الەۋمەتتىك جوبا جالعاسادى

«ەلوردا اكىمدىگىنىڭ باستاماسىمەن قولعا الىنعان جوبا اياسىندا مەملەكەتتىك قولداۋ شارالارى, اتاۋلى الەۋمەتتىك كومەك, بيزنەس اشۋعا قاجەتتى قۇجاتتاردى رەسىمدەۋ مەن جۇمىس تابۋعا كەڭەس بەرىلەدى», دەيدى جوبا ماماندارى.

جولى بولعاندار جوبانىڭ ارقاسىندا, ءتىپتى ەكى قىسقامەرزىمدى باعدارلاما اياسىندا تەگىن وقيدى. ءبىرىنشى باعدارلاما ناۋبايشى, باريستا, ساتۋشى-كاسسير, قوعامدىق تاماقتاندىرۋدىڭ امبەباپ قىزمەتكەرى, تىگىنشى سياقتى 5 جۇمىسشى ماماندىعىن وقىتۋعا ارنالعان. ال ەكىنشى باعدارلاما «Freelance مۇمكىندىك» دەپ اتالادى. بۇل 7 تسيفرلىق داعدىلاردى وقىتۋدى ۇسىنادى. وعان تارگەتولوگ, SMM, ۆيدەوگراف, ماركەتپلەيس مەنەدجەرى, موبيلوگراف, گرافيكالىق ديزاينەر, ۆەب-ديزاينەر قاتارلى ماماندىقتار جاتادى.

جوبا اياسىندا كۋرس وقىپ, ءوز كاسىبىن قولعا العانداردىڭ ءبىرى – عامزات يمانماعزاموۆ. ونىڭ ايتۋىنشا, جوبانىڭ زاماناۋي داعدىلاردى ۇيرەتۋى ەلدىڭ كەلەشەگىنە پايداسى زور.

«مەن «Joltap» جوباسىندا ينتەرنەت ساۋدا باعدارلاماسى دەگەن كۋرستان ءوتتىم. وسىلايشا, ينتەرنەت-ساۋدانىڭ قىر-سىرىن ۇيرەندىم. ۇستازىمىز دارىستەردى وتە كەرەمەت وتكىزدى. وقۋدان سوڭ وي تۋىپ, ۇيدەگىلەرگە ينتەرنەت ارقىلى ساۋدا جاساۋعا بولاتىنىن ايتتىم. قازىر قىتاي ەلىنە تاپسىرىس بەرىپ, تاۋار توسىپ وتىرمىز. تاۋارىمىز كەلگەن سوڭ ماركەتپلەيسكە شىعامىز دەگەن جوسپارىمىز بار. مۇندا تابىس تابۋدىڭ جولىن كورسەتكەن جوباعا جانە ءدارىس بەرگەن ماماندار العىسىم زور», دەيدى ول.

«Joltap» الەۋمەتتىك جوباسىنا جۇگىنگەندەردىڭ 1 200-گە جۋىعى حالىقتىڭ الەۋمەتتىك وسال توپتارىنا جاتادى ەكەن.

«ەلوردا تۇرعىندارى تەگىن وقۋدىڭ مەرزىمى ونكۇندىك كۋرس جانە ءبىر جارىم ايعا دەيىن سوزىلادى. وقىتۋ باعدارلامالارى 18-50 جاس ارالىعىنداعى استانا تۇرعىندارىنا قولجەتىمدى. وقۋ اياقتالعاننان كەيىن قاتىسۋشىلارعا سەرتيفيكات بەرىلەدى. قازىر وقۋشىلار اراسىنداعى نەگىزگى ساناتتىڭ 60 پايىزدان استامى – 35 جاسقا دەيىنگى جۇمىسسىز تۇرعىندار», دەيدى «بارشاعا مۇمكىندىك» مودۋلدىك پۋنكتتەرىنىڭ ماماندارى.

استانادان باستالعان تابىستى جوبا ەندى وڭىرلەردە دە اشىلماق. ماسەلەن, پرەمەر-مينيستر ولجاس بەكتەنوۆتىڭ تاپسىرماسىمەن قاراعاندى جانە اقتوبە وبلىستارىندا, الماتى جانە شىمكەنت قالالارىندا جوبانى جالعاستىرۋ قولعا الىندى. جاقىن ارادا بۇل وڭىرلەردىڭ تۇرعىندارى «Joltap» جوباسىنا قاتىسا الاتىن بولدى.