نىسانا كوزدەۋدەن قازاقستان ۇلتتىق قۇراما كومانداسىنىڭ باس باپكەرى ولگا دوۆگۋن پاريج وليمپياداسىنا قاتىساتىن سپورتشىلاردىڭ ءتىزىمىن جاريا ەتتى.
سپورتتىڭ بۇل تۇرىنەن عالامدىق دودادا جۇلدە الماعانىمىزعا تابانى كۇرەكتەي 28 جىل بولعان ەكەن. ارينە, از ۋاقىت ەمەس. ءالى ەسىمىزدە, 1996 جىلى قازاقستان تاۋەلسىز مەملەكەت رەتىندە جازعى وليمپيا ويىندارىنا تۇڭعىش رەت قاتىسىپ, 11 جۇلدە جەڭىپ السا, سونىڭ ۇشەۋى مەرگەندەردىڭ ەنشىسىندە ەدى. اتاپ ايتساق, سەرگەي بەلياەۆتىڭ ءوزى ەكى رەت جەڭىس تۇعىرىنا كوتەرىلدى. 35 جاستاعى ساقا سپورتشى مىلتىقتى 50 مەترلىك قاشىقتىقتان جاتىپ اتۋدا كۇمىس مەدالدى يەلەندى. ودان كەيىن ول ءۇش قالىپتا اتۋدا ءدال سول ناتيجەنى قايتالادى. العاشقى جاتتىعۋدا بەلياەۆ گەرمانيالىق كريستيان كلەستەن قالىپ قويسا, ەكىنشىسىندە فرانتسيالىق جان-پەر اماعا ەسە جىبەردى.
تاعى ءبىر تانىمال سپورتشىمىز ۆلاديمير ءۆوحميانيننىڭ دە قانجىعاسى مايلاندى. 33 جاستاعى تەمىرتاۋدىڭ تارلانى 25 مەترلىك قاشىقتىقتان تاپانشا اتۋدا نەمىس رالف شۋمان مەن بولگاريالىق ەميل ميلوۆتى العا جىبەرىپ, قولا مەدالدى موينىندا جارقىراتتى. بۇل – ونىڭ وليمپيا ويىندارىنداعى ەكىنشى جۇلدەسى. سودان ءتورت جىل بۇرىن ۆوحميانين بارسەلوناداعى باسەكەدە تمد قۇراماسى ساپىندا ءۇشىنشى ورىنعا تابان تىرەگەن ەدى. وكىنىشكە قاراي, ودان كەيىنگى وليمپيا ويىندارىنىڭ بىردە-ءبىر وتانداسىمىز ولجا سالا المادى.
پاريجدەگى دوداعا ەلىمىزدىڭ نىسانا كوزدەۋشىلەرىن ولگا دوۆگۋن باستاپ اپارادى. ونىڭ ءوزى دە كەزىندە كۇرالايدى كوزگە اتقان مىقتى مەرگەن بولعانىن جانكۇيەرلەر جاقسى بىلەدى. دوۆگۋن 2002 جانە 2006 جىلدارى الەم چەمپيونى اتانسا, ازيا ويىندارىندا 1 التىن, 2 كۇمىس جانە 3 قولا مەدالدى ولجالادى. بۇل كۇندەرى باس باپكەرلىك قىزمەت اتقارىپ وتىرعان ولگا ۆياچەسلاۆقىزى بايراقتى باسەكەدە نيكيتا چيريۋكين, الەكساندرا لي, يسلام ساتباەۆ, كونستانتين مالينوۆسكي, ارينا التۋحوۆا جانە يرينا يۋنۋسمەتوۆا سىندى شاكىرتتەرىنە سەنىم ارتتى. وسى التى جەرلەسىمىزدىڭ ەڭ بولماعاندا بىرەۋى تورتجىلدىقتىڭ باستى جارىسىندا اتوي سالىپ جاتسا, 28 جىلعا سوزىلعان ساتسىزدىكتىڭ سەڭى سوگىلەتىن ەدى.