جاپاروۆپەن سۇحباتتاسىپ, تۋىستارىنىڭ ءىس-ارەكەتى قوعامدا پىكىرتالاس تۋدىرعانىنا توقتالدى.
حالىقتىڭ قاراسى الەۋمەتتىك جەلىدە: «ەل باسشىلارىنىڭ تۋىستارى باسقالارعا ۇلگى بولۋ كەرەك ەمەس پە؟ قاراپايىم حالىقتىڭ تىكۇشاق جالدايتىن مۇمكىندىگى جوق. تجم-عا وسى ءۇشىن تىكۇشاق الدىردى ما؟ پرەزيدەنتتىڭ ءوزى ىسىراپ جاسامايىق دەگەن ەدى عوي», دەگەن پىكىر قالدىرعان.
جاپاروۆ بولاشاق كۇيەۋ بالاسىنىڭ بۇل قىلىعىن قۇپتامايتىنىن ايتتى. سونداي-اق قىرعىستان پرەزيدەنتى تجم-عا جاڭادان ساتىپ الىنعان تىكۇشاقتار ءوزىنىڭ قۇنىن اقتاۋ ءۇشىن كوممەرتسيالىق ماقساتتا پايدالانۋعا رۇقسات ەتىلگەنىن اتاپ ءوتتى.
«بۇرىن مەن باسقالاردى سىنايتىن ەدىم, ەندى ءوزىمنىڭ الدىمنان شىقتى. قارىنداسىم ءۇشىن حالىقتان كەشىرىم سۇرايمىن. ءالى جاس, بىراق قوعامنىڭ سىنىن كورىپ وتىر. بۇل وقيعادان ساباق الادى دەپ ويلايمىن», دەدى جاپاروۆ.