13 شىلدەدە الماتىدا ارالاس جەكپە-جەكتەن Hardcore FC ءتۋرنيرى وتەدى. جارىستىڭ باستى جەكپە-جەگىندە جەڭىل سالماقتاعى قازاقتىڭ تانىمال سپورتشىسى دامير يسماعۇلوۆ پەن رەسەيلىك دميتري كليموۆ كۇش سىنادى.
ورىنبور وبلىسىندا دۇنيەگە كەلگەن 33 جاستاعى ءداميردىڭ وسى سپورت ءتۇرىن سەرىك ەتكەلى 10 جىلعا جۋىقتادى. سول ارالىقتا ول بىرقاتار بيىك بەلەستى باعىندىردى. اتاپ ايتساق, «الاش پرايد» گران-ءپريىنىڭ جەڭىمپازى جانە م-1 پروموۋشەنىنىڭ چەمپيونى اتاندى. قاتارىنان 14 جەكپە-جەكتە جەڭىسكە جەتكەننەن كەيىن قانداسىمىز UFC-ءدىڭ قىراعى ماماندارىنىڭ نازارىنا ىلىكتى. مۇحيتتىڭ ارعى جاعىندا دا يسماعۇلوۆ ءوزىن جاقسى قىرىنان كورسەتتى. 2018-2023 جىلدار ارالىعىندا الەمدەگى ەڭ بەلدى پروموۋشەندە ونەر كورسەتكەن كەزدە جەتى رەت وكتاگونعا شىققان قازاقتىڭ قايسار ۇلى العاشقى بەس قارسىلاسىن ۇتتى. تارقاتىپ ايتساق, ول اۋستراليالىق الەكس گوردجيس, يسپانيالىق حوەل الۆارەس, برازيليالىق تياۋ مويزەس پەن رافاەل الۆيس, شۆەتسيالىق گۋرام كۋتاتەلادزەنى قاپى قالدىردى. بىراق سوڭعى ەكى كەزدەسۋىندە رەسەيلىك ارمان تسارۋكيان مەن امەريكالىق گرانت دوۋسوننان ۇپاي سانىمەن ۇتىلدى.
ءوزىنىڭ سوڭعى جەكپە-جەگىن دامير يسماعۇلوۆ بيىل ناۋرىز ايىندا سانكت-پەتەربۋرگتە جەرگىلىكتى سپورتشى ەدۋارد ۆارتانيانعا قارسى وتكىزدى. ولار كيكبوكستىڭ ەرەجەسى بويىنشا ايقاستى. تەڭ دارەجەدە وتكەن باسەكەدە تورەشىلەر ۆارتانياندى جەڭىمپاز دەپ تانىدى. ارالاس جەكپە-جەكتەگى داميردىڭ شەردوگى – 27 كەزدەسۋ, 24 جەڭىس (13 نوكاۋت) جانە 3 جەڭىلىس. ءبىر ايتا كەتەرلىگى, قانداسىمىز ءوزىنىڭ سپورتتىق مانسابىندا بىردە-ءبىر رەت ايقىن باسىمدىقپەن ۇتىلعان جوق.
ءداميردىڭ قارسىلاسى دا وسال سپورتشى ەمەس. جاۋىنگەرلىك سامبودان اۋىز تولتىرىپ ايتارلىقتاي تابىسقا جەتكەن 23 جاستاعى دميتري كليموۆ مما-دا دا جاقسى ناتيجە كورسەتتى. ول Hardcore FC پروموۋشەنىنىڭ بۇرىنعى چەمپيونى. ونىڭ رەكوردى – 15 كەزدەسۋ, 11 جەڭىس (9 نوكاۋت), 4 جەڭىلىس.