قازاقستان حالقى اسسامبلەياسى حاتشىلىعىنىڭ «جومارت جان» گۋمانيتارلىق ورتالىعى اياسىندا «قازاقستان حالقى اسسامبلەياسىنىڭ رەسپۋبليكالىق قورى» قوعامدىق قورى قوستاناي وبلىسىنداعى سۋ تاسقىنىنان زارداپ شەككەن وتباسىلارعا جايلى باسپانا الىپ بەردى, دەپ حابارلايدى Egemen.kz.
قور باسشىسى رافيك ميرزوەۆتىڭ ايتۋىنشا, اتالعان قوعامدىق ۇيىم سۋ تاسقىنىنان زارداپ شەككەن ازاماتتارعا بەلسەندى تۇردە كومەك كورسەتۋدى جالعاستىرۋدا, ويتكەنى ولاردىڭ كوپشىلىگى قيىن ومىرلىك جاعدايعا تاپ بولىپ, باسپاناسىنان ايىرىلعان.
«سۋ تاسقىنىنا دەيىن بالالارىمىزبەن پاتەر جالداپ ءجۇرىپ, ءوز ءۇيىمىز قاشان بولادى ەكەن دەپ ارماندايتىنبىز. تابيعي اپات ءومىرىمىزدى تاس-تالقان ەتتى, بار نارسەمىزدەن, ءتىپتى جالداپ تۇرىپ جاتقان ۋاقىتشا باسپانامىزدان دا ايرىلىپ قالدىق. قازاقستان حالقى اسسامبلەياسىنىڭ ارقاسىندا ءوز پاتەرىمىزگە كوشىپ, جاڭا ءومىردىڭ پاراعىن اشتىق. بۇعان ءالى دە سەنە الار ەمەسپىن, ءوڭىم ەمەس, ءتۇسىم سياقتى», دەيدى ايمان قادىرحانقىزى.
زارداپ شەككەن وتباسىلاردىڭ ىشىندە ءبىرىنشى بولىپ ارقالىق قالاسىنان قازوۆتارعا كومەك كورسەتىلدى. ايمان قادىرحانقىزى كامەلەتكە تولماعان ءتورت بالاسىمەن سۋ تاسقىنى كەزىندە باسپاناسىز قالعان. قوعامدىق قور ولارعا ارقالىق قالاسىنان ءتورت بولمەلى پاتەر الىپ بەرىپ, جاڭا ءارى جايلى باسپانامەن قامتاماسىز ەتتى.
«وسىنداي قيىن-قىستاۋ كەزدە جالعىز قالدىرماي, قول ۇشىن سوزعان قازاقستان حالقى اسسامبلەياسى مەن اكىمدىككە العىسىم شەكسىز. جاڭا پاتەر بولاشاققا دەگەن سەنىمىمىزدى نىعايتتى», دەپ ريزاشىلىعىن ءبىلدىردى.
رافيك ياگۋبوۆيچ قوردىڭ ماقساتى تابيعي اپات سالدارىنان قيىن ومىرلىك جاعدايعا تاپ بولعاندارعا قولداۋ كورسەتۋ جانە ولاردى قولايلى جاعدايلارىمەن قامتاماسىز ەتۋ ەكەنىن اتاپ ءوتتى.
ەستەرىڭىزگە سالا كەتەيىك, بۇگىندە ارقالىق قالاسىندا كوكتەمگى سۋ تاسقىنى كەزىندە باسپاناسىز قالعان وتباسىلار ءۇشىن جاڭا 50 پاتەرلىك «Smart» تۇرعىن ءۇي سالىنىپ جاتىر.