قاراعاندى. 26 ءساۋىر. قاراعاندى قالاسىنداعى كەنشىلەر مادەنيەت سارايىندا اشىلعان №17 سايلاۋ ۋچاسكەسىندە داۋىس بەرۋ سالتاناتتى راسىممەن باستالدى. بۇل تۋرالى egemen.kz حابارلادى.
ءوز تاڭداۋلارىن جاساۋعا ەرتەلەتىپ كەلۋشىلەردى «قىزىل جۇلدىز» وردەنىنىڭ يەگەرى, تىل ارداگەرى, پودپولكوۆنيك راحمەتوللا وسپانوۆ اقساقال قۇتتىقتاپ, العاش بولىپ داۋىس بەردى. سايلاۋعا ءبىرىنشى رەت قاتىسۋشى قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتى امانعالي راحيموۆ جاستار اراسىنان وسىنداي قۇرمەتكە يە بولدى. «مەن ءوز ەلىمنىڭ بولاشاعى ءۇشىن داۋىس بەرۋگە كەلدىم. قالاۋىمدى ۇمىتكەرلەردىڭ قايسىسىنا جاساۋ ءۇشىن كوپ تولعاندىم. شەشىمىم دۇرىس بولدى دەپ ويلايمىن», – دەدى ول.
وبلىس ورتالىعىنداعى №53 سايلاۋ ۋچاسكەسىنە تىركەلگەن سايلاۋشىلار دا بەلسەندىلىك تانىتۋدا. اتالعان سايلاۋ ۋچاسكەسى كوميسسياسىنىڭ توراعاسى ءالىمحان سۇلەيمەنوۆتىڭ ايتۋىنشا, تاڭەرتەڭگى ساعات 10-عا دەيىن سايلاۋشىلاردىڭ 15 پايىزى ءوز تاڭداۋىن جاساپ ۇلگەرگەن. سونداي-اق, وسى ۋاقىتتاردا داۋىس بەرۋشىلەر سايلاۋ ۋچاسكەسىنە تولاسسىز كەلۋدە. وسىندا تمد ەلدەرى بايقاۋشىلار كوميسسيانىڭ وكىلى ولگا سوسكوۆەتس بولىپ, داۋىس بەرۋ بارىسىمەن تانىستى.
باسقا سايلاۋ ۋچاسكەلەرىندە دە داۋىس بەرۋشىلەر بۇگىنگى ناۋقانعا بەلسەندى اتسالىسۋدا. سايلاۋ ەش زاڭ بۇزۋشىلىقسىز وتۋدە.
ايقىن نەسىپباي.
دەرەك, سۋرەت: egemen.kz.