اندرەي تيۋتين مەن ادەل جەكسەنبينوۆا جۇبى ساداق اتۋدان تۇركيانىڭ انتاليا قالاسىندا وتكەن الەم كۋبوگىنىڭ كەزەڭدىك سايىسىندا باس جۇلدەنى ولجالادى. باستاپقى باسەكەلەردە برازيليا, سلوۆەنيا, يتاليا قۇرامالارىنان باسىم تۇسكەن جەرلەستەرىمىز فينالدا ۇلىبريتانيانى ۇتتى.
فۋتزالدان 2025 جىلى جاسوسپىرىمدەر (U-19) اراسىنداعى ەۋروپا بىرىنشىلىگى قاي جەردە ۇيىمداستىرىلاتىنى بيىل قىركۇيەكتە وتەدى دەپ جوسپارلانعان ۋەفا-نىڭ ارنايى كونگرەسىندە انىقتالادى. دوپ دوداسىن قابىلداۋعا ۇمىتكەلەر قاتارىندا قازاقستان دا بار.
قازاقتىڭ تانىمال كاسىپقوي بوكسشىسى سۇلتان زاۋىربەك (17-0, 12 كو) ۇلىبريتانيانىڭ بولتون قالاسىندا ۇيىمداستىرىلعان تۋرنيردە رومان رۋبەن رەينوسونى (22-4-2, 10 كو) ءبىرىنشى راۋندتا ۇرىپ جىعىپ, ەكىنشى جارتىلاي جەڭىل سالماقتاعى WBA Continental نۇسقاسىنىڭ التىن بەلبەۋىن يەلەندى.
فۋتزالدان ەل چەمپيوناتىنىڭ قولا جۇلدەگەرى انىقتالدى. بۇل اتاققا رۋدنىيدىڭ «اياتى» قول جەتكىزدى. ءۇشىنشى ورىن ءۇشىن تارتىستا ولار «اتىراۋدان» ايلاسىن اسىردى. ال باس جۇلدەنى بىلتىر عانا ىرگەتاسى قالانعان «سەمەي» كلۋبى ولجالاسا, 20 جىل بويى قارسىلاس شاق كەلتىرمەگەن الماتىنىڭ «قايراتى» بيىل كۇمىس مەدالدى قاناعات تۇتتى.
قازاقستاننىڭ تەننيسشىسى يۋليا پۋتينتسەۆا ۇلىبريتانيانىڭ بيرمينگەم قالاسىندا وتكەن حالىقارالىق ءتۋرنيردىڭ جەڭىمپازى اتاندى. باستاپقى باسەكەلەردە كلارا بيۋرەل (فرانتسيا), انگەلينا كالينينا (ۋكراينا) جانە كەرولاين دوۋلحايدتى (اقش) ۇتقان ول جارتىلاي فينالدا ەليزابەتتا كوچچارەتتونى (يتاليا) قاپى قالدىردى. فينالدا جەرلەسىمىز ايلا ءتومليانوۆيچتى (اۋستراليا) 6:1, 7:6 ەسەبىمەن تىزە بۇكتىردى.
14–18 تامىزدا استانادا شايبالى حوككەيدەن پرەزيدەنت كۋبوگى جولىنداعى جارىستىڭ جالاۋى جەلبىرەيدى. بيىل بۇل تۋرنيردە «بارىستان» بولەك, حاباروۆسكىنىڭ «امۋر», ءتولياتتيدىڭ «لادا» كلۋبتارى جانە قازاقستاننىڭ ۇلتتىق قۇراماسى شەبەرلىك بايقاسادى.
يوردانيانىڭ استاناسى – امماندا ءوتىپ جاتقان جاسوسپىرىمدەر اراسىنداعى ازيا بىرىنشىلىگىن (U-17) قازاقستاننىڭ گرەك-ريم كۇرەسى شەبەرلەرى 1 التىن, 2 كۇمىس, 3 قولامەن قورىتىندىلادى. جالعىز باس جۇلدەنى 60 كگ سالماقتاعى ءشامىل دوسبول جەڭىپ السا, اناپيا ەركەبۇلان (80 كگ) مەن ادىلەت تويشى (92 كگ) فينالدا ۇتىلدى. ال نۇرداۋلەت قۇمار ۇلى (45 كگ), ەدىگە تولەۋتاەۆ (51 كگ) جانە قاناعاتبەك دانيار (65 كگ) قولا مەدالعا قول جەتكىزدى.
«نايمان» دەگەن لاقاپ ەسىمدى تاڭداعان قازاقتىڭ تانىمال سپورتشىسى قۋات حاميتوۆ (24-9-1) گلەيسون تيباۋدى جەكپە-جەككە شاقىردى. 40 جاستاعى برازيليانىڭ فايتەرى (38-19) 2006–2018 جىلدارى UFC-دە كۇش سىناسقان. كەزىندە ول نيك دياس (ۇتىلدى), دجيم ميللەر (ۇتىلدى), رافاەلۋ وليۆەيرا (ۇتتى), رافاەل دۋس انجۋس (ۇتتى), حابيب نۇرماگومەدوۆ (ۇتىلدى), توني فەرگيۋسون (ۇتىلدى), يسلام ماحاچەۆ (ۇتىلدى), ۋيلل برۋكس (ۇتتى), رودي ماكدونالد (ۇتتى) جانە تاعى باسقا دۇلدۇلدەرمەن ايقاسقان.
قۇرلىقتىق حوككەي ليگاسىندا (قحل) كۇش سىناساتىن «بارىس» بيىلعى چەمپيونات قارساڭىنداعى جوسپارىن ءبولىستى. ولار 15 شىلدەدە استانادا باس قوسىپ, وقۋ-جاتتىعۋ جيىنىن وتكىزەدى. سودان كەيىن 14–18 تامىزدا استاناداعى پرەزيدەنت كۋبوگى مەن 20–25 تامىزدا ومبىداعى بلينوۆ قۋبوگىنە قاتىسادى. بۇل دودادا ءياروسلاۆلدىڭ «لوكوموتيۆ», ءنوۆوسىبىردىڭ «سيبير» جانە چەليابىنىڭ «تراكتورىنا» قارسى وينايدى.
تەننيسشى يۋليا پۋتينتسەۆا ۇلىبريتانياداعى جەڭىسىنەن كەيىن ايەلدەر اراسىنداعى الەمدىك رەيتينگتە بىردەن جەتى ساتىعا جوعارىلاپ, قازىرگى كەزدە 34-ورىندى يەلەندى. قازاقستاننىڭ ءبىرىنشى راكەتكاسى ەلەنا رىباكينا WTA تىزىمىندەگى ءتورتىنشى ورنىن ساقتاپ قالدى. ەرلەر اراسىندا ەڭ ۇزدىك كورسەتكىش الەكساندر بۋبليككە تيەسىلى. وتكەن اپتامەن سالىستىرعاندا ول ءۇش ساتىعا تومەندەپ, بۇل كۇندەرى 22-ورىندى ەنشىلەدى. ال الەكساندر شەۆچەنكو 58-ورىنعا تابان تىرەدى.