باتىس قازاقستان وبلىسى بايتەرەك اۋدانىندا موپەد پەن موتوتسيكل سوقتىعىسىپ قالدى. وقيعا سالدارىنان ءجاسوسپىرىم كوز جۇمدى, تاعى ءۇش ادام جاراقات الدى, دەپ حابارلايدى Egemen.kz.
بقو پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, وقيعا 20 ماۋسىم كۇنى ساعات 03.30-دا اۋدان ورتالىعى پەرەمەتنىي اۋىلىندا بولعان.
Alpha Samurai موپەدىنىڭ جۇرگىزۋشىسى رۋلگە يە بولا الماي, قارسى بەتكە شىعىپ كەتىپ, موتوتسيكلمەن بەتپە-بەت تۇيىسكەن. ءتيىستى ساراپتامالار تاعايىندالىپ, تەرگەۋ امالدارى جۇرگىزىلىپ جاتىر.
بقو دەنساۋلىق ساقتاۋ باسقارماسى ءباسپاسوز قىزمەتىنىڭ ناقتىلاۋىنشا, «موسكۆيچي» جانار-جاعارماي قۇيۋ ستانساسى ماڭىنان شاقىرتۋ تۇسكەن.
«2006, 2007, 2008 جىلعى جاسوسپىرىمدەر ءتۇرلى جاراقاتپەن اۋداندىق اۋرۋحاناعا جەتكىزىلگەن. مەديتسينا قىزمەتكەرلەرىنىڭ قاتىسۋىمەن ولار وبلىستىق كوپبەيىندى بالالار اۋرۋحاناسىنا جاتقىزىلدى. اۋىر جاعدايدا تۇسكەن 2006 جىلعى ءجاسوسپىرىم 22 ماۋسىم كۇنى قايتىس بولدى. 2007 جانە 2008 جىلعى جاسوسپىرىمدەرگە امبۋلاتوريالىق ەم تاعايىندالدى. 2008 جىلعى جاسوسپىرىمگە وتا جاسالدى, جاعدايى ورتاشا اۋىر, تراۆماتولوگيا بولىمشەسىندە ەمدەلىپ جاتىر», دەپ حابارلادى ۆەدومستۆودان.