قىزىلوردا. 26 ءساۋىر. تاڭعى ساعات 07:00-دە قىزىلوردا وبلىسى بويىنشا بارلىق سايلاۋ ۋچاسكەلەرى ءوز جۇمىستارىن باستادى. وبلىستا بارلىعى 345 سايلاۋ ۋچاسكەسى بار. ال سايلاۋدا ايماق بويىنشا 396 465 ادام داۋىس بەرەدى. بۇل تۋرالى egemen.kz ءتىلشىسى حابارلادى.
وسىعان دەيىن وڭىردە 3 مىڭنان استام بايقاۋشىلار تىركەلگەن, ولاردىڭ ىشىندە ازاماتتىق قوعام وكىلدەرى, ۇكىمەتتىك ەمەس ۇيىمدار, ساياسي پارتيالار, باق وكىلدەرى جانە 16 شەتەلدىك بايقاۋشىلار بار. ءدال قازىر داۋىس بەرۋ وتە بەلسەندى ءجۇرىپ جاتىر. ماسەلەن, سىرداريا اۋدانى, تەرەڭوزەك كەنتىنىڭ №158 سايلاۋ ۋچاسكەسىندە ەڭ ءبىرىنشى بولىپ سوعىس ارداگەرى ءداۋىتباي ساقتاعانوۆ داۋىس بەردى. ساياسي ناۋقاننىڭ شىمىلدىعىن باتا بەرىپ اشقان اقساقالدىڭ يىعىنا شاپان جابىلسا, ءجۇزىنشى بولىپ داۋىس بەرگەن سايلاۋشىعا ۇيالى تەلەفون سىيعا تارتىلدى. حالىقتىڭ سايلاۋعا دەگەن ىنتاسىن ارتتىراتىن مۇنداي شارا جالاعاش اۋدانىندا دا بولدى. ايتالىق, سايلاۋ ۋچاسكەسىنە ەڭ ءبىرىنشى بولىپ كەلىپ, داۋىس بەرگەن تۇرعىندارعا ىنتالاندىرۋ سىيلىقتارى بەرىلدى. بارلىق سايلاۋ ۋچاسكەلەرىندە كونتسەرتتەر ۇيىمداستىرىلۋدا. كەنت ورتالىقتارىندا كونتسەرت باعدارلامالارى ءوتىپ جاتىر.
سايلاۋعا جاڭا بوسانعان انالار دا قاتىستى. قىزىلوردا قالاسىنداعى №214 سايلاۋ ۋچاسكەسى قالالىق پەريناتالدى ورتالىقتا ورنالاسقان. وسى ۋچاسكەدە انالار ءوز سابيلەرىنىڭ جارقىن كەلەشەگى ءۇشىن تاڭداۋلارىن جاسادى. وسىناۋ شارانىڭ ماڭىزدىلىعىنا نازار اۋدارعان انالار ەلدىڭ بولاشاعى ءۇشىن داۋىس بەرىپ جاتقاندارىن ايتىپ, وزگە دە انالاردى سايلاۋدا بەلسەندىلىك تانىتۋعا شاقىردى. اتالعان ورتالىقتا 151 انا داۋىس بەردى.
جالپى, ءوڭىر بويىنشا سايلاۋ وتە بەلسەندى ءوتىپ جاتىر.
ەرجان بايتىلەس.
دەرەك, سۋرەت: egemen.kz.