قىزدارىمىزدىڭ باستى قارسىلاستارى كىم؟

50 كگ سالماقتا نازىم قىزايباي كۇش سىناسادى. ول – الەمنىڭ ەكى دۇركىن چەم­پيونى (2014, 2016 جىلدارى), سول جارىستىڭ قولا جۇلدەگەرى (2012), ازيا بىرىنشىلىگىنىڭ جەڭىمپازى (2021). بىراق بۇل اتاقتىڭ بارلىعىنا الماتى وبلىسىنىڭ تۋماسى اسا جەڭىل سالماق دارەجەسىندە قول جەتكىزگەن. ونىڭ ۇستىنە نازىم جەر-جاھاننىڭ مىقتىلارى جينالعان جارىستا سوڭعى رەت وسىدان سەگىز جىل بۇرىن جەڭىس تۇعىرىنا كوتەرىلگەن. ونى دا ەستەن شىعارماعان ءجون. سول ۋا­قىت ارالىعىندا بىرقاتار الىمدى ءارى قارىمدى بوكسشىلار شىعىپ, ۇلكەن ارەنادا وزدەرىنىڭ مىقتىلىعىن مويىنداتتى. ءيا, تورتجىلدىقتىڭ باستى دوداسىندا جاسى 30-دان اسقان قىزايبايعا جالىندى جاستارىمەن ايقاسۋ وڭاي بولمايتىنى انىق.

اسا جەڭىل سالماقتاعى فاۆوريتتەردىڭ اراسىنان بۋسەناز چاكىروگلۋدى بولە-جارا اتاپ وتۋگە بولادى. 28 جاستاعى تۇركيانىڭ سۇلۋى 2021 جىلى توكيو وليمپياداسىندا فينالعا دەيىن جەتىپ, 2022 جىلى الەم چەمپيونى اتاندى. ونىڭ الدىنداعى دۇنيەجۇزىلىك دودادا كۇمىسپەن كۇپتەلىپ, ەۋروپا ويىن­دارى مەن ەۋروپا چەمپيوناتتارىن ەكى رەتتەن ۇتتى. پاريجدە رينگكە شى­عاتىن ەكى بوكسشى بىلتىر نيۋ-دەليدە ۇيىمداستىرىلعان الەم چەمپيوناتىندا باس جۇلدەنى ولجا­لادى. اتالعان جارىستا ۇن­دىستاندىق نيحات زارين 50 كگ سال­ماقتا توپ جارسا, قىتايلىق يۋ ۆۋ 52 كگ سالماقتا دارا شىقتى. ودان بولەك, ۆۋدىڭ ازيا ويىندارىنىڭ جە­ڭىمپازى, ال ءزاريننىڭ سول جارىستىڭ ءفيناليسى دەگەن اتاقتارى تاعى بار. سونداي-اق يسپانيالىق لاۋرا فۋەرتەس (الەم چەمپيوناتىنىڭ قولا جۇلدەگەرى), تايلاندتىق چۋتچامات راكسات (الەم چەمپيوناتىنىڭ ەكى دۇركىن قولا جانە ازيا ويىندارىنىڭ كۇمىس جۇلدەگەرى), فرانتسيالىق ۆاسيلا لحاديري (الەم چەمپيوناتىنىڭ قولا جۇلدەگەرى), موڭعوليالىق ەسۋگەن ويۋنتسەتسەگ (ازيا ويىندارىنىڭ قولا جۇلدەگەرى) سىندى سپورتشىلاردى دا فاۆوريتتەر ساناتىنا جاتقىزۋعا بولادى. ءدال وسى موڭعول قىزى حانچجوۋداعى ازيادانىڭ شيرەك فينالىندا نازىم قىزايبايعا شاڭ قاپتىردى.

57 كگ سالماق دارەجەسىندە كارينا يبراگيموۆا شارشى الاڭعا شىعادى. 27 جاستاعى كوكشەتاۋ ءوڭىرىنىڭ بىلعارى قولعاپ شەبەرى الەم چەمپيوناتىندا ءۇش رەت (2018 جىلى, نيۋ-دەلي; 2022 جىلى ىستانبۇل – كۇمىس, 2023 جىلى نيۋ-دەلي – كۇمىس ) جەڭىس تۇعىرىنا كوتەرىلدى. 2022 جىلى قۇرلىق چەمپيونى, 2023 جىلى ازيا ويىندارىنىڭ كۇمىس جۇلدەگەرى اتاندى. قىتاي ەلىندە كارينانى ازيادانىڭ التىنىنان ايىرعان لين يۋ تينگ ەكەنىن جانكۇيەرلەر جاقسى بىلەدى. تايپەيدىڭ وكىلى الەمنىڭ ەكى دۇركىن جانە قۇرلىق چەمپيونى. سول سەبەپتى دە پاريج وليمپياداسىنىڭ باس جۇلدەسىنەن نەگىزگى ۇمىتكەر رەتىندە وسى بوكسشىنىڭ ەسىمى اتالادى. الداعى بايراقتى باسەكەدە تينگتەن بولەك, باسقا دا مىقتىلار باق سىنايدى. سولاردىڭ اراسىنان فيليپپيندىك نەستي پەتەسيو (توكيو وليمپياداسىنىڭ كۇمىس جۇلدەگەرى, الەم چەمپيونى جانە سول جارىستىڭ كۇمىس جۇلدەگەرى), يتاليالىق يرما تەستا (توكيو وليمپياداسىنىڭ قولا جۇلدەگەرى, الەم چەمپيونى جانە سول جارىستىڭ كۇمىس جۇلدەگەرى, قۇرلىق چەمپيونى, ەۋروپا ويىندارىنىڭ قولا جۇلدەگەرى), فرانتسيالىق امينا زيداني (الەم چەمپيوناتىنىڭ قولا جۇلدەگەرى, ەۋروپا ويىندارىنىڭ جەڭىمپازى), بولگاريالىق سۆەتلانا ستانەۆا (الەم چەمپيوناتىنىڭ قولا جۇلدەگەرى), يرلانديالىق ميكاەلا ۋولشتىڭ (ەۋروپا ويىندارى مەن قۇرلىق چەمپيوناتىنىڭ جۇلدەگەرى) قازىرگى كەزدەگى قارقىنى وتە كۇشتى.

75 كگ سالماقتا ۆالەنتينا حالزوۆا ەل نا­مىسىن قورعايدى. ول دا 27 جاستا. اس­تانالىق ارۋ 2016 جىلى الەم چەمپيونى اتانسا, اتالعان جارىستىڭ سوڭعى ەكەۋىندە ءۇشىنشى تۇعىرعا كوتەرىلدى. دەسەك تە اتاقتى بوكسشىعا وليمپيادا ليتسەنزيا­سىنا يەلىك ەتۋ ءۇشىن كوپ تەر توگۋگە تۋرا كەلدى. ۆالەنتينا ازيا ويىندارى مەن يتالياداعى جارىستا جەر سيپاپ قالدى. تەك ءوزىنىڭ ەڭ سوڭعى مۇمكىندىگىن ءساتتى پايدالانىپ, پاريجگە باراتىنداردىڭ تىزىمىنە قوسىلدى.

حالزوۆانىڭ سالماعىنداعى مىق­تىلار مىنالار: قىتايلىق ليۋ تسيان (ريو وليمپياداسىنىڭ قولا, توكيو وليم­پياداسىنىڭ كۇمىس جۇلدەگەرى, الەم چەمپيونى جانە سول جارىستىڭ كۇمىس جانە قولا جۇلدەگەرى, ازيا ويىن­دارىنىڭ جەڭىمپازى جانە كۇمىس جۇل­دەگەرى, قۇرلىقتىڭ ەكى دۇركىن چەمپيونى), لوۆلينا بورگوحاين (توكيو وليمپياداسىنىڭ قولا جۇلدەگەرى, الەم چەمپيونى جانە سول جارىستىڭ ەكى دۇركىن قولا جۇلدەگەرى, ازيا ويىندارىنىڭ كۇمىس جۇلدەگەرى), ماروككولىق حاديدجا ءال-ماردي (الەم چەمپيونى, سول جارىستىڭ كۇمىس جانە قولا جۇلدەگەرى, افريكا ويىن­دارىنىڭ ەكى دۇركىن جەڭىمپازى, اف­ريكا چەمپيونى), اۋستراليالىق كەيت­لين پاركەر (الەم چەمپيوناتىنىڭ كۇمىس جۇلدەگەرى), فرانتسيالىق داۆينا ميشەل (الەم چەمپيوناتىنىڭ قولا جۇلدەگەرى), پانامالىق اتەينا بيلون (الەم چەمپيونى جانە ءفيناليسى, پانا­مەريكا ويىندارىنىڭ كۇمىس جۇلدەگەرى), كانادالىق تامارا تيببو (الەم چەمپيونى جانە سول جارىستىڭ قولا جۇلدەگەرى) جانە يرلانديالىق اويف و’رۋرك  (ەۋروپا ويىندارىنىڭ جەڭىمپازى).

كەزىندە ءدال وسى سالماقتا مارينا ۆولنوۆا مەن داريعا شاكىموۆا اتوي سالىپ, وليمپيا ويىندارىندا جەڭىس تۇعىرىنا كوتەرىلگەن ەدى. العاشقىسى – 2012 جىلى لوندوندا, ەكىنشىسى 2016 جىلى ريو-دە-جانەيرودا قولا مەدالدى مويىندارىندا جارقىراتتى. ەندى سول جەڭىستى جولدى ۆالەنتينا حالزوۆا جال­عاس­تىرادى دەگەن ۇمىتتەمىز.

ءسويتىپ, پاريج رينگىندە ەلىمىزدىڭ ءۇش بۇرىمدى بوكسشىسى ونەر كورسەتەدى. ەلدوس سەيداللين جاتتىقتىراتىن كومان­داعا ءبىز ساتتىلىك تىلەيمىز. نازىم دا, كا­رينا دا, ۆالەنتينا دا جەڭىس تۇعىرىنا كوتە­رىلۋگە لايىق سپورتشىلار.