كەرەكۋدە جاستارعا ارنالعان ەكوكلۋب اشىلدى. «GREENPVL» ەكوكلۋبىنىڭ ماقساتى – جاستاردىڭ بويىندا ەكولوگيالىق مادەنيەتتى ارتتىرىپ, قورشاعان ورتاعا دەگەن قامقورلىقتى قالىپتاستىرۋ.
«GREENPVL» ەكوكلۋبى — «اسسامبلەيا جاستارى» رەسپۋبليكالىق قوعامدىق بىرلەستىگىنىڭ پاۆلودار وبلىسىندا قولعا الىپ وتىرعان جاڭا باعىتتارىنىڭ ءبىرى. ەل پرەزيدەنتى قاسىم-جومارت توقاەۆتىڭ باستاماسىمەن بۇعان دەيىن ەلىمىزدە «تازا قازاقستان» ەكولوگيالىق اكتسياسى جۇرگىزىلە باستاعانى ءمالىم. ازاماتتاردىڭ ساناسىندا تازالىق سەزىمىن, قورشاعان ورتاعا قامقورلىق قاسيەتتەرىن ۇيالاتۋ ءۇشىن مۇنداي جوبالاردى ەنگىزۋ وتە ماڭىزدى. اسسامبلەيا جاستارى كلۋبقا جينالىپ, ولارعا ەكولوگيالىق مادەنيەتتى ارتتىرۋ بويىنشا دەرەكتى فيلمدەر كورسەتىلەدى. سوڭىنان تۋعان ولكەمىزدىڭ ەكولوگيالىق تاقىرىپتارى تالقىلانادى. كلۋبقا قازاقستان حالقى اسسامبلەياسىنىڭ بەلسەندى جاستارى مۇشە بولا الادى», دەپ اتاپ ءوتتى كلۋب ۇيىمداستىرۋشىلارى.
قازىرگى ۋاقىتتا ەكوكلۋبقا 50 جاس ازامات مۇشە بولىپ ۇلگەردى. ۇيىم ىشىندە وڭىرىمىزگە بەلگىلى ەكولوگ عالىمدار ءدارىس وقىپ, تانىمدىق ساباقتار وتكىزەدى دەلىنىپ وتىر. العاشقى كۇنى جاستارعا فرانتسۋز رەجيسسەرى يان ارتيۋس-بەرتراننىڭ ء«ۇي» اتتى عىلىمي-تانىمدىق ءفيلمى كورسەتىلدى. كارتينادا جەر عالامشارىنداعى بارلىق سۇلۋلىق كورسەتىلەدى. رەجيسسەر جەر بەتىندەگى عاجاپ ۇيلەسىم مەن ەكولوگيالىق تەپە-تەڭدىك ادامزاتتىڭ ارەكەتىمەن قالايشا بۇزىلىپ, اپات تۋدىرىپ جاتقانى تۋرالى كەرەمەت سۋرەتتەگەن. قورشاعان ورتاعا زاردابى مول ونەركاسىپتەر, الاپات سوعىستار مەن ەكولوگيالىق اپاتتار تۋرالى كەڭىنەن ماعلۇماتتار قامتىلعان. جاستار مۇنداي تانىمدىق دۇنيەلەردى كورە وتىرىپ, بويلارىندا ەكولوگيالىق سانا-سەزىم قالىپتاستىرادى دەگەن سەنىم زور.
قازىرگى ۋاقىتتا وبلىس ورتالىعىنىڭ جاستارى «تازا قازاقستان» اكتسياسىنا ءۇن قوسىپ, تازالىق شارالارىن ۇزبەي جۇرگىزىپ جاتىر. ەرتىس, ۋسولكا وزەندەرىنىڭ جاعالاۋى, «قازقوناق» تابيعي ەسكەرتكىشى ماڭى, ساياباقتار مەن سكۆەرلەر, بالالار الاڭدارى قوقىستان تازارتىلىپ, جاستار قورشاعان ورتانىڭ تازالىعىنا بەيجاي قارامايتىندارىن بايقاتتى.
«ادامداردىڭ كوبى «تازا قازاقستان» ادەتتەگى سەنبىلىك وتكىزۋ دەپ ويلايدى. دەي تۇرعانمەن بۇل اكتسيانىڭ ءمانى تەرەڭدە, ول زامانداستارىمىزدى ەكولوگيالىق تۇرعىدان تاربيەلەپ, قورشاعان ورتا تۋرالى ءبىلىمىن جەتىلدىرەدى. وڭىرلىك جاستار باستامالارىن دامىتۋ ورتالىعى ەكولوگيالىق دەسانت قۇرىپ, قالاداعى كوپشىلىك ورىنداردى, ءۇي اۋلالارىن, ساياباقتاردى كوشەلەردى تازالاۋعا شىقتى. ولار ساۋدا ۇيلەرى مەن كوشەلەردە جۇرتشىلىققا بۋكلەتتەر تاراتادى. پاراقشادا قوقىستى قالايشا بولەك جيناۋدىڭ قاراپايىم ادىستەرى كورسەتىلگەن. ماسەلەن, پلاستيك بوتەلكەلەردى قايدا تاستاۋعا بولاتىنى ايتىلادى», دەيدى وبلىستىق جاستار باستامالارىن دامىتۋ ورتالىعىنىڭ ديرەكتورى ريزات راحىمجانوۆ.
پاۆلودار وبلىسى