قانداستارعا ارنالعان «Jas Qazaq» جازعى ەتنولاگەرى باستالدى. الەمنىڭ ءار تۇكپىرىنەن جينالعان ەتنوستىق قازاق بالالارى ەكى اپتادا تاريح پەن سالت-ءداستۇردى زەردەلەپ, ۇلتتىق ويىندار مەن مۋزىكالىق اسپاپتاردا ويناپ, انا ءتىلىن جەتىلدىرەدى. ودان قالدى اتقا ءمىنىپ, كيىز ءۇي قۇرىپ, ەلىمىزدەگى جوعارى وقۋ ورىندارىنىڭ ءبىلىم كورمەسىنە قاتىسادى.
شەتتەگى باۋىرلاردى ءبىر شاڭىراق استىنا جينايتىن جوبانى جىل سايىن سىرتقى ىستەر مينيسترلىگىنە قاراستى «وتانداستار قورى» كەاق جانە IQanat قورى ۇيىمداستىرادى. وسىعان دەيىن جازعى ەتنولاگەرگە 400-دەن اسا قانداس بالا قاتىسسا, بيىل رەسەي, موڭعوليا, وزبەكستان, قىرعىزستان, قىتاي, وڭتۇستىك كورەيا جانە يران ەلىنەن 255 ەتنوستىق قازاق كەلگەن.
– بيىل ءتورتىنشى رەت ۇيىمداستىرىلىپ وتىر. ەتنولاگەر بۋراباي تورىندە «IQanat High School of Burabay» مەكتەبى بازاسىندا 24 ماۋسىم جانە 7 شىلدە ارالىعىندا وتەدى. مۇنداعى باستى ماقسات – ءار ەلدەن كەلگەن قازاق دياسپوراسىنىڭ بالالارى اراسىندا دوستىق قارىم-قاتىناس ورناتۋ. سونداي-اق اتاجۇرتپەن بايلانىسىن نىعايتۋ, مەملەكەتتىك ءتىلدى كەڭىنەن ناسيحاتتاۋ, ۇلتتىق قۇندىلىقتارىمىزدى دارىپتەۋ, بالالاردىڭ بولاشاعىن قازاقستانمەن بايلانىستىرۋعا ىقپال ەتۋ. قاتىسۋشىلاردىڭ باسىم بولىگى موڭعوليا, رەسەي, وزبەكستاننان كەلدى, – دەيدى «وتانداستار قورى» كەاق شەتەلدەگى وتانداستارمەن جۇمىس دەپارتامەنتىنىڭ كونسۋلتانتى لاشىن جاناربەك.
ەتنو-لاگەرگە قاتىسۋشىلار ءارتۇرلى بايقاۋدان ءوتىپ, ىرىكتەلىپ الىنعان. ولاردىڭ اراسىندا ءوز ەلىندە قازاقتىڭ اتىن شىعارىپ, ءبىلىم, عىلىم, سپورتتا ۇزدىك تانىلعان قاراكوز قانداستارىمىز بار. وعان قوسا توتەنشە جاعداي كەزىندە قازاقستاندىق دوستارىنا كومەك قولىن سوزعان موڭعوليالىق قازاق بالالارى دا بار.
– ماعان ەل ورداسى استانا قالاسى قاتتى ۇنادى. قازىر ەتنو-لاگەر ورىن تەپكەن بۋراباي دا تۇمسا تابيعاتى مەن ساف اۋاسى, ورمان-توعايى, سايراعان قۇستارىمەن باۋراپ الدى. لاگەردىڭ ىشكى قۇرىلىمى, جۇيەسى ويدان شىقتى. اتاجۇرتقا كەلىپ, جاڭادان دوستار تاپتىم, – دەيدى موڭعوليادان كەلگەن 16 جاستاعى نۇرمۇحاممەد قۇدايبەرگەن.