ماۋسىم ايىندا ءتۇرلى ماماندىق يەلەرى وزدەرىنىڭ كاسىبي مەرەكەسىن اتاپ وتەدى, ونىڭ ىشىندە وتاندىق پوليتسيا قىزمەتكەرلەرى دە بار. كۇندەلىكتى قىزمەت بارىسىندا جۇمىسباستىلىقتان جاداعايلانا بەرەتىن ومىرگە جارقىن ساتتەر سىيلاۋ ءۇشىن بيىل الماتىدا العاش رەت پوليتسەيدىڭ ءومىرى تۋرالى ميۋزيكل ساحنالاندى.
قالا تورىندەگى «Almaty Theatre» اتتى ءسان-سالتاناتى كەلىسكەن عيماراتتا ىشكى ىستەر ورگاندارى ارداگەرلەرىنە, قىزمەتتىك مىندەتىن اتقارۋ بارىسىندا قازا تاپقانداردىڭ تۋىستارىنا, قالالىق پوليتسيا دەپارتامەنتىنىڭ قىزمەتتەرى مەن بولىمشەلەرىنىڭ جەكە قۇرامىنا ارنالعان مەرەكەلىك كونتسەرتكە الماتى قالاسىنىڭ اكىمى ەربولات دوساەۆ تا ورتاقتاستى.
العاش رەت ءتارتىپ ساقشىلارىنىڭ كۇشىمەن ءىىم اكادەمياسىنىڭ كۋرسانتىنان گەنەرالعا دەيىن ءبىر پوليتسەيدىڭ دامۋ تاريحىن سومدايتىن ميۋزيكل قالا تىنىشتىعىن ساقتاپ وتىرعان كورەرمەندەرىنە جول تارتتى.
«بۇگىندە الماتى پوليتسياسى قىلمىسقا قارسى شابۋىلدىق كۇرەستى جۇزەگە اسىرۋ, قۇقىقتىق ءتارتىپتى نىعايتۋ جانە قالادا قاۋىپسىزدىكتى قامتاماسىز ەتۋ ءۇشىن بارلىق قاجەتتى جاعداي مەن مۇمكىندىككە يە. قازاقستاننىڭ ءتارتىپ ساقشىلارى – مەملەكەت پەن تۇرعىنداردىڭ قاۋىپسىزدىگىنىڭ كەپىلى. ءبىز قالا تۇرعىندارى مەن قوناقتارىنىڭ قاۋىپسىز ءومىر سۇرۋىنە جاعداي جاساي وتىرىپ, وتان الدىنداعى قىزمەتتىك بورىشىن ادال اتقاراتىن پوليتسيا قىزمەتكەرلەرىمەن ماقتانامىز», دەدى الماتى قالاسى پوليتسيا دەپارتامەنتىنىڭ باسشىسى ارىستانعاني زاپپاروۆ.
ورايى كەلىپ تۇرعاندا, وتاندىق پوليتسيا ىشكى ىستەر ورگاندارىنىڭ قۇرىلعانىنا 32 جىل تولىپ وتىرعانى, وعان قوسا قالادا جاڭا پوليتسيا ورتالىقتارى اشىلىپ جاتقانىنا توقتالا كەتەيىك. مۇنداي ورتالىقتار بارلىق اۋداندا قالا اكىمدىگىنىڭ جوبالىق ءوفيسىنىڭ قولداۋىمەن قۇرىلىپ وتىر. بۇگىنگى تاڭدا پوليتسيا دەپارتامەنتىنىڭ بالانسىنا سەگىز ءۇي-جاي ساتىپ الىنسا, ولاردىڭ التاۋى تولىق جابدىقتالىپ, 23 ماۋسىمنان باستاپ جۇمىسقا كىرىستى.
«بۇل جوبا قاناتقاقتى رەجىمدە مەملەكەت باسشىسىنىڭ تاپسىرماسىنا سايكەس پوليتسيا جۇمىسىنىڭ سەرۆيستىك مودەلىنە كوشۋ بويىنشا ىسكە اسىرىلا وتىرىپ, قوعاممەن اشىق ديالوگ جانە تۇرعىنداردىڭ سۇرانىستارىنا جەدەل دەن قويۋدى كوزدەيدى. اسىرەسە تۇرمىستىق زورلىق-زومبىلىققا ۇشىراعاندار مەن جاسوسپىرىمدەر اراسىنداعى قىلمىستىڭ الدىن الۋعا ەرەكشە كوڭىل بولىنەدى», دەدى الماتى اكىمى ەربولات دوساەۆ.
پوليتسيانىڭ سەرۆيستىك ورتالىقتارىندا 55 قىزمەت ءتۇرى كورسەتىلسە, ماماندار كوشى-قون جانە اكىمشىلىك زاڭناما, قۇقىق بۇزۋشىلىقتاردىڭ الدىن الۋ, وتباسىلاردا زارداپ شەككەن ايەلدەردىڭ قۇقىقتارىن قورعاۋ ماسەلەلەرىن شەشۋگە كومەكتەسەدى. ول ءۇشىن بارلىق جاعداي جاسالدى – ينسپەكتورلار مەن پسيحولوگتەر قابىلدايتىن جەكە كابينەتتەر جاساقتالىپ جاتىر.
ءوز كەزەگىندە كوشى-قون پوليتسياسىنىڭ ينسپەكتورلارى شەتەل ازاماتتارىن تىركەۋ نەمەسە قايتا تىركەۋ بويىنشا قىزمەتتەر كورسەتەدى, قازاقستاننان تىس جەرلەرگە كەلۋ نەمەسە كەتۋ, ازاماتتىقتى الۋ جانە تۇراقتى تۇرۋ ءۇشىن قۇجاتتاردى راسىمدەيدى.
سول سياقتى اۆتوكولىك يەلەرىنە جكو فاكتىلەرى بويىنشا كەڭەس بەرىلىپ, اۆتوكولىككە اكىمشىلىك ايىپپۇلداردىڭ, اۋىرتپالىقتار مەن شەكتەۋلەردىڭ بار-جوعىن تەكسەرۋگە, كولىك قۇرالىن قايتا جابدىقتاۋ جونىندەگى قۇجاتتاردى رەسىمدەۋگە كومەكتەسەدى.
ورتالىقتاردا زاڭگەرلەر, مەدياتورلار, ىشكى ىستەر ورگاندارىنا وقۋعا جانە قىزمەتكە قابىلداۋ جونىندەگى كونسۋلتانتتار, سونداي-اق قارۋ الىپ جۇرۋگە جانە ساقتاۋعا رۇقسات بەرۋ جونىندەگى قىزمەتكەرلەر جۇمىس ىستەيدى.
ازاماتتاردى قابىلداۋدى ۋاكىلەتتى قۇزىرەتتى قىزمەتكەرلەر – تەرگەۋشىلەر, جەدەل ۋاكىلدەر, ۋچاسكەلىك ينسپەكتورلار جۇرگىزەدى. دەرەكتەر بازاسى قول جەتىمدى بولماق, بۇل بۇرىن بەرىلگەن ءوتىنىشتى قاراۋ بارىسى تۋرالى بىلۋگە نەمەسە جاۋاپكەرشىلىككە تارتۋ سەبەپتەرى تۋرالى اقپارات الۋعا مۇمكىندىك بەرەدى. وعان قوسا تسيفرلاندىرۋ باسقارماسىمەن بىرلەسكەن زياتكەرلىك بەينەباقىلاۋ جۇيەسى جۇمىس ىستەيدى, ونىڭ كومەگىمەن جوعالعان زاتتى تاۋىپ قانا قويماي, قىلمىستى جەدەل اشىپ, قۇقىق بۇزۋشىلىقتى انىقتاۋ جەڭىلدەيدى.
بولاشاقتا ارحيۆتىك انىقتامالار مەن باسقا دا قىزمەتتەردى راستاۋدا پوليتسيانىڭ سەرۆيستىك ورتالىقتارىنىڭ قىزمەتىن كەڭەيتۋ جوسپارلانىپ وتىر.
الماتى