كوللەدجدەرگە قۇجات قابىلداۋ باستالدى

مينيسترلىكتىڭ حابارلاۋىنشا, ابيتۋريەنتتەر كوللەدجدە وقۋعا ەكى تاسىلمەن ءوتىنىم بەرە الادى. ونىڭ ءبىرىنشىسى – ءداستۇرلى, ياعني قاعاز تۇرىندە تاپسىرۋ, ەكىنشىسى – egov.kz پورتالى ارقىلى ەلەكتروندى نىساندا ءوتىنىم قالدىرۋ. ءبىرىنشى تاسىلمەن 25 ماۋسىمنان, egov.kz پورتالى ارقىلى 1 شىلدەدەن باستاپ قۇجات وتكىزۋگە بولادى.

تالاپكەرلەردىڭ بىلىمىنە قاراي دا قۇجات قابىلداۋ مەرزىمى ءارتۇرلى. دالىرەك ايتقاندا, نەگىزگى ءبىلىم العان 9-سىنىپ بىتىرۋشىلەر ءۇشىن قۇجات قابىلداۋ مەرزىمى 25 ماۋسىمنان 18 تامىزعا دەيىن, ال نەگىزگى ورتا ءبىلىم العان 11-سىنىپ بىتىرۋشىلەر ءۇشىن 25 ماۋسىمنان 20 تامىزعا دەيىن جالعاسادى.

وسىعان قوسا قۇجات قابىلداۋدا كەيبىر ماماندىقتارعا دا بەلگىلەنگەن ناقتى مەرزىم بار. مىسالى, شىعار­ماشىلىق ماماندىقتار بويىنشا 25 ماۋسىمنان 20 شىلدەگە دەيىن; پەدا­گوگيكالىق جانە مەديتسينالىق مامان­دىقتار بويىنشا 25 ماۋسىمنان 15 تامىزعا دەيىن قۇجات قابىلدانادى.

ورتا بۋىن ماماندىقتارى مەن قولدانبالى باكالاۆرعا تۇسۋشىلەر ءۇشىن وقۋعا قابىلداۋ اتتەستاتتىڭ ورتاشا بالى نەگىزىندە جۇرگىزىلەدى. باعالاپ ءبولۋ مىندەتتى جانە بەيىندى پاندەردىڭ ورتاشا كونكۋرستىق بالى نەگىزىندە اۆتوماتتاندىرىلعان اقپاراتتىق جۇيە ارقىلى جۇزەگە اسىرىلادى. ال جۇ­مىسشى ماماندىعىنا تۇسەتىن تۇلەك­تەر اڭگىمەلەسۋ قورىتىندىسى بو­يىنشا قابىلدانادى.

پەداگوگيكالىق, مەديتسينالىق جانە شىعارماشىلىق ماماندىقتار بويىنشا وقۋعا تۇسەتىن تۇلەكتەر ارنايى جانە شىعارماشىلىق ەمتيحاندار تاپسىرادى نەمەسە اڭگىمەلەسۋدەن وتەدى. ونى قابىلداۋ كوميسسيالارى جۇرگىزەدى. وقۋعا تۇسۋشىلەر ءۇشىن كونكۋرستار 19-25 تامىز, ونەر جانە مادەنيەت ماماندىقتارى بويىنشا 29 شىلدە – 2 تامىز ارالىعىندا وتەدى.

ايتا كەتۋ كەرەك, تالاپكەرلەر قۇجا­تىن بىردەن 4 كوللەدجگە 4 مامان­دىق بويىنشا تاپسىرا الادى. بيىل مەم­لەكەتتىك ءبىلىم بەرۋ تاپسىرىسى بويىن­شا بارلىعى 145 مىڭ ابيتۋريەنتتى وقۋعا قابىلداۋ جوسپارلانعان, بۇل وتكەن جىلدان 10 مىڭ ورىنعا ارتىق.