قر تۋريزم جانە سپورت ۆيتسە-ءمينيسترى سەرىك جاراسباەۆ استانادا 8-13 قىركۇيەك ارالىعىندا وتەتىن ءىس-شارالار كەزىندە جولدارداعى كەپتەلىستى ازايتۋ ماقساتىندا قانداي شارالار قابىلداناتىنىن ايتىپ بەردى, دەپ حابارلايدى Egemen.kz.
ەسكە سالايىق, وسى جىلدىڭ 8-13 قىركۇيەك ارالىعىندا استانادا V دۇنيەجۇزىلىك كوشپەلىلەر ويىندارىن وتكىزۋ جوسپارلانىپ وتىر.
ۆيتسە-ءمينيستردىڭ ايتۋىنشا, ۇيىمداستىرۋشىلار وقۋ-اعارتۋ, عىلىم جانە جوعارى ءبىلىم مينيسترلىكتەرىمەن كەلىسسوز جۇرگىزىپ جاتىر.
«جاعدايدى شەشۋدىڭ ەكى جولىن قاراستىرىپ جاتىرمىز. ءبىرىنشىسى, تۇران مەن قابانباي باتىر داڭعىلدارى بويىنداعى سپورت نىساندارىنىڭ جانىندا ورنالاسقان بەسكە جۋىق مەكتەپ پەن بالاباقشا جۇمىسىن ونلاين فورماتقا اۋىستىرۋ. ەكىنشىسى, استانا قالاسىندا وقۋ جىلىنىڭ باستالۋىن كەيىنگە قالدىرۋ. ءتيىستى شەشىم كەلەسى اپتادا قابىلدانۋى كەرەك. كوشەلەردى جابۋ جوسپارلانىپ وتىرعان جوق», دەيدى سەرىك جاراسباەۆ وكق الاڭىندا.
سونداي-اق قالادا ديرەكتسيا جالعا العان 130-دان استام قىزمەتتىك كولىك جۇرەتىنى ايتىلدى. قوناق ۇيلەر مەن ويىن الاڭدارى اراسىندا اۆتوبۋستار قاتىنايدى, وسىلايشا قالانىڭ قوعامدىق كولىگىنە تۇسەتىن سالماق ازايادى.
سونىمەن قاتار جۇمىس ورىندارىنا باراتىن ادامداردىڭ اعىنىن بولدىرماۋ ءۇشىن جارىستىڭ رەسمي باستالۋى تاڭعى 9-دان 11-گە اۋىستىرىلدى.