توتەنشە جاعداي 22 ماۋسىم كۇنى ساعات 21:41-دە «قاراسۋ» ىقشام اۋدانىنداعى 26-ءۇي اۋماعىندا بولعان. ءۇي كىرەبەرىستەرىنىڭ بىرىندە اسفالت جابىنى جارىلىپ, سالدارىنان ەلەكتر ەنەرگياسى ءوشىپ قالعان ەدى. تاراز قالاسىنىڭ اكىمدىگى جارىلىس سەبەبى انىقتالعانىن مالىمدەدى, دەپ جازادى Egemen.kz.
قالالىق گاز شارۋاشىلىعى قىزمەتى گازتالداۋ قۇرىلعىسىن قولدانىپ, وقيعا ورنىنان گاز قۇبىرى وتپەيتىنىن جانە گاز جارىلماعانى تۋرالى قورىتىندىعا كەلگەن.
وزگە كوممۋنالدىق قىزمەتتەر دە ءوز جەلىلەرىن زەرتتەدى. ناتيجەسىندە 22 ماۋسىم كۇنى ساعات 21:44 كەزىندە تاراز قالاسى «سامال» مولتەك اۋدانىندا ورنالاسقان 110/6 كۆ-تىق «رىسبەك» پودستانتسياسىنداعى 414 ۇياشىقتان №10-شى تاراتۋ پۋنكتىنە باراتىن جوعارى كەرنەۋلى جەراستى كابەلى ىستەن شىققانى انىقتالدى.
حابارلامادا: «اۆاريالىق ءوشۋ كەزىندە ۇياشىق اۆتوماتتى تۇردە ءسونىپ, جەراستى كابەلى ەلەكتر قۋاتىنان اجىراتىلعان. 110/6 كۆ-تىق ەلەكتر كابەلى وقيعا بولعان جەردەن وتەدى. ساعات 22:47-دە جارىقسىز قالعان 10 مولتەك اۋداندا رەزەرۆتى جەلىلەر ارقىلى ەلەكتر قۋاتى قالپىنا كەلتىرىلدى», دەلىنگەن.
جوندەۋ جۇمىستارى جالعاستىرىلىپ جاتىر.